ബഹ്റൈന് നേരെ ഇറാന്റെ വ്യോമാക്രമണ ശ്രമം; ലക്ഷ്യങ്ങൾ തകർത്ത് ബഹ്റൈൻ പ്രതിരോധ സേന
പ്രദീപ് പുറവങ്കര
മനാമ: രാജ്യത്തെ ലക്ഷ്യമിട്ടെത്തിയ ഇറാന്റെ വ്യോമാക്രമണ ശ്രമങ്ങളെ ബഹ്റൈൻ പ്രതിരോധ സേന (BDF) വിജയകരമായി പ്രതിരോധിച്ചു. ബഹ്റൈൻ മണ്ണിലേക്ക് തൊടുത്ത നിരവധി ഇറാനിയൻ മിസൈലുകളും ഡ്രോണുകളുമാണ് പ്രതിരോധ സേനയുടെ വ്യോമ പ്രതിരോധ സംവിധാനങ്ങൾ ആകാശത്തുവെച്ച് തന്നെ തകർത്തത്. ആക്രമണങ്ങളെ രാജ്യം ശക്തമായി പ്രതിരോധിച്ചതായും തങ്ങളുടെ സൈന്യം ഏത് അടിയന്തര സാഹചര്യത്തെയും നേരിടാൻ പൂർണ്ണ സജ്ജമാണെന്നും ബി.ഡി.എഫ് ജനറൽ കമാൻഡ് അറിയിച്ചു.
രാജ്യത്തിന്റെ പരമാധികാരവും ജനങ്ങളുടെ സുരക്ഷിതത്വവും കാത്തുസൂക്ഷിക്കുന്നതിനായി സൈന്യത്തിന്റെ എല്ലാ വിഭാഗങ്ങളും യൂണിറ്റുകളും നിലവിൽ അതീവ ജാഗ്രതയിലാണ്. ആക്രമണത്തെത്തുടർന്ന് തകർന്നുവീണ മിസൈലുകളുടെയോ ഡ്രോണുകളുടെയോ അവശിഷ്ടങ്ങളും മറ്റ് സംശയാസ്പദമായ വസ്തുക്കളും സുരക്ഷിതമായി നീക്കം ചെയ്യുന്നതിനായി റോയൽ ഫീൽഡ് എഞ്ചിനീയറിംഗ് യൂണിറ്റ് രംഗത്തുണ്ട്. പൊതുജനങ്ങൾ സുരക്ഷാ മുൻകരുതലിന്റെ ഭാഗമായി ഇത്തരം അപരിചിതമായ വസ്തുക്കളുടെ അരികിലേക്ക് പോകരുതെന്നും അവ ശ്രദ്ധയിൽപ്പെട്ടാൽ ഉടൻ തന്നെ ബന്ധപ്പെട്ട അധികാരികളെ വിവരമറിയിക്കണമെന്നും സൈന്യം നിർദ്ദേശിച്ചു.
സാധാരണ ജനങ്ങളെയും ജനവാസ മേഖലകളെയും സ്വകാര്യ സ്വത്തുക്കളെയും ലക്ഷ്യമിട്ട് നടത്തുന്ന ഇത്തരം മിസൈൽ-ഡ്രോൺ ആക്രമണങ്ങളെ ബി.ഡി.എഫ് ശക്തമായി അപലപിച്ചു. ജനങ്ങളുടെ ജീവന് ഭീഷണിയുയർത്തുന്ന ഇത്തരം നീക്കങ്ങൾ അന്താരാഷ്ട്ര മാനുഷിക നിയമങ്ങളുടെ നഗ്നമായ ലംഘനമാണെന്നും അധികൃതർ പ്രസ്താവനയിൽ വ്യക്തമാക്കി.
sdfdsf
