കിംഗ് ഫഹദ് കോസ്വേ വഴി ടാക്സി സർവീസ് ; സ്വാഗതം ചെയ്ത് ബഹ്റൈൻ ചേംബർ
പ്രദീപ് പുറവങ്കര
മനാമ: കിംഗ് ഫഹദ് കോസ്വേ വഴി ലൈസൻസുള്ള ടാക്സി സർവീസുകൾ അനുവദിക്കാനുള്ള തീരുമാനം ബഹ്റൈനും സൗദി അറേബ്യയ്ക്കുമിടയിലുള്ള യാത്രക്കാർക്ക് കൂടുതൽ വഴക്കം നൽകുമെന്നും ഇരുരാജ്യങ്ങളും തമ്മിലുള്ള ജനങ്ങളുടെയും ബിസിനസുകളുടെയും നീക്കത്തെ പിന്തുണയ്ക്കുമെന്നും ബഹ്റൈൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി ചെയർമാൻ നബീൽ ഖാലിദ് കാനൂ പറഞ്ഞു. ഗതാഗത, വാർത്താവിനിമയ മന്ത്രാലയത്തിന്റെ ഈ തീരുമാനത്തെ അദ്ദേഹം സ്വാഗതം ചെയ്തു.
ഈ നീക്കം യാത്ര കൂടുതൽ സൗകര്യപ്രദമാക്കുന്നതിനപ്പുറം ബഹ്റൈനി-സൗദി വിപണികൾക്കിടയിൽ പൗരന്മാർക്കും നിവാസികൾക്കും സന്ദർശകർക്കും ബിസിനസുകാർക്കും കൂടുതൽ വേഗത്തിൽ സഞ്ചരിക്കാൻ സഹായകരമാകുമെന്ന് അദ്ദേഹം വ്യക്തമാക്കി. ഗതാഗത മാർഗ്ഗങ്ങളുടെ വൈവിധ്യവൽക്കരണം വ്യാപാരം, ടൂറിസം, സേവനങ്ങൾ, നിക്ഷേപം എന്നിവയ്ക്ക് കരുത്തേകുമെന്നും വിപണിയിൽ കൂടുതൽ മത്സരശേഷി കൊണ്ടുവരുമെന്നും അദ്ദേഹം കൂട്ടിച്ചേർത്തു.
കോസ്വേ വഴിയുള്ള യാത്ര എളുപ്പമാകുന്നതോടെ ടൂറിസം, ഹോസ്പിറ്റാലിറ്റി, റീട്ടെയിൽ, റെസ്റ്റോറന്റുകൾ, എക്സിബിഷനുകൾ തുടങ്ങി സന്ദർശകരെ ആശ്രയിച്ചു പ്രവർത്തിക്കുന്ന മേഖലകൾക്ക് വലിയ നേട്ടമുണ്ടാകും. കോസ്വേയിലെ യാത്രാസമയം കുറയ്ക്കാനും ഗതാഗത ശേഷി വർദ്ധിപ്പിക്കാനും ലക്ഷ്യമിട്ടുള്ള കൂടുതൽ സാങ്കേതികവും ഭരണപരവുമായ പരിഷ്കാരങ്ങളെ ബഹ്റൈൻ ചേംബർ പിന്തുണയ്ക്കുമെന്നും നബീൽ കാനൂ പറഞ്ഞു.
dfgdfg
