ഫിലിപ്പീൻസ് സ്ഥാനപതി ഒരാഴ്ചയ്ക്കകം രാജ്യം വിടണമെന്ന് കുവൈത്ത്
കുവൈത്ത് സിറ്റി : ഗാർഹിക തൊഴിലാളികളുടെ സംരക്ഷണവുമായി ബന്ധപ്പെട്ട് കുവൈത്തും ഫിലിപ്പൈൻസും തമ്മിൽ ഉടലെടുത്ത തർക്കം പുതിയ തലത്തിലേക്ക്. കുവൈത്തിലെ ഫിലിപ്പൈൻസ് അംബാസഡറോട് ഒരാഴ്ചക്കകം രാജ്യം വിടുന്നതിന് കുവൈത്ത് വിദേശ മന്ത്രാലയം ആവശ്യപ്പെട്ടു. മനിലയിലെ തങ്ങളുടെ അംബാസഡറെ കുവൈത്ത് തിരിച്ചുവിളിച്ചിട്ടുമുണ്ട്.
കുവൈത്തിലെ ഫിലിപ്പൈൻസ് അംബാസഡറെ അനഭിമതനായി വിദേശ മന്ത്രാലയം പ്രഖ്യാപിച്ചു. നയതന്ത്ര പ്രവർത്തനങ്ങളുടെ അടിസ്ഥാനങ്ങൾക്ക് വിരുദ്ധമായ ഗുരുതരമായ നിയമ ലംഘനങ്ങൾ കുവൈത്തിലെ ഫിലിപ്പൈൻസ് എംബസി നടത്തിയതിനെ വിദേശ മന്ത്രാലയം അപലപിച്ചു. കുവൈത്തിലെ നിയമങ്ങളെയും അന്താരാഷ്ട്ര ചാർട്ടറുകളെയും വെല്ലുവിളിച്ച് കുവൈത്തിലെ ഫിലിപ്പിനോ വേലക്കാരികളെ എംബസി ഉദ്യോഗസ്ഥരും മറ്റുള്ളവരും ചേർന്ന് തൊഴിലുടമകളുടെ വീട്ടിൽ നിന്ന് കടത്തിയത് ഒരിക്കലും അംഗീകരിക്കാൻ കഴിയില്ലെന്ന് മന്ത്രാലയം പറഞ്ഞു. ഇത് കുവൈത്തിന്റെ ആഭ്യന്തര കാര്യങ്ങളിലെ ഇടപെടലാണ്. സുരക്ഷാ വകുപ്പുകളുടെ അധികാര പരിധിയിൽ വരുന്ന പ്രവർത്തനങ്ങളാണ് ഫിലിപ്പൈൻസ് എംബസി ഉദ്യോഗസ്ഥരും സഹായികളും നടത്തിയത്. നയതന്ത്ര ബന്ധങ്ങൾ ക്രമീകരിക്കുന്ന 1961 ജനീവ കരാറിന്റെ നഗ്നമായ ലംഘനമാണിത്.
ഫിലിപ്പിനോ വേലക്കാരികളെ രക്ഷിക്കുന്നതിന് കുവൈത്തിലെ ഫിലിപ്പൈൻസ് എംബസിയിലേക്ക് ഏഴു സംഘങ്ങളെ ഫിലിപ്പൈൻസ് വിദേശ മന്ത്രാലയം അയച്ചു എന്ന ഫിലിപ്പൈൻസ് അധികൃതരുടെ പ്രസ്താവനകൾ അന്താരാഷ്ട്ര നിയമങ്ങളുടെ ലംഘനമാണ്. ഈ പശ്ചാത്തലത്തിൽ കുവൈത്തിലെ ഫിലിപ്പൈൻസ് അംബാസഡറെ രണ്ടു തവണ വിളിച്ചുവരുത്തി വിദേശ മന്ത്രാലയം രേഖാമൂലം പ്രതിഷേധം അറിയിച്ചിരുന്നു.
ഫിലിപ്പിനോ വേലക്കാരികളെ തൊഴിലിടങ്ങളിൽ നിന്ന് കടത്തിക്കൊണ്ടുപോയവരുടെ പേരുവിവരങ്ങൾ മൂന്നു ദിവസത്തിനകം കൈമാറണമെന്നും ഇതോടൊപ്പം അംബാസഡറോട് ആവശ്യപ്പെട്ടിരുന്നു. എന്നാൽ ഇതുവരെ ഇക്കാര്യത്തിൽ ഫിലിപ്പൈൻസ് എംബസി അനുകൂലമായി പ്രതികരിച്ചിട്ടില്ല. ഈ പശ്ചാത്തലത്തിൽ രാജ്യത്തിന്റെ പരമാധികാരവും നിയമങ്ങളും ദേശീയ സുരക്ഷയും ലംഘിച്ചവരെ കണ്ടെത്തി പിടികൂടി നയതന്ത്ര നിയമങ്ങൾക്ക് അനുസൃതമായി വിചാരണ ചെയ്യുന്നതിന് സുരക്ഷാ വകുപ്പുകൾ ശ്രമം തുടരും.
ഇപ്പോൾ രൂപപ്പെട്ട പ്രശ്നത്തിന് നിഷേധാത്മകമായ മാധ്യമ കോലാഹങ്ങളിൽ നിന്ന് അകന്ന് വിവേകത്തോടെ പരിഹാരം കാണുകയാണ് വേണ്ടതെന്നും കുവൈത്ത് വിദേശ മന്ത്രാലയം പ്രസ്താവനയിലൂടെ വ്യക്തമാക്കി.
