ബഹ്റൈനിൽ വൈദ്യുതി ഉപഭോഗത്തിൽ വൻ വർദ്ധനവ്

പ്രദീപ് പുറവങ്കര

മനാമ: ബഹ്റൈനിൽ വൈദ്യുതി ഉപഭോഗത്തിൽ വൻ വർദ്ധനവ്. റിപ്പോർട്ടുകൾ പ്രകാരം വൈദ്യുതി ഉപഭോഗം എക്കാലത്തെയും ഉയർന്ന റെക്കോർഡായ 19,391.6 ഗിഗാവാട്ട് അവറിലെത്തി. വ്യവസായ മേഖലയിലെ അതിവേഗ വളർച്ചയെ തുടർന്ന് തുടർച്ചയായ അഞ്ചാം വർഷമാണ് രാജ്യത്തെ വൈദ്യുതി ഉപയോഗം ഉയർന്ന നിരക്ക് രേഖപ്പെടുത്തുന്നത്.

തൊട്ടുമുൻപത്തെ വർഷത്തെ അപേക്ഷിച്ച് ഉപഭോഗത്തിൽ രണ്ട് ശതമാനത്തിന്റെ (382.6 GWh) വർദ്ധനവുണ്ടായി. കഴിഞ്ഞ അഞ്ച് വർഷത്തിനിടെ ആകെ വൈദ്യുത ആവശ്യകതയിൽ 18.7 ശതമാനത്തിന്റെ വർദ്ധനവാണ് രേഖപ്പെടുത്തിയത്. ഇതിൽ ഏറ്റവും ഉയർന്ന വളർച്ചാനിരക്ക് വ്യവസായ മേഖലയിലാണ്. കഴിഞ്ഞ അഞ്ച് വർഷത്തിനിടെ വ്യാവസായിക വൈദ്യുതി ഉപഭോഗം 65.7 ശതമാനം വർദ്ധിച്ച് 3,603.1 ഗിഗാവാട്ട് അവറായി ഉയർന്നു.

എങ്കിലും രാജ്യത്തെ ആകെ ഉപഭോഗത്തിൽ സിംഹഭാഗവും ഗാർഹിക മേഖലയിലാണ് — 48.4 ശതമാനം. വാണിജ്യ സ്ഥാപനങ്ങൾ 32.8 ശതമാനവും വ്യാവസായിക മേഖല 18.6 ശതമാനവും കാർഷിക മേഖല 0.3 ശതമാനവും വൈദ്യുതി ഉപയോഗിക്കുന്നു. 2008-ലെ ഉപഭോഗവുമായി താരതമ്യം ചെയ്യുമ്പോൾ രാജ്യത്തെ വൈദ്യുതി ഉപയോഗം ഏകദേശം ഇരട്ടിയോളമായി (99.9% വർദ്ധനവ്) മാറിയിട്ടുണ്ട്.

ഉപഭോഗം വർദ്ധിക്കുന്നതിനനുസരിച്ച് വൈദ്യുതോത്പാദനത്തിലും ബഹ്റൈൻ പുതിയ റെക്കോർഡിട്ടു. ആകെ ഉത്പാദനം 2.1 ശതമാനം വർദ്ധിച്ച് 20,298.5 ഗിഗാവാട്ട് അവറിലെത്തി. അൽ ദുർ 2, അൽ ദുർ 1 പ്ലാന്റുകളാണ് ഉത്പാദനത്തിൽ മുന്നിൽ നിൽക്കുന്നത്. വർദ്ധിച്ചുവരുന്ന ആവശ്യകത പരിഹരിക്കുന്നതിനായി സിത്രയിൽ 1,400 മുതൽ 1,500 മെഗാവാട്ട് ശേഷിയുള്ള പുതിയ സ്വതന്ത്ര ഊർജ്ജ-ജല പദ്ധതിയും 2026 തുടക്കത്തിൽ ഉദ്ഘാടനം ചെയ്ത ജസ്രയിലെ 400 കെ.വി സബ്സ്റ്റേഷനും ഉൾപ്പെടെ വൻകിട വികസന പ്രവർത്തനങ്ങളാണ് പുരോഗമിക്കുന്നത്. 2035-ഓടെ രാജ്യത്തെ ആകെ വൈദ്യുതി ഉത്പാദനത്തിന്റെ 20 ശതമാനവും പുനരുപയോഗ ഊർജ്ജ സ്രോതസ്സുകളിൽ നിന്നാക്കാനാണ് ബഹ്റൈൻ ലക്ഷ്യമിടുന്നത്.