ഇ-ബൈക്കുകൾക്കും സ്കൂട്ടറുകൾക്കും കർശന നിയന്ത്രണം; മാർഗ്ഗനിർദ്ദേശങ്ങളുമായി ട്രാഫിക് ജനറൽ ഡയറക്ടറേറ്റ്
പ്രദീപ് പുറവങ്കര
മനാമ: ഇലക്ട്രിക് ബൈക്കുകളും സ്കൂട്ടറുകളും ഉപയോഗിക്കുന്നതിനുള്ള നിയമപരമായ ആവശ്യകതകളെയും സുരക്ഷാ മാനദണ്ഡങ്ങളെയും കുറിച്ച് പൊതുജനങ്ങൾക്ക് മുന്നറിയിപ്പും നിർദ്ദേശങ്ങളുമായി ബഹ്റൈൻ ട്രാഫിക് ജനറൽ ഡയറക്ടറേറ്റ്. റോഡപകടങ്ങൾ ഒഴിവാക്കുന്നതിനും മറ്റ് യാത്രക്കാരുടെ സുരക്ഷ ഉറപ്പാക്കുന്നതിനുമാണ് നിർദ്ദേശങ്ങൾ കർശനമായി പാലിക്കാൻ അധികൃതർ ആവശ്യപ്പെടുന്നത്.
നിയമപ്രകാരം 16 വയസ്സിൽ താഴെയുള്ള കുട്ടികൾ ഇലക്ട്രിക് ബൈക്കുകൾ ഓടിക്കാൻ പാടില്ല. രക്ഷിതാക്കളുടെയോ രക്ഷാകർത്താക്കളുടെയോ നേരിട്ടുള്ള മേൽനോട്ടമില്ലാതെ ഏഴ് വയസ്സിൽ താഴെയുള്ള കുട്ടികൾ ഇലക്ട്രിക് സ്കൂട്ടറുകൾ ഉപയോഗിക്കുന്നതും നിരോധിച്ചിട്ടുണ്ട്. ആവശ്യമായ മേൽനോട്ടമില്ലാതെ പ്രായപൂർത്തിയാകാത്ത കുട്ടികളെ ഇത്തരം വാഹനങ്ങൾ ഉപയോഗിക്കാൻ അനുവദിച്ചാൽ അതിൻ്റെ നിയമപരമായ ഉത്തരവാദിത്തം രക്ഷിതാക്കൾക്കായിരിക്കുമെന്ന് ഡയറക്ടറേറ്റ് മുന്നറിയിപ്പ് നൽകി.
യാത്രക്കാർ നിർബന്ധമായും സുരക്ഷാ ഉപകരണങ്ങൾ ധരിക്കണമെന്ന് അധികൃതർ വ്യക്തമാക്കി. ഇലക്ട്രിക് ബൈക്ക് യാത്രക്കാർ നിർബന്ധമായും ഹെൽമറ്റ് ധരിക്കണം. അതേസമയം, ഇലക്ട്രിക് സ്കൂട്ടർ യാത്രക്കാർ ഹെൽമറ്റിന് പുറമെ തോൾ, കൈകൾ, കാലുകൾ എന്നിവയ്ക്കാവശ്യമായ സുരക്ഷാ കവചങ്ങളും ധരിക്കേണ്ടതുണ്ട്.
2026-ലെ ഡിസിഷൻ നമ്പർ 58 അനുസരിച്ച്, പ്രധാന റോഡുകളിലോ പരമാവധി വേഗത 50 കിലോമീറ്ററിൽ കൂടുതലുള്ള റോഡുകളിലോ ഇ-ബൈക്കുകളും സ്കൂട്ടറുകളും ഉപയോഗിക്കാൻ അനുമതിയില്ല. വാഹന പാതകൾ, റോഡ് സൈഡുകൾ, എമർജൻസി ലൈനുകൾ എന്നിവയിലൂടെ ഇവ ഓടിക്കുന്നതും നിരോധിച്ചിട്ടുണ്ട്.
ഇ-ബൈക്കുകളുടെയും സ്കൂട്ടറുകളുടെയും പരമാവധി വേഗത മണിക്കൂറിൽ 25 കിലോമീറ്ററായി നിജപ്പെടുത്തിയിട്ടുണ്ട്. അധിക യാത്രക്കാരെ കയറ്റുക, ട്രാഫിക്കിന് എതിർദിശയിൽ വാഹനം ഓടിക്കുക, യാത്രക്കാർക്കോ മറ്റുള്ളവർക്കോ അപകടമുണ്ടാക്കുന്ന രീതിയിൽ വാഹനം ഉപയോഗിക്കുക എന്നിവ പൂർണ്ണമായും നിരോധിച്ചു.
കാൽനടയാത്രക്കാർക്കും മറ്റ് വാഹനങ്ങൾക്കും മുൻഗണന നൽകാൻ ഇ-ബൈക്ക് ഉപയോക്താക്കൾ ശ്രദ്ധിക്കണം. ട്രാഫിക് നിയമങ്ങളെക്കുറിച്ച് കുട്ടികളെ ബോധവൽക്കരിക്കുന്നതിൽ കുടുംബങ്ങൾക്ക് വലിയ പങ്കുണ്ടെന്നും ഡയറക്ടറേറ്റ് ഓർമ്മിപ്പിച്ചു. നിയമലംഘനങ്ങൾ തടയുന്നതിനായി ബോധവൽക്കരണ ക്യാമ്പയിനുകളും ഫീൽഡ് പരിശോധനകളും തുടരുമെന്നും നിയമലംഘകർക്കെതിരെ കർശന നടപടി സ്വീകരിക്കുമെന്നും അധികൃതർ അറിയിച്ചു.
efsef
