മുഖ്യ പരിശീലകനുമായുള്ള തർക്കം: ക്രിസ്ത്യാനോ റൊണാൾഡോയ്ക്ക് 30 ദിവസത്തെ സസ്പെൻഷനും പിഴയും

ശാരിക

ലിസ്ബൺ : മുഖ്യ പരിശീലകൻ ജോർജ് ജെസസുമായുണ്ടായ തർക്കത്തെത്തുടർന്ന് ദേശീയ ടീം ക്യാമ്പ് വിട്ട പോർച്ചുഗൽ താരം ക്രിസ്ത്യാനോ റൊണാൾഡോയെ പോർച്ചുഗീസ് ഫുട്ബോൾ ഫെഡറേഷൻ 30 ദിവസത്തേക്ക് സസ്പെൻഡ് ചെയ്തു. താരത്തിന് 286 ഡോളർ പിഴയും ചുമത്തിയിട്ടുണ്ട്. ദേശീയ ടീമിന്റെ അനുമതിയില്ലാതെ ക്യാമ്പ് വിട്ടുപോകുന്നവർക്കുള്ള ചട്ടപ്രകാരമുള്ള ഏറ്റവും കുറഞ്ഞ സസ്‌പെൻഷനാണ് റൊണാൾഡോയ്ക്ക് ലഭിച്ചത്.

സെപ്റ്റംബർ 27-ന് നോർവേയ്‌ക്കെതിരായ മത്സരത്തിൽ റൊണാൾഡോയെ ആദ്യ ഇലവനിൽ ഉൾപ്പെടുത്തിയിരുന്നില്ല. മത്സരത്തിനിടെ വാംഅപ്പ് നടത്തിയെങ്കിലും കളത്തിലിറക്കിയില്ല. തുടർന്ന് ഒക്ടോബർ ഒന്നിന് ഡെൻമാർക്കിനെതിരായ മത്സരത്തിലും ആദ്യ ഇലവനിൽ ഇടം ലഭിക്കില്ലെന്ന് അറിഞ്ഞതോടെയാണ് സെപ്റ്റംബർ 30-ന് താരം ദേശീയ ടീമിന്റെ ക്യാമ്പ് വിട്ടത്.

കളിക്കാൻ അവസരം നൽകുമെന്ന ഉറപ്പ് പരിശീലകൻ പാലിച്ചില്ലെന്ന് റൊണാൾഡോ ആരോപിച്ചിരുന്നു. സംഭവത്തിൽ പിന്നീട് ആരാധകരോട് ക്ഷമാപണം നടത്തിയ താരം, ഏത് ശിക്ഷയും അംഗീകരിക്കുമെന്നും വ്യക്തമാക്കിയിരുന്നു. അന്താരാഷ്ട്ര ഫുട്ബോളിൽ നിന്ന് വിരമിക്കാൻ ഉദ്ദേശിക്കുന്നില്ലെന്നും സമൂഹമാധ്യമത്തിലൂടെ താരം അറിയിച്ചിരുന്നു. ഒക്ടോബർ ഒന്നിന് ഡെൻമാർക്കിനെതിരായ മത്സരദിവസം മുതലാണ് സസ്‌പെൻഷൻ കണക്കാക്കിയത്. ഇതുവരെ 19 ദിവസത്തെ ശിക്ഷ താരം അനുഭവിച്ചുകഴിഞ്ഞെന്നും ഒക്ടോബർ അവസാനത്തോടെ സസ്‌പെൻഷൻ പൂർത്തിയാകുമെന്നുമാണ് റിപ്പോർട്ടിലുള്ളത്.

വിവാദങ്ങൾക്കിടയിലും റൊണാൾഡോയെ ദേശീയ ടീമിലേക്ക് തിരിച്ചെടുക്കുന്ന കാര്യം പരിഗണിക്കുമെന്ന് പരിശീലകൻ ജീസസ് സൂചന നൽകി. റൊണാൾഡോയുടെ അഭാവത്തിലും പോർച്ചുഗൽ മികച്ച പ്രകടനമാണ് നടത്തിയത്. നേഷൻസ് ലീഗിലെ ആദ്യ നാല് മത്സരങ്ങളും വിജയിച്ച ടീം, രണ്ട് മത്സരങ്ങൾ ശേഷിക്കെ ക്വാർട്ടർ ഫൈനൽ യോഗ്യത ഉറപ്പാക്കി. നവംബർ 14-ന് ഡെൻമാർക്കിനെ സ്വന്തം തട്ടകത്തിൽ നേരിടുന്ന പോർച്ചുഗൽ, നവംബർ 17-ന് വെയിൽസിനെതിരെയും കളിക്കും.