ഡിജിറ്റൽ ഇടപാടുകളിൽ സർവ്വകാല റെക്കോർഡുമായി ബഹ്‌റൈൻ; ബെനഫിറ്റ് വഴി കൈമാറിയത് 19.3 ശതകോടി ദീനാർ

പ്രദീപ് പുറവങ്കര

മനാമ: 2026-ന്റെ ആദ്യ പകുതിയിൽ ബഹ്‌റൈനിലെ ഡിജിറ്റൽ സാമ്പത്തിക ഇടപാടുകളിൽ വൻ വളർച്ച. ഇലക്ട്രോണിക് ഫണ്ട് ട്രാൻസ്ഫർ സിസ്റ്റം (EFTS) വഴി ബെനഫിറ്റ് കമ്പനി പ്രൊസസ്സ് ചെയ്ത ഇടപാടുകളുടെ എണ്ണം 7.6 ശതമാനം വർധിച്ച് 26.12 കോടിയിലെത്തി. 19.3 ശതകോടി ബഹ്‌റൈനി ദീനാറിന്റെ ഇടപാടുകളാണ് ഈ കാലയളവിൽ നടന്നത്. 2025-ലെ ആദ്യ പകുതിയിലെ 18.2 ശതകോടി ദീനാറിനേക്കാൾ 6.1 ശതമാനത്തിന്റെ വർധനവാണ് മൊത്തം മൂല്യത്തിൽ രേഖപ്പെടുത്തിയത്.

രാജ്യത്തെ ഏറ്റവും ജനപ്രിയ പേയ്‌മെന്റ് ആപ്പായ 'ബെനഫിറ്റ് പേ' വഴി മാത്രം 5.4 ശതകോടി ദീനാർ മൂല്യമുള്ള 24.6 കോടി ഇടപാടുകൾ നടന്നു. ഇടപാടുകളുടെ എണ്ണത്തിലും മൂല്യത്തിലും കഴിഞ്ഞ വർഷത്തെ അപേക്ഷിച്ച് 7.2 ശതമാനം വളർച്ച ബെനഫിറ്റ് പേ കൈവരിച്ചു.

തൽക്ഷണ പണമിടപാട് സേവനമായ 'ഫൗറി പ്ലസ്' (Fawri+) വഴി 5.4 ശതകോടി ദീനാറിന്റെ 24.81 കോടി ഇടപാടുകൾ നടന്നു. ഇടപാടുകളുടെ എണ്ണത്തിൽ 8 ശതമാനവും മൂല്യത്തിൽ 17.7 ശതമാനവും വർധനവാണിത്. ഇതിൽ ബെനഫിറ്റ് പേ വഴി മാത്രം നടപ്പിലാക്കിയ ഫൗറി പ്ലസ് ഇടപാടുകൾ 24.1 കോടിയാണ് (4.8 ശതകോടി ദീനാർ).

മറ്റു സേവനങ്ങളായ 'ഫൗറി' (Fawri) വഴി 13.2 ശതകോടി ദീനാറിന്റെ 73 ലക്ഷം ഇടപാടുകൾ പ്രൊസസ്സ് ചെയ്തു. എന്നാൽ ബെനഫിറ്റ് പേ വഴിയുള്ള ഫൗറി ഇടപാടുകളുടെ എണ്ണത്തിൽ 56 ശതമാനവും മൂല്യത്തിൽ 34.2 ശതമാനവും കുറവുണ്ടായി. ബിൽ പേയ്‌മെന്റ് സേവനമായ 'ഫവാതീർ' (Fawateer) വഴി നടന്ന ഇടപാടുകളുടെ എണ്ണം 5.7 മില്യണായി അല്പം കുറഞ്ഞെങ്കിലും (4 ശതമാനം കുറവ്), കൈമാറ്റം ചെയ്യപ്പെട്ട മൊത്തം തുക 11.4 ശതമാനം വർധിച്ച് 672.4 ദശലക്ഷം ദീനാറിലെത്തി.

ക്രെഡിറ്റ് റെഫറൻസ് ബ്യൂറോ ഈ കാലയളവിൽ 11,100 ക്രെഡിറ്റ് റിപ്പോർട്ടുകളും 2.49 ലക്ഷത്തിലധികം അന്വേഷണങ്ങളും കൈകാര്യം ചെയ്തു. ഇലക്ട്രിസിറ്റി ആൻഡ് വാട്ടർ അതോറിറ്റിയുമായി (EWA) സഹകരിച്ച് ഡിജിറ്റൽ ഡയറക്ട് ഡെബിറ്റ് സൗകര്യം, ഷെഡ്യൂൾഡ് ട്രാൻസ്ഫറുകൾ, വ്യക്തിഗത ഹോം സ്‌ക്രീൻ ക്യു.ആർ കോഡുകൾ എന്നിവ ബെനഫിറ്റ് പേയിൽ പുതുതായി അവതരിപ്പിച്ചു. കൂടാതെ, പ്രമുഖ ക്രിപ്‌റ്റോ പ്ലാറ്റ്‌ഫോമായ 'റെയിൻ' (Rain) ബെനഫിറ്റ് പേ വഴി പണമടയ്ക്കൽ സ്വീകരിക്കുന്ന രാജ്യത്തെ ആദ്യ അംഗീകൃത ക്രിപ്‌റ്റോ പ്ലാറ്റ്‌ഫോമായി മാറി.