വേനൽച്ചൂടിന് ആശ്വാസമേകി ഐ.സി.ആർ.എഫ് 'തേർസ്റ്റ് ക്വെഞ്ചേഴ്സ്
പ്രദീപ് പുറവങ്കര
മനാമ: കഠിനമായ വേനൽക്കാലത്ത് തൊഴിലാളികളുടെ ആരോഗ്യവും സുരക്ഷയും ഉറപ്പാക്കാൻ ഇന്ത്യൻ കമ്മ്യൂണിറ്റി വെൽഫെയർ ഫോറം (ICRF ബഹ്റൈൻ) സംഘടിപ്പിക്കുന്ന വാർഷിക വേനൽക്കാല ബോധവൽക്കരണ പരിപാടിയായ 'തേർസ്റ്റ് ക്വെഞ്ചേഴ്സ് 2026'ന്റെ ഏഴാം ആഴ്ചയിലെ വിതരണ പരിപാടി പൂർത്തിയായി. റീഫ് ഐലൻഡിൽ സൈപ്രസ് സെബാർക്കോ ടാബെറ്റ് (CCT) കമ്പനി നിയന്ത്രിക്കുന്ന തൊഴിലിടത്തിലാണ് പരിപാടി സംഘടിപ്പിച്ചത്.
ഉച്ചവിശ്രമ നിയമവും സുരക്ഷിതമായ തൊഴിൽ അന്തരീക്ഷവും ഉറപ്പാക്കാനുള്ള ബഹ്റൈൻ തൊഴിൽ മന്ത്രാലയത്തിന്റെ സംരംഭങ്ങൾക്ക് പിന്തുണ പ്രഖ്യാപിച്ചാണ് ഈ പ്രചാരണം നടത്തുന്നത്. തൊഴിൽ മന്ത്രാലയം, ലേബർ മാർക്കറ്റ് റെഗുലേറ്ററി അതോറിറ്റി (LMRA), ഇന്റർനാഷണൽ ഓർഗനൈസേഷൻ ഫോർ മൈഗ്രേഷൻ (IOM) എന്നിവയുടെ സഹകരണത്തോടെ സംഘടിപ്പിച്ച ക്യാമ്പെയ്നിൽ 480-ഓളം തൊഴിലാളികൾക്ക് ശുദ്ധജലം, ജ്യൂസ്, ലാബാൻ, ഓറഞ്ച്, ആപ്പിൾ, വാഴപ്പഴം എന്നിവ വിതരണം ചെയ്തു.
തൊഴിൽ മന്ത്രാലയത്തിലെ സീനിയർ ഒക്യുപേഷണൽ സേഫ്റ്റി എൻജിനീയർ ഹുസൈൻ അൽ ഹുസൈനി, ബഹ്റൈനിലെ ദാവൂദി ബോഹ്റ കമ്മ്യൂണിറ്റി പ്രതിനിധി ഷെയ്ഖ് മുസ്തഫ ഫിറോസ് എന്നിവർ പരിപാടിയിൽ വിശിഷ്ടാതിഥികളായി പങ്കെടുത്തു. കടുത്ത ചൂടിൽ നിർജ്ജലീകരണം തടയുന്നതിനും ആരോഗ്യം നിലനിർത്തുന്നതിനുമായി തൊഴിലാളികൾ പാലിക്കേണ്ട സുരക്ഷാ മുൻകരുതലുകളെക്കുറിച്ച് ഐ.സി.ആർ.എഫ് ഉപദേഷ്ടാവ് ഡോ. ബാബു രാമചന്ദ്രൻ വിശദീകരിച്ചു.
ഐ.സി.എ.ഐ (ICAI) ബഹ്റൈൻ ചാപ്റ്റർ, 'സയൻസ് ഓഫ് സ്പിരിച്വാലിറ്റി' എന്നിവരും പരിപാടിയുടെ ഭാഗമായി. ബോഹ്റ കമ്മ്യൂണിറ്റിയും നിരവധി സന്നദ്ധപ്രവർത്തകരും ക്യാമ്പെയ്ന് പിന്തുണ നൽകി.
ഐ.സി.ആർ.എഫ് വൈസ് ചെയർമാന്മാരായ പങ്കജ് നല്ലൂർ, പ്രകാശ് മോഹൻ, ഉപദേഷ്ടാവ് അരുൾദാസ് തോമസ്, ജോയിന്റ് സെക്രട്ടറി ജാവദ് പാഷ, 'തേർസ്റ്റ് ക്വെഞ്ചേഴ്സ്' കോർഡിനേറ്റർമാരായ ചെമ്പൻ ജലാൽ, രുചി ചക്രവർത്തി, CCT പ്രോജക്റ്റ് മാനേജർ റയാൻ പോവി, സേഫ്റ്റി മാനേജർ മുഹമ്മദ് സലീം എന്നിവർക്കൊപ്പം മറ്റ് ഐ.സി.ആർ.എഫ് അംഗങ്ങളും വിദ്യാർത്ഥികളും വിതരണത്തിൽ പങ്കാളികളായി.
sdgdgf
