ബാലവിദ്യാഭ്യാസ മേഖലയിലെ ജീവനക്കാർക്ക് ദേശീയ പരിശീലന ചട്ടക്കൂട് പുറത്തിറക്കി ബഹ്റൈൻ വിദ്യാഭ്യാസ മന്ത്രാലയം

പ്രദീപ് പുറവങ്കര

മനാമ: രാജ്യത്തെ ബാലവിദ്യാഭ്യാസ സ്ഥാപനങ്ങളിലെ (Early Childhood Education Institutions) ജീവനക്കാരുടെ തൊഴിൽപരമായ മികവും നൈപുണ്യവും വർദ്ധിപ്പിക്കുന്നതിനായി ബഹ്റൈൻ വിദ്യാഭ്യാസ മന്ത്രാലയം ദേശീയ പരിശീലന ചട്ടക്കൂടിന് തുടക്കം കുറിച്ചു. ബാലവിദ്യാഭ്യാസ മേഖലയുടെ ഗുണനിലവാരം ഉറപ്പുവരുത്തുന്നതിലും അധ്യാപകരുടെയും അനുബന്ധ ജീവനക്കാരുടെയും ശേഷി മെച്ചപ്പെടുത്തുന്നതിലും സുപ്രധാന നാഴികക്കല്ലാകുന്നതാണ് ഈ പദ്ധതി.

മന്ത്രാലയത്തിന്റെ തന്ത്രപ്രധാനമായ വികസന പദ്ധതികൾക്കും ബഹ്‌റൈൻ ഇക്കണോമിക് വിഷൻ 2030 ലക്ഷ്യങ്ങൾക്കും അനുസൃതമായാണ് ഈ ചട്ടക്കൂട് രൂപകൽപ്പന ചെയ്തിരിക്കുന്നത്. തൊഴിൽപരമായ വികസന പരിപാടികൾക്കായി ഒരു ഏകീകൃത ദേശീയ മാനദണ്ഡം നൽകാൻ ഈ സംവിധാനത്തിലൂടെ സാധിക്കുമെന്ന് വിദ്യാഭ്യാസ മന്ത്രാലയത്തിലെ ഏർളി ചൈൽഡ്ഹുഡ് എഡ്യൂക്കേഷൻ ലൈസൻസിംഗ് ആൻഡ് ഫോളോ-അപ്പ് വിഭാഗം ഡയറക്ടർ ഫത്തിയ അലി ഈഷ് പറഞ്ഞു. അന്താരാഷ്ട്ര തലത്തിൽ അംഗീകരിക്കപ്പെട്ട രീതികളും മാനദണ്ഡങ്ങളും മുൻനിർത്തി അധ്യാപകരുടെ ശേഷിയും സജ്ജീകരണവും മെച്ചപ്പെടുത്താൻ ഇത് സഹായിക്കും.

അംഗീകൃത പരിശീലന സ്ഥാപനങ്ങൾക്ക് സവിശേഷമായ പരിശീലന പരിപാടികൾ ആസൂത്രണം ചെയ്യാനും നടപ്പിലാക്കാനും ഈ ചട്ടക്കൂട് വഴികാട്ടിയാകും. ഇതുവഴി മേഖലയിലെ എല്ലാ സ്ഥാപനങ്ങളിലും ഒരുപോലെ ഉയർന്ന ഗുണനിലവാരം ഉറപ്പാക്കാനും തൊഴിൽപരമായ ആവശ്യങ്ങൾ കൃത്യമായി നിറവേറ്റാനും സാധിക്കുമെന്ന് അവർ വ്യക്തമാക്കി.

വിദ്യാഭ്യാസ രംഗത്തെ അധ്യാപന രീതികൾ നവീകരിക്കുന്നതിനും, അധ്യാപകരുടെ പ്രൊഫഷണൽ നിലവാരം ഉയർത്തുന്നതിനും, ഭാവി തലമുറയെ വാർത്തെടുക്കുന്ന ദേശീയ പ്രതിഭകളിൽ നിക്ഷേപം നടത്തുന്നതിനും ഈ പദ്ധതി വലിയ കരുത്താകുമെന്ന് മന്ത്രാലയം ചൂണ്ടിക്കാട്ടി. ബാലവിദ്യാഭ്യാസ മേഖലയിൽ പ്രാദേശികമായും അന്താരാഷ്ട്രതലത്തിലും ബഹ്‌റൈന്റെ സ്ഥാനം കൂടുതൽ ഉറപ്പിക്കുന്നതിനായുള്ള രാജ്യത്തിന്റെ പ്രതിബദ്ധതയാണ് ഈ പുതിയ സംരംഭത്തിലൂടെ വ്യക്തമാകുന്നത്.