പശ്ചിമേഷ്യൻ സംഘർഷം: ജിസിസി ടൂറിസം മന്ത്രിമാരുടെ അടിയന്തര യോഗം ചേർന്നു

പ്രദീപ് പുറവങ്കര I ബഹ്റൈൻ

മേഖലയിലെ നിലവിലെ സുരക്ഷാ വെല്ലുവിളികളും രാഷ്ട്രീയ സാഹചര്യങ്ങളും ടൂറിസം മേഖലയിലുണ്ടാക്കുന്ന ആഘാതം വിലയിരുത്തുന്നതിനായി ജിസിസി ടൂറിസം മന്ത്രിമാരുടെ അടിയന്തര യോഗം ചേർന്നു. ജിസിസിയുടെ 46-ാമത് സെഷന്റെ അധ്യക്ഷ രാജ്യമെന്ന നിലയിൽ ബഹ്‌റൈന്റെ നേതൃത്വത്തിൽ വീഡിയോ കോൺഫറൻസ് വഴിയാണ് യോഗം സംഘടിപ്പിച്ചത്. ബഹ്‌റൈൻ ടൂറിസം മന്ത്രി ഫാത്തിമ ബിൻത് ജാഫർ അൽ സൈറാഫി യോഗത്തിൽ അധ്യക്ഷത വഹിച്ചു. മേഖലയിലെ സുസ്ഥിരതയെ ബാധിക്കുന്ന സമീപകാല ആക്രമണങ്ങൾ ടൂറിസം രംഗത്തുണ്ടാക്കിയേക്കാവുന്ന പ്രത്യാഘാതങ്ങളെക്കുറിച്ച് ജിസിസി രാജ്യങ്ങളിലെ ടൂറിസം ചുമതലയുള്ള മന്ത്രിമാർ യോഗത്തിൽ വിശദമായി ചർച്ച ചെയ്തു.

ജിസിസി രാജ്യങ്ങൾക്കിടയിലുള്ള ശക്തമായ സാഹോദര്യ ബന്ധത്തിന്റെയും തുടർച്ചയായ ഏകോപനത്തിന്റെയും പ്രതിഫലനമാണ് ഈ അടിയന്തര യോഗമെന്ന് മന്ത്രി ഫാത്തിമ അൽ സൈറാഫി അഭിപ്രായപ്പെട്ടു. പുതിയ വെല്ലുവിളികളെ സംയുക്തമായി നേരിടാനുള്ള ഗൾഫ് കൂട്ടായ്മയുടെ താൽപ്പര്യമാണ് ഈ സെഷനിലൂടെ വ്യക്തമാകുന്നതെന്നും അവർ കൂട്ടിച്ചേർത്തു. പ്രതിസന്ധികളെ ഫലപ്രദമായി നേരിടാൻ ജിസിസി രാജ്യങ്ങൾക്കുള്ള കഴിവ് ഇതിനോടകം തെളിയിക്കപ്പെട്ടതാണെന്നും, രാജ്യങ്ങൾ തമ്മിലുള്ള ആഴത്തിലുള്ള സഹകരണവും സംയോജിത നീക്കങ്ങളും സുപ്രധാന മേഖലകളുടെ സുസ്ഥിരത ഉറപ്പാക്കാൻ സഹായിച്ചിട്ടുണ്ടെന്നും ജിസിസി സെക്രട്ടറി ജനറൽ ജാസിം മുഹമ്മദ് അൽ ബുദൈവി വ്യക്തമാക്കി.

നിലവിലെ സംഭവവികാസങ്ങൾ വിനോദസഞ്ചാരികളുടെ ഒഴുക്കിനെ എങ്ങനെ ബാധിക്കുന്നു എന്നതും, ഈ മേഖലയുടെ പ്രതിരോധശേഷിയും സുസ്ഥിരതയും വർദ്ധിപ്പിക്കാനുള്ള മാർഗങ്ങളും യോഗം വിലയിരുത്തി. ടൂറിസം രംഗത്തെ ചലനാത്മകത നിലനിർത്തുന്നതിനായി സ്വീകരിക്കേണ്ട സംയുക്ത സംവിധാനങ്ങളെക്കുറിച്ചും മന്ത്രിമാർ ചർച്ച ചെയ്തു. പ്രതിസന്ധികൾക്കിടയിലും ടൂറിസം മേഖലയുടെ സുരക്ഷയും വളർച്ചയും ഉറപ്പാക്കാനുള്ള കർമ്മപദ്ധതികളുമായി മുന്നോട്ട് പോകാനാണ് യോഗത്തിലെ പൊതുവായ തീരുമാനം.