ബഹ്‌റൈനിൽ പാസ്‌പോർട്ട്, വിസ ഫാസ്റ്റ് ട്രാക്ക് സേവനങ്ങൾ ഇനി എല്ലാ സെന്ററുകളിലും ഓൺലൈനിലും ലഭ്യമാകും

പ്രദീപ് പുറവങ്കര

ബഹ്‌റൈനിൽ നാഷണാലിറ്റി, പാസ്‌പോർട്ട്, റെസിഡൻസ് (NPRA) എന്നിവയുമായി ബന്ധപ്പെട്ട അടിയന്തര ഫാസ്റ്റ് ട്രാക്ക് സേവനങ്ങൾ ഇനി മുതൽ എല്ലാ സർവീസ് സെന്ററുകൾ വഴിയും ഓൺലൈൻ പ്ലാറ്റ്‌ഫോമുകൾ വഴിയും ലഭ്യമാകും. പൊതുജനങ്ങൾക്ക് അടിയന്തര സർക്കാർ സേവനങ്ങൾ കൂടുതൽ വേഗത്തിലും എളുപ്പത്തിലും ലഭ്യമാക്കുക എന്ന ലക്ഷ്യത്തോടെയാണ് പുതിയ തീരുമാനം പുറപ്പെടുവിച്ചിരിക്കുന്നത്.
ആഭ്യന്തര മന്ത്രി ജനറൽ ഷെയ്ഖ് റാഷിദ് ബിൻ അബ്ദുള്ള അൽ ഖലീഫ പുറപ്പെടുവിച്ച 2026-ലെ 60-ാം നമ്പർ തീരുമാനപ്രകാരമാണ് ഈ സുപ്രധാന പരിഷ്‌കാരം നടപ്പിലാക്കിയത്. ജനറൽ ഡയറക്ടറേറ്റ് ഓഫ് നാഷണാലിറ്റി, പാസ്‌പോർട്ട് ആൻഡ് റെസിഡൻസ് നൽകുന്ന സേവനങ്ങളുടെ ഫീസ് ഘടനയുമായി ബന്ധപ്പെട്ട 2014-ലെ 196-ാം നമ്പർ തീരുമാനത്തിലെ 68-ാം വകുപ്പിലാണ് പുതിയ ഭേദഗതി വരുത്തിയിട്ടുള്ളത്. അടിയന്തര സേവനങ്ങൾ ആവശ്യമുള്ള അപേക്ഷകർക്ക് ഓരോ ഇടപാടിനും 10 ബഹ്‌റൈനി ദിനാർ (BD 10) അധിക ഫീസ് നൽകി വേഗത്തിലുള്ള ഈ സേവനം തുടർന്നും പ്രയോജനപ്പെടുത്താവുന്നതാണ്.

മുൻപ്, 2022-ലെ ഭേദഗതി പ്രകാരം ഈ ഫാസ്റ്റ് ട്രാക്ക് സേവനം പ്രധാന ആസ്ഥാനത്തുള്ള സർവീസ് സെന്ററിൽ മാത്രമായി പരിമിതപ്പെടുത്തിയിരുന്നു. എന്നാൽ പുതിയ തീരുമാനത്തിലൂടെ പഴയ ഫീസ് നിരക്ക് തന്നെ നിലനിർത്തിക്കൊണ്ട് സേവനം എല്ലാ സെന്ററുകളിലേക്കും ഡിജിറ്റൽ ചാനലുകളിലേക്കും വ്യാപിപ്പിക്കുകയായിരുന്നു.

നാഷണാലിറ്റി, പാസ്‌പോർട്ട്, റെസിഡൻസ് അഫയേഴ്‌സ് അണ്ടർസെക്രട്ടറി സമർപ്പിച്ച നിർദ്ദേശത്തിന് കാബിനറ്റ് അംഗീകാരം നൽകിയതിനെത്തുടർന്നാണ് പുതിയ ഉത്തരവ് പുറത്തിറങ്ങിയത്. ഔദ്യോഗിക ഗസറ്റിൽ പ്രസിദ്ധീകരിക്കുന്നതിന്റെ തൊട്ടടുത്ത ദിവസം മുതൽ ഈ തീരുമാനം പ്രാബല്യത്തിൽ വരും. പുതിയ പരിഷ്കാരം കൃത്യമായി നടപ്പിലാക്കാൻ നാഷണാലിറ്റി, പാസ്‌പോർട്ട്, റെസിഡൻസ് അഫയേഴ്‌സ് അണ്ടർസെക്രട്ടറിയെ ചുമതലപ്പെടുത്തിയിട്ടുണ്ട്.