ബഹ്‌റൈൻ പ്രതിഭ മുഹറഖ് മേഖലാ സമ്മേളനം; പ്രവാസി പ്രശ്നങ്ങൾക്ക് പരിഹാരം കാണണമെന്ന് പ്രമേയം

പ്രദീപ് പുറവങ്കര

മനാമ l ബഹ്റൈൻ പ്രതിഭയുടെ മുപ്പതാമത് കേന്ദ്ര സമ്മേളനത്തിന് മുന്നോടിയായി മുഹറഖ് മേഖല സമ്മേളനം 2025 ഒക്ടോബർ 10 ന് സീതാറാം യെച്ചൂരി നഗറിൽ നടന്നു. പ്രവാസികളുമായി ബന്ധപ്പെട്ട പ്രധാന വിഷയങ്ങളിൽ അടിയന്തര ശ്രദ്ധ ആവശ്യപ്പെട്ടുകൊണ്ടുള്ള പ്രമേയങ്ങൾ സമ്മേളനം അംഗീകരിച്ചു. രാജ്യസഭ എം.പി. ഡോ. ജോൺ ബ്രിട്ടാസ് സമ്മേളനം ഉദ്ഘാടനം ചെയ്തു. പ്രവാസികളുടെ മനസ്സ് എക്കാലവും സ്വന്തം നാട്ടിലാണെന്നും, കേരളത്തിന് വേണ്ടി വലിയ സംഭാവനകൾ നൽകിയവരാണ് പ്രവാസി സമൂഹമെന്നും അദ്ദേഹം ചൂണ്ടിക്കാട്ടി. കേരളം ഭരിക്കുന്ന ഇടതു സർക്കാർ പ്രവാസികൾക്കൊപ്പമാണ് നിലകൊള്ളുന്നതെന്നും അദ്ദേഹം വ്യക്തമാക്കി.

ഇന്ത്യയിലെ നിലവിലെ രാഷ്ട്രീയ സാഹചര്യത്തിൽ ചരിത്രസത്യങ്ങളെ വളച്ചൊടിച്ച് വർഗീയത വളർത്തുന്ന ബിജെപി സർക്കാർ ഭരണഘടനയുടെ അന്തസ്സത്ത ഇല്ലാതാക്കുകയാണെന്ന് ജോൺ ബ്രിട്ടാസ് ആരോപിച്ചു. രാജ്യത്തിന്റെ അഖണ്ഡതയും ഭരണഘടനയും സംരക്ഷിക്കാൻ മുഴുവൻ മനുഷ്യരും ഒന്നിച്ചു നിൽക്കേണ്ട കാലമാണിതെന്നും അദ്ദേഹം ആഹ്വാനം ചെയ്തു.

പ്രവാസി സംബന്ധിയായ നിരവധി ആവശ്യങ്ങൾക്ക് പരിഹാരം കാണണമെന്ന് സമ്മേളനം പ്രമേയത്തിലൂടെ അഭ്യർത്ഥിച്ചു. പാസ്‌പോർട്ട് പുതുക്കി ലഭിക്കുന്നതിനുള്ള കാലതാമസം ഒഴിവാക്കണം, എയർ ഇന്ത്യ വിമാന സർവീസുകളുടെ കുറവ് പരിഹരിക്കണം, നോർക്ക കെയർ ഇൻഷുറൻസ്: നോർക്ക കെയർ ഇൻഷുറൻസ് പദ്ധതിയിൽ ചേരുന്നതിനുള്ള സമയപരിധി നീട്ടി നൽകണം എന്നീ പ്രമേയങ്ങളാണ് അവതരിപ്പിച്ചത്.

സ്വരലയ ഗായകരുടെ സ്വാഗത ഗാനത്തോടെ ആരംഭിച്ച സമ്മേളന നടപടികൾക്ക് സജീവൻ മാക്കണ്ടി താൽക്കാലിക അധ്യക്ഷത വഹിച്ചു. സ്വാഗത സംഘം കൺവീനർ ഗിരീഷ് കല്ലേരി സ്വാഗതം ആശംസിച്ചു. മേഖല സെക്രട്ടറി ബിനു കരുണാകരൻ രണ്ടു വർഷത്തെ പ്രവർത്തന റിപ്പോർട്ടും, പ്രതിഭ ജനറൽ സെക്രട്ടറി മിജോഷ് മൊറാഴ സംഘടനാ റിപ്പോർട്ടും അവതരിപ്പിച്ചു. പി. ശ്രീജിത്ത്‌, എൻ വി ലിവിൻ കുമാർ, ഷംജിത് കോട്ടപ്പള്ളി എന്നിവർ സമ്മേളനത്തെ അഭിവാദ്യം ചെയ്ത് സംസാരിച്ചു.

2025 - 2027 പ്രവർത്തന കാലയളവിലേക്കുള്ള പത്തൊൻപതംഗ എക്സിക്യൂട്ടീവ് അംഗങ്ങളെ സമ്മേളനം തിരഞ്ഞെടുത്തു. സജീവൻ മാക്കണ്ടി പ്രസിഡന്റായും അനിൽ സി. കെ സെക്രട്ടറിയായും തിരഞ്ഞെടുക്കപ്പെട്ടു.