പാൻമസാലയുടെ പരസ്യ പ്രചാരണത്തിൽനിന്നു അമിതാഭ് ബച്ചൻ പിന്മാറി
മുംബൈ: പാൻമസാലയുടെ പരസ്യ പ്രചാരണത്തിൽനിന്നു വിട്ടുനിന്ന് മെഗാസ്റ്റാർ അമിതാഭ് ബച്ചൻ. പ്രചാരണത്തിനുവേണ്ടി വാങ്ങിയ പണം ബച്ചൻ തിരിച്ചുനൽകി. പാൻമസാല പരസ്യത്തിൽ ബച്ചൻ എത്തുന്നതിനെതിരേ ഫാൻസ് അസോസിയേഷനുകൾ ഉൾപ്പെടെയുള്ളവർ നേരിട്ട് പ്രതിഷേധം അറിയിച്ചിരുന്നു. ഞായറാഴ്ച രാത്രി അമിതാഭ് ബച്ചന്‍റെ ഓഫീസിൽനിന്നുള്ള ബ്ലോഗ് പോസ്റ്റിലാണ് ഈ വിവരമുള്ളത്. കഴിഞ്ഞയാഴ്ച പാൻമസാല കന്പനി അധികൃതരെ ഇക്കാര്യം ബച്ചൻ അറിയിച്ചിരുന്നു.
പാൻമസാലകളുടെ പരസ്യത്തിൽനിന്ന് പിന്മാറണമെന്നും പുകയില വിരുദ്ധ പ്രചാരണത്തിനു പിന്തുണ നൽകണമെന്നും നാഷണൽ ഓർഗനൈസേഷൻ ഫോർ ടുബാക്കോ ഇറാഡിക്കേഷൻ(എൻഒടിഇ) എന്ന സംഘടനയുടെ ഭാരവാഹികൾ ബച്ചനോട് ആവശ്യപ്പെട്ടിരുന്നു.
