ബഹ്റൈനിൽ ഇന്ന് മഴയ്ക്ക് സാധ്യത; രാത്രിയോടെ കാലാവസ്ഥ ശാന്തമാകും
പ്രദീപ് പുറവങ്കര I ബഹ്റൈൻ
മനാമ: ബഹ്റൈനിൽ ഇന്ന് ഭാഗികമായി മേഘാവൃതമായ കാലാവസ്ഥയായിരിക്കുമെന്നും ചിലയിടങ്ങളിൽ ചിതറിയ മഴയ്ക്ക് സാധ്യതയുണ്ടെന്നും ഗതാഗത വാർത്താവിനിമയ മന്ത്രാലയത്തിന് കീഴിലുള്ള കാലാവസ്ഥാ നിരീക്ഷണ കേന്ദ്രം അറിയിച്ചു. പകൽ സമയത്ത് നേരിയ മഴ പ്രതീക്ഷിക്കാമെങ്കിലും വൈകുന്നേരത്തോടെ ആകാശം തെളിയുകയും കാലാവസ്ഥ മെച്ചപ്പെടുകയും ചെയ്യും.
വടക്കുപടിഞ്ഞാറൻ ദിശയിൽ നിന്ന് മണിക്കൂറിൽ 10 മുതൽ 15 നോട്ട് വരെ വേഗതയിൽ കാറ്റ് വീശാൻ സാധ്യതയുണ്ട്. ചില സമയങ്ങളിൽ ഇത് 17 മുതൽ 22 നോട്ട് വരെയാകാം. എന്നാൽ രാത്രിയോടെ കാറ്റിന്റെ വേഗത കുറഞ്ഞ് 5 മുതൽ 10 നോട്ട് വരെയാകും. തീരപ്രദേശങ്ങളിൽ തിരമാലകൾ 1 മുതൽ 2 അടി വരെയും, ഉൾക്കടലിൽ 3 മുതൽ 5 അടി വരെയും ഉയരാൻ സാധ്യതയുണ്ട്.
ഇന്നത്തെ പരമാവധി താപനില 27°C ഉം കുറഞ്ഞ താപനില 20°C ഉം ആയിരിക്കും. അന്തരീക്ഷത്തിൽ ഈർപ്പത്തിന്റെ അളവ് പരമാവധി 75% വരെയും കുറഞ്ഞത് 30% വരെയും രേഖപ്പെടുത്താൻ സാധ്യതയുണ്ടെന്നും കാലാവസ്ഥാ റിപ്പോർട്ട് വ്യക്തമാക്കുന്നു.
tyy
