ഇസ്രായേൽ-ഇറാൻ യുദ്ധം: ആഗോള ചരക്കുനീക്കം സ്തംഭിക്കുന്നു

ശാരിക / ബിസിനസ്

ദുബായ്/പാരീസ്: പശ്ചിമേഷ്യയിൽ അമേരിക്കയും ഇസ്രായേലും ഇറാനെതിരെ നടത്തുന്ന സൈനിക നീക്കങ്ങളും ഇറാന്റെ തിരിച്ചടിയും ആഗോള ചരക്കുനീക്കത്തെ താറുമാറാക്കി. ലോകത്തെ ഏറ്റവും പ്രധാനപ്പെട്ട ജലപാതകളിലൊന്നായ ഹോർമുസ് കടലിടുക്ക് യുദ്ധത്തെത്തുടർന്ന് ഭാഗികമായി അടഞ്ഞതോടെ എണ്ണ വിപണിക്ക് പുറമെ വളം, പ്ലാസ്റ്റിക്, ഭക്ഷ്യ സുരക്ഷാ മേഖലകളിലും കടുത്ത പ്രത്യാഘാതങ്ങൾ പ്രകടമായിത്തുടങ്ങി.

ലോകത്ത് ഉത്പാദിപ്പിക്കപ്പെടുന്ന വളത്തിന്റെ 33 ശതമാനവും ഹോർമുസ് കടലിടുക്ക് വഴിയാണ് കയറ്റി അയക്കുന്നത്. ഖത്തർ, സൗദി അറേബ്യ, യുഎഇ എന്നിവിടങ്ങളിൽ നിന്നുള്ള സൾഫർ, അമോണിയ തുടങ്ങിയ വളങ്ങൾ ഇന്ത്യ, ചൈന, ബ്രസീൽ, ആഫ്രിക്കൻ രാജ്യങ്ങൾ എന്നിവിടങ്ങളിലേക്കാണ് പ്രധാനമായും പോകുന്നത്. ഗൾഫ് വഴിയുള്ള ഈ പാതയ്ക്ക് പകരം വെക്കാൻ മറ്റ് മാർഗ്ഗങ്ങളില്ലാത്തത് പ്രതിസന്ധി രൂക്ഷമാക്കുന്നു. എണ്ണവില വർധിക്കുന്നതോടെ വളം ഉത്പാദന ചെലവ് ഉയരുന്നത് ആഗോള കാർഷിക മേഖലയെയും ബാധിച്ചേക്കാം.

ലോകത്തെ മൊത്തം പ്ലാസ്റ്റിക് ഉത്പാദനത്തിന്റെ 15 ശതമാനവും നടക്കുന്നത് യുഎഇ കേന്ദ്രീകരിച്ചുള്ള പോളിമർ കയറ്റുമതി ഹബ്ബുകളിലാണ്. യുദ്ധം ഈ മേഖലയെയും സാരമായി ബാധിച്ചിട്ടുണ്ട്. യുഎഇയിലെ ജബൽ അലി തുറമുഖത്തുണ്ടായ തീപിടുത്തവും കുവൈറ്റിലെ തുറമുഖ സൗകര്യങ്ങൾ താൽക്കാലികമായി നിർത്തിവെച്ചതും പ്ലാസ്റ്റിക് അസംസ്‌കൃത വസ്തുക്കളുടെ നീക്കത്തെ തടസ്സപ്പെടുത്തി.

സുരക്ഷാ ഭീഷണിയെത്തുടർന്ന് പ്രമുഖ ഷിപ്പിംഗ് കമ്പനികളായ മാഴ്സ്ക് (Maersk), സി.എം.എ സി.ജി.എം (CMA CGM) എന്നിവ ഹോർമുസ് കടലിടുക്ക് വഴിയും സൂയസ് കനാൽ വഴിയുമുള്ള യാത്രകൾ താൽക്കാലികമായി നിർത്തിവെച്ചു. ഇതോടെ ഏഷ്യയിൽ നിന്നും മിഡിൽ ഈസ്റ്റിൽ നിന്നും യൂറോപ്പിലേക്കുള്ള കപ്പലുകൾ ആഫ്രിക്കൻ ഭൂഖണ്ഡം ചുറ്റി ആയിരക്കണക്കിന് കിലോമീറ്റർ അധികം സഞ്ചരിക്കേണ്ടി വരുന്നു. ഇത് ചരക്ക് കൂലി കുത്തനെ വർധിക്കാനും സാധനങ്ങളുടെ വിലക്കയറ്റത്തിനും കാരണമാകും. ഇൻഷുറൻസ് നിരക്കുകൾ കുത്തനെ ഉയർന്നതോടെ ഗൾഫ് മേഖലയിലൂടെയുള്ള കപ്പൽ യാത്ര പല കമ്പനികൾക്കും അസാധ്യമായിരിക്കുകയാണ്.

ഭക്ഷ്യ ഇറക്കുമതിയെ വലിയ തോതിൽ ആശ്രയിക്കുന്ന പശ്ചിമേഷ്യൻ രാജ്യങ്ങളിൽ കപ്പലുകൾ എത്തുന്നത് തടസ്സപ്പെടുന്നത് ഭക്ഷ്യക്ഷാമത്തിന് കാരണമായേക്കാം. നേരത്തെ സമാനമായ സംഘർഷങ്ങൾ ഉണ്ടായപ്പോൾ ഇന്ത്യയിൽ നിന്നുള്ള അരി ഉൾപ്പെടെയുള്ള ഭക്ഷ്യവസ്തുക്കൾ തുറമുഖങ്ങളിൽ കെട്ടിക്കിടന്ന സാഹചര്യം അധികൃതർ ചൂണ്ടിക്കാട്ടുന്നു. ഹോർമുസ് കടലിടുക്ക് വഴിയുള്ള ചരക്കുനീക്കം പൂർണ്ണമായും തടസ്സപ്പെട്ടാൽ അത് ലോകരാജ്യങ്ങളുടെ സാമ്പത്തിക അടിത്തറയെത്തന്നെ ബാധിക്കുമെന്നാണ് സാമ്പത്തിക വിദഗ്ധരുടെ മുന്നറിയിപ്പ്.