ഗോവ നിശാക്ലബ് ദുരന്തം; ലൂത്ര സഹോദരൻമാരുടെ മുൻകൂർ ജാമ്യാപേക്ഷ ഡൽഹി കോടതി തള്ളി
ശാരിക / ന്യൂഡൽഹി
ഗോവാ നിശാക്ലബ് തീപിടിത്തവുമായി ബന്ധപ്പെട്ട കേസിൽ ലൂത്ര സഹോദരൻമാരുടെ മുൻകൂർ ജാമ്യാപേക്ഷ തള്ളി ഡൽഹി കോടതി. രോഹിണി കോടതിയിലെ അഡീഷണൽ സെഷൻസ് ജഡ്ജി വന്ദനയാണ് ഇരുവർക്കും ജാമ്യം നിഷേധിച്ചുകൊണ്ട് ഉത്തരവ് പുറപ്പെടുവിച്ചത്.
തീപിടിത്തമുണ്ടായ "ബൈ റോമിയോ ലെയ്ൻ' എന്ന നിശാക്ലബ് ഉടമകളായ സൗരഭ് ലുത്രയും ഗൗരവ് ലുത്രയുമാണ് ജാമ്യം തേടി ഡൽഹി രോഹിണി കോടതിയെ സമീപിച്ചത്. ഇരുവരും നിലവിൽ തായ്ലാൻഡ് പോലീസിന്റെ കസ്റ്റഡിയിലാണ്.
ബൈ റോമിയോ ലെയ്ൻ ക്ലബിൽ തീപിടിച്ച് 25പേരാണ് മരിച്ചത്. സംഭവത്തിന് പിന്നാലെ ഇരുവരും രാജ്യംവിട്ടിരുന്നു. ഇവരെ പിടികൂടാന് ഇന്റർപോൾ ബ്ലൂ കോര്ണര് നോട്ടീസ് പുറപ്പെവിച്ചിരുന്നു. തായ്ലൻഡ് പോലീസ് അറസ്റ്റ് ചെയ്ത ഇവരെ ഉടന് ഇന്ത്യയിലേക്കയക്കും.
സംഭവത്തില് ഇനിയും പ്രതികളുണ്ടെന്നാണ് ഗോവ പൊലീസ് നൽകുന്ന വിവരം. നിശാക്ലബ് സ്ഥിതി ചെയ്യുന്ന ഭൂമിയുടെ ഉടമയായ ബ്രിട്ടീഷ് പൗരനെയും കേസില് പ്രതി ചേർത്തിട്ടുണ്ട്. സംഭവത്തിലെ സുരക്ഷാ വീഴ്ച്ചകളെകുറിച്ച് വിശദമായ ജുഡീഷ്യല് അന്വേഷണം പുരോഗമിക്കുകയാണ്.
ghfghf
