ഇറാൻ - ഇസ്രായേൽ യുദ്ധം: 47,000 അമേരിക്കക്കാർ മധ്യപൂർവ്വേഷ്യയിൽ നിന്ന് മടങ്ങി; ഒഴിപ്പിക്കൽ നടപടികൾ ഊർജ്ജിതമാക്കി യുഎസ്

പ്രദീപ് പുറവങ്കര

മധ്യപൂർവ്വേഷ്യയിലെ യുദ്ധസഹചര്യത്തെത്തുടർന്ന് ഏകദേശം 47,000 അമേരിക്കൻ പൗരന്മാർ ഇതുവരെ നാട്ടിലേക്ക് മടങ്ങിയതായി യുഎസ് സ്റ്റേറ്റ് ഡിപ്പാർട്ട്മെന്റ് അറിയിച്ചു. ഇന്നലെ പുറത്തിറക്കിയ വാർത്താക്കുറിപ്പിലാണ് ഔദ്യോഗിക പ്രതിനിധി ഇക്കാര്യം വ്യക്തമാക്കിയത്.

ഫെബ്രുവരി 28-ന് ഇറാനുനേരെ അമേരിക്കയും ഇസ്രായേലും നടത്തിയ ശക്തമായ ആക്രമണങ്ങൾക്ക് പിന്നാലെ മേഖലയിൽ കുടുങ്ങിയ പൗരന്മാരെ തിരിച്ചെത്തിക്കാൻ 50 പ്രത്യേക വിമാനങ്ങളാണ് സ്റ്റേറ്റ് ഡിപ്പാർട്ട്മെന്റ് സജ്ജമാക്കിയത്. തുടക്കത്തിൽ ആസൂത്രണത്തിൽ പിഴവുകൾ സംഭവിച്ചുവെന്ന വിമർശനം ഉയർന്ന പശ്ചാത്തലത്തിൽ, നിലവിൽ അതിവേഗത്തിലുള്ള നടപടികളാണ് മന്ത്രാലയം സ്വീകരിക്കുന്നത്.

തിരിച്ചുവരവിനായി പ്രത്യേകമായി രൂപീകരിച്ച 'ക്രൈസിസ് സെൽ' വഴി 32,000 പേർക്ക് നേരിട്ട് സഹായം നൽകാൻ കഴിഞ്ഞതായി മന്ത്രാലയം അറിയിച്ചു. ഇതിനായി പ്രത്യേക ചാർട്ടേഡ് വിമാനങ്ങളും വാണിജ്യ വിമാനങ്ങളും ഉപയോഗപ്പെടുത്തി. സാധാരണ നടപടിക്രമങ്ങളിൽ നിന്ന് വിഭിന്നമായി, ഇത്തവണ സ്റ്റേറ്റ് ഡിപ്പാർട്ട്മെന്റ് ഒരുക്കിയ വിമാനങ്ങളിൽ പൗരന്മാർക്ക് സൗജന്യമായാണ് യാത്ര അനുവദിച്ചത്. ഈ ഒഴിപ്പിക്കൽ ദൗത്യത്തിനായുള്ള ചിലവുകൾ മന്ത്രാലയത്തിന്റെ പ്രത്യേക അടിയന്തര ഫണ്ടിൽ നിന്നാണ് കണ്ടെത്തുന്നത്.

ലഭ്യമായ വിമാന സീറ്റുകളേക്കാൾ കുറവാണ് നിലവിലെ ഡിമാൻഡ് എന്ന് പേര് വെളിപ്പെടുത്താത്ത ഉദ്യോഗസ്ഥൻ പറഞ്ഞു. പലരും സ്വന്തം നിലയ്ക്കാണ് നാട്ടിലേക്ക് മടങ്ങാൻ താൽപ്പര്യപ്പെടുന്നത്. മേഖലയിൽ നിന്ന് സഹായം അഭ്യർത്ഥിച്ച മിക്കവാറും എല്ലാ അമേരിക്കൻ പൗരന്മാർക്കും യാത്രാ സൗകര്യങ്ങൾ വാഗ്ദാനം ചെയ്തിട്ടുണ്ടെന്ന് എഎഫ്പി (AFP) റിപ്പോർട്ട് ചെയ്തു. ഇറാനുനേരെയുള്ള ആക്രമണത്തിന് പിന്നാലെ, മധ്യപൂർവ്വേഷ്യയിലുള്ള തങ്ങളുടെ പൗരന്മാരോട് എത്രയും വേഗം രാജ്യം വിടാൻ പ്രസിഡന്റ് ഡൊണാൾഡ് ട്രംപിന്റെ ഭരണകൂടം നിർദ്ദേശിച്ചിരുന്നു.