‘സ്ത്രീശക്തി കുവൈറ്റ്’ വനിതകള്‍ക്കായി സൗജന്യ മെഡിക്കല്‍ക്യാമ്പ് സംഘടിപ്പിച്ചു
കുവൈറ്റ് സിറ്റി : ലോക വനിതാ ദിനത്തിന്റെ ഭാഗമായി ഭാരതീയ പ്രവാസി പരീക്ഷത്തിന്റെ വനിതാ വിഭാഗമായ ‘സ്ത്രീശക്തി കുവൈറ്റ്’ന്റെ ആഭിമുഖ്യത്തില്‍ സൗജന്യ മെഡിക്കല്‍ ക്യാമ്പ് സംഘടിപ്പിച്ചു. ഫഹാഹീല്‍ ഷിഫാ അല്‍ജസീറ ഹോസ്പിറ്റലിന്റെ സഹകരണത്തോടെ കുവൈറ്റിലെ വിവിധ ലേബര്‍ ക്യാമ്പുകളിലെ തൊഴിലാളികള്‍ക്കായി സംഘടിപ്പിച്ച മെഡിക്കല്‍ ക്യാമ്പ്് ഇന്ത്യന്‍ എംബസി സെക്കന്‍ഡ് സെക്രട്ടറി യശ്വന്‍ന്ത് ഭദ്രദീപം തെളിച്ച് ഉത്ഘാടനം ചെയ്തു.
യോഗത്തില്‍ മിസ്സിസ് യശ്വന്‍ന്ത്, സേവാ ദര്‍ശന്‍ ജനറല്‍ സെക്രട്ടറി പ്രവീണ്‍, സ്ത്രീശക്തി ജനറല്‍ സെക്രട്ടറി അഡ്വ. വിദ്യാസുമോദ്, ഷിഫാ അല്‍ ജസീറ ജനറല്‍ മാനേജര്‍ റിസ്വാന്‍ അബ്ദുള്‍ ഖാദര്‍ എന്നിവര്‍ സംസാരിച്ചു. ജനറല്‍ സെക്രട്ടറി നാരായണന്‍ ഒതയോത്ത് ക്യതജ്ഞത രേഖപ്പെടുത്തിയ യോഗത്തില്‍ കുവൈറ്റിലെ പ്രശസ്ത ഗൈനക്കോളജിസ്റ്റും സ്ത്രീശക്തി പ്രസിഡന്റുമായ ഡോക്ടര്‍ സരിത, സംഘടനാ സെക്രട്ടറി പി.വി വിജയരാഘവന്‍, പ്രസിഡന്റ് അഡ്വ: സുമോദ്, വൈസ് പ്രസിഡന്റ് ബിനോയ് സെബാസ്റ്റിയന്‍ എന്നിവര്‍ സന്നിഹിതരായിരുന്നു.
രാവിലെ 8 മണിക്ക് ആരംഭിച്ച ക്യാമ്പില്‍ കുവൈറ്റിന്റെ വിവിധ ഭാഗങ്ങളില്‍ നിന്നായി ഒട്ടേറെപ്പേര്‍ ഈ സേവനം ഉപയോഗപ്പെടുത്തി. ഇന്റേണല്‍ മെഡിസിന്‍, ഓര്‍ത്തോപിഡിക്‌സ്, ഡര്‍മറ്റോളജി, ഗൈനക്കോളജി, ഇ.എന്‍.ടി, ഒപ്താമോളജി തുടങ്ങിയ സ്‌പെഷ്യലൈസ്ഡ് ഡിപ്പാര്‍ട്ടുമെന്ററുകളിലെ പതിനഞ്ചോളം വിദഗ്ധഡോക്ടര്‍മാരുടെ സേവനവും എക്‌സറേ, സ്‌കാനിംഗ് തുടങ്ങിയ ആധുനിക സൗകര്യങ്ങളും ആശുപത്രി അധികൃതര്‍ ഒരുക്കിയിരുന്നു. വിവിധ ഏരിയാ സ്ത്രീശക്തി ഭാരവാഹികളും സെന്‍ട്രല്‍ കമ്മറ്റി അംഗങ്ങളും മെഡിക്കല്‍ ക്യാമ്പിന് നേതൃത്വം നല്‍കി.
