വിദ്യാർത്ഥികളുടെ പ്രണയ മാർച്ച് പോലീസ് തടഞ്ഞു
കൊച്ചി : പ്രണയ ദിനത്തിൽ എറണാകുളം ലോ കോളേജിലെ വിദ്യാർഥികൾ സംഘടിപ്പിച്ച പ്രണയ മാർച്ച് പോലീസ് തടഞ്ഞു. ലോ കോളേജിൽ നിന്നും വിദ്യാർത്ഥികൾ റോസാപ്പൂക്കളുമായി എറണാകുളം സെന്‍റ് തെരേസാസ് കോളേജിലേക്കാണ് മാർച്ച് നിശ്ചയിച്ചിരുന്നത്. എന്നാൽ മാർച്ചിനുള്ള ഒരുക്കങ്ങൾ ലോ കോളേജിൽ ആരംഭിച്ചപ്പോൾ തന്നെ പ്രിൻസിപ്പൽ പോലീസിന്‍റെ സഹായം തേടുകയായിരുന്നു. കോളേജിൽ അദ്ധ്യയനം തടസപ്പെടുന്നുവെന്ന് അറിയിച്ചാണ് പ്രിൻസിപ്പൽ പോലീസിനെ വിളിച്ചുവരുത്തിയത്. പോലീസ് എത്തിയ വിദ്യാർത്ഥികളെ ലോ കോളേജിൽ നിന്നും പുറത്തിറങ്ങുന്നത് തടഞ്ഞതോടെ് നേരിയ സംഘർഷം ഉടലെടുത്തു. കോളജിന് പുറത്തേക്ക് മാർച്ച് അനുവദിക്കില്ലെന്ന് പോലീസ് കർശന നിലപാടെടുത്തു. പോലീസിനെതിരെ മുദ്രാവാക്യം വിളിച്ച് വിദ്യാർത്ഥികളും പ്രതിഷേധിച്ചെങ്കിലും കൂടുതൽ അനിഷ്ട സംഭവങ്ങൾ ഉണ്ടായില്ല.
അതിനിടെ സംഭവം ചിത്രീകരിക്കാനെത്തിയ ഫ്രാൻസിൽ നിന്നുള്ള മാധ്യമ സംഘത്തെ പോലീസ് കസ്റ്റഡിയിലെടുത്തു. ഇവരുടെ കയ്യിൽ പാസ്പോർട്ട് ഉണ്ടായിരുന്നില്ല. രേഖകൾ പരിശോധിച്ച ശേഷം ഇവരെ വിടുമെന്ന് പോലീസ് അറിയിച്ചു.
