സിപിഎം വിപുലീകൃത ജില്ലാ കമ്മിറ്റി യോഗങ്ങൾക്ക് തുടക്കം: നേതൃമാറ്റവും തോൽവിയും ചർച്ചയാകും

ഷീബ വിജയൻ

തെരഞ്ഞെടുപ്പ് തോൽവിയെത്തുടർന്ന് തെറ്റ് തിരുത്തൽ പ്രക്രിയയുടെ ഭാഗമായി സിപിഎമ്മിന്റെ തിരുവനന്തപുരം, എറണാകുളം, തൃശൂർ ജില്ലകളിലെ വിപുലീകൃത ജില്ലാ കമ്മിറ്റി യോഗങ്ങൾക്ക് ഇന്ന് തുടക്കമാകും. തിരുവനന്തപുരത്ത് ജില്ലാ സെക്രട്ടറി മാറണമെന്ന നിർദേശം യോഗത്തിൽ ഉയർന്നേക്കും. കോവളത്ത് ചേരുന്ന വിശാല ജില്ലാ കമ്മിറ്റി യോഗത്തിൽ പ്രതിപക്ഷ നേതാവ് പിണറായി വിജയൻ ഉൾപ്പെടെ പങ്കെടുക്കും. എംഎൽഎ കൂടിയായതിനാൽ ജില്ലാ സെക്രട്ടറി സ്ഥാനത്ത് നിന്ന് വി ജോയിയെ മാറ്റണമെന്നാകും ഒരു വിഭാഗം സമ്മേളനത്തിൽ ആവശ്യപ്പെടുക.

ഇരട്ട പദവികൾ അനുവദിക്കേണ്ട എന്ന വിശാല സംസ്ഥാന കമ്മിറ്റിയിലെ നിർദേശം ഇവർ ചൂണ്ടിക്കാട്ടും. എംഎൽഎ തിരക്കുകൾക്കിടയിൽ പാർട്ടി കാര്യങ്ങളിൽ ശ്രദ്ധിക്കാൻ ജോയിക്ക് കഴിയുന്നില്ലെന്ന വിമർശനം കീഴ്ഘടകങ്ങളിൽ നിന്നുതന്നെ ഉയർന്നിരുന്നു. ജില്ലാ സെക്രട്ടറി സ്ഥാനത്തുനിന്ന് വി ജോയി മാറിയാൽ കെ എസ് സുനിൽകുമാർ, ഡി കെ മുരളി എന്നിവരുടെ പേരുകൾ പരിഗണിച്ചേക്കും. വി ജോയിക്കെതിരായ വ്യക്തിപരവും സംഘടനാപരവുമായ വിമർശനം ശക്തമാണ്. അതേസമയം സംസ്ഥാന നേതൃത്വത്തിന് അഭിമതനായ ജോയി തന്നെ ജില്ലാ സെക്രട്ടറിയായി തുടരുമെന്നും അഭ്യൂഹമുണ്ട്. ജില്ലാ സെക്രട്ടറി മാറിയില്ലെങ്കിലും, ജില്ലാ സെക്രട്ടറിയേറ്റിൽ കാര്യമായ അഴിച്ചു പണി ഉണ്ടായേക്കുമെന്ന് റിപ്പോർട്ടുകളുണ്ട്.

എറണാകുളം ജില്ലാ കമ്മിറ്റിയുടെ വിപുലീകൃത യോഗം ഇന്നും നാളെയുമായി തൃപ്പൂണിത്തുറയിൽ നടക്കും. പോളിറ്റ് ബ്യൂറോ അംഗം എ വിജയരാഘവൻ ഉദ്ഘാടനം ചെയ്യും. സംസ്ഥാന കമ്മിറ്റിയിൽ ഉയർന്നതിന് സമാനമായ വിമർശനങ്ങൾ എറണാകുളത്തും ഉയർന്നേക്കും. കോതമംഗലം, തൃക്കാക്കര, പെരുമ്പാവൂർ ഏരിയ കമ്മിറ്റികളിൽ നിന്നായിരിക്കും കൂടുതൽ വിമർശനങ്ങളുണ്ടാവുക. സ്ഥാനാർത്ഥിയുമായി ബന്ധപ്പെട്ട വിഷയവും ഉയർന്നേക്കുമെന്നാണ് സൂചന. ജില്ലാ കമ്മിറ്റിയിലേക്കും ജില്ലാ സെക്രട്ടറിയേറ്റിലേക്കും പുതുമുഖങ്ങൾ വരും.

തൃശൂരിലും സിപിഎം വിപുലീകൃത ജില്ലാ കമ്മിറ്റി യോഗം ഇന്നും നാളെയുമായി നടക്കും. തൃശൂർ നളിനം ഓഡിറ്റോറിയത്തിലാണ് സമ്മേളനം നടക്കുക. സിപിഎം സംസ്ഥാന സെക്രട്ടറി എം വി ഗോവിന്ദൻ ഉദ്ഘാടനം ചെയ്യും. കെ രാധാകൃഷ്ണൻ, ടിപി രാമകൃഷ്ണൻ, കെഎൻ ബാലഗോപാൽ, പി എ മുഹമ്മദ് റിയാസ്, എംബി രാജേഷ് തുടങ്ങിയവർ സംബന്ധിക്കും. സംസ്ഥാന കമ്മിറ്റിക്ക് സമാനമായ വിമർശനങ്ങൾ തൃശൂരിലും ഉയർന്നേക്കും. കരുവന്നൂർ തട്ടിപ്പ് അടക്കം ചർച്ചയായേക്കും. ജില്ലാ കമ്മിറ്റിയിൽ അഴിച്ചുപണിക്കും സാധ്യതയുണ്ട്.