കേരളത്തിൽ മൂന്നുദിവസം പിന്നിട്ട, രോഗലക്ഷണമില്ലാത്തവരുടെ പേര് കോവിഡ് ജാഗ്രതാ പോർട്ടലിൽനിന്ന് ഒഴിവാക്കുന്നു
കോവിഡ് സ്ഥിരീകരിച്ച് മൂന്നുദിവസം പിന്നിട്ട, ലക്ഷണങ്ങളൊന്നും ഇല്ലാത്തവരെ രോഗികളുടെ പട്ടികയിൽനിന്ന് ഒഴിവാക്കുന്നു. എന്നാൽ, ഇവർക്ക് ഏഴുദിവസത്തെ സമ്പർക്കവിലക്ക് നിർബന്ധമാണ്. ആരോഗ്യവകുപ്പ് ഉന്നതതലയോഗത്തിൽ നൽകിയ നിർദേശം ജില്ലാ മെഡിക്കൽ ഓഫീസർമാർ നടപ്പാക്കിത്തുടങ്ങി. പ്രാഥമികാരോഗ്യകേന്ദ്രങ്ങൾവരെ വാക്കാലാണ് ഡി.എം.ഒ.മാർ ഈ നിർദേശം നൽകിയിട്ടുള്ളത്. മൂന്നുദിവസം പിന്നിട്ട രോഗലക്ഷണമില്ലാത്തവരുടെ പേർ കോവിഡ് ജാഗ്രതാ പോർട്ടലിൽനിന്ന് ഒഴിവാക്കാനാണ് നിർദേശം. ഇത് നടപ്പാക്കിത്തുടങ്ങിയതോടെ സംസ്ഥാനത്തെ കോവിഡ് സജീവ കേസുകളുടെ എണ്ണം കുത്തനെ കുറഞ്ഞിട്ടുണ്ട്. ചില പഞ്ചായത്തുകളിൽ സജീവ കേസുകൾ മൂന്നിലൊന്നായി കുറഞ്ഞു. സംസ്ഥാനത്താകെ സജീവ കേസുകളുടെ എണ്ണത്തിൽ 1.20 ലക്ഷത്തിന്റെ കുറവുണ്ട്.
ഫെബ്രുവരി ഏഴിന് 3,01,654 സജീവ കേസുകൾ ഉണ്ടായിരുന്നത് 12−ന് 1,81,993 ആയി കുറഞ്ഞു. 60 വയസ്സിൽ കൂടുതലുള്ള, രോഗലക്ഷണമുള്ള കോവിഡ് ബാധിതരെയെല്ലാം ആശുപത്രികളിലേക്ക് മാറ്റണമെന്നും ആരോഗ്യവകുപ്പ് നിർദേശിച്ചിട്ടുണ്ട്. പ്രമേഹം, രക്തസമ്മർദം, വൃക്കരോഗം എന്നിവയുള്ളവരെയും ആശുപത്രികളിൽ പ്രവേശിപ്പിക്കണം. ലക്ഷണങ്ങളിൽ ചെറിയ ആശ്വാസം ഉണ്ടാകുന്നതുവരെ ഇവരെ ആശുപത്രികളിൽനിന്ന് മാറ്റരുതെന്നാണ് നിർദേശം. സ്റ്റിറോയ്ഡ് മരുന്നുകൾ കഴിക്കുന്നവർ, കീമോതെറാപ്പി ചെയ്യുന്നവർ, അവയവമാറ്റ ശസ്ത്രക്രിയയ്ക്ക് വിധേയരായവർ, ഡയാലിസിസ് രോഗികൾ എന്നിവരെയും പ്രായം നോക്കാതെ ആശുപത്രികളിലേക്ക് മാറ്റണം. ഇപ്പോൾ റിപ്പോർട്ട് ചെയ്യപ്പെടുന്ന കോവിഡ് മരണങ്ങളിൽ 80 ശതമാനത്തിലേറെയും പ്രായമായവരും അനുബന്ധരോഗങ്ങൾ ഉള്ളവരുമായതാണ് ഈ നിർദേശം നൽകാൻ കാരണം.
