ബഹ്റൈനിൽ ഒരു കോവിഡ് മരണം കൂടി രേഖപ്പെടുത്തി
ഏറെ കാലത്തിന്റെ ഇടവേളയ്ക്ക് ശേഷം ബഹ്റൈനിൽ ഒരു കോവിഡ് മരണം കൂടി രേഖപ്പെടുത്തി. ഗുരുതരാവസ്ഥയിൽ കഴിഞ്ഞിരുന്ന രോഗിയാണ് മരണപ്പെട്ടത്. ഇതോടെ ആകെ കോവിഡ് മരണം 1395 ആയി. അതേ സമയം ആകെ കോവിഡ് ബാധിതരുടെ എണ്ണം ബഹ്റൈനിൽ നാലായിരം കവിഞ്ഞു. ഇന്നലെ 190 വിദേശികൾ ഉൾപ്പടെ 667 പേർക്ക് കൂടി കോവിഡ് സ്ഥിരീകരിച്ചതോടെ ആകെ രോഗികളുടെ എണ്ണം 4269 ആയി ഉയർന്നു. ഇതിൽ 380എണ്ണം സമ്പർക്കത്തിലൂടെയും, 97 എണ്ണം യാത്രസംബന്ധമായുമാണ് രേഖപ്പെടുത്തിയത്. ആരുടെയും നില ഗുരുതരമല്ല. ഇന്നലെ 20511 പേരിലാണ് പരിശോധനകൾ നടത്തിയത്. 3 ദശാംശം 25 ശതമാനമാണ് ടെസ്റ്റ് പൊസിറ്റിവിറ്റി നിരക്ക്. ഇന്നലെ 179 പേർ കൂടി രോഗമുക്തി നേടിയതോടെ ആകെ രോഗമുക്തി നേടിയവരുടെ എണ്ണം 2,77,680 ആയി. ഇതുവരെയായി 12,03,782 പേർ ഒരു ഡോസ് വാക്സിൻ സ്വീകരിച്ചിട്ടുണ്ട്. ഇതിൽ 11,78,914 പേർ രണ്ട് ഡോസ് വാക്സിൻ സ്വീകരിച്ചവരാണ്. ഇതുവരെയായി 8,51,737 പേരാണ് ബൂസ്റ്റർ ഡോസ് സ്വീകരിച്ചിരിക്കുന്നത്.
