ജിസിസി ഏകീകൃത സൈനിക കമാൻഡിന്റെ ആസ്ഥാനം കുവൈറ്റിൽ സ്ഥാപിക്കാൻ അനുമതി; പ്രതിരോധ മന്ത്രിമാരുടെ യോഗം ബഹ്റൈനിൽ ചേർന്നു
പ്രദീപ് പുറവങ്കര
മനാമ: ഗൾഫ് സഹകരണ കൗൺസിൽ (ജിസിസി) രാജ്യങ്ങളുടെ ഏകീകൃത സൈനിക കമാൻഡിന്റെ അത്യാധുനിക ആസ്ഥാനം കുവൈറ്റിൽ സ്ഥാപിക്കാൻ അംഗീകാരം നൽകിയതായി ജിസിസി സെക്രട്ടറി ജനറൽ അറിയിച്ചു. ഇതിനോടൊപ്പം ആവശ്യമായ സൈനിക വിഭാഗങ്ങളെയും അവിടെ വിന്യസിക്കും. ആറ് അംഗരാജ്യങ്ങളിലെയും പ്രതിരോധ മന്ത്രിമാർ പങ്കെടുത്ത ജിസിസി ജോയിന്റ് ഡിഫൻസ് കൗൺസിലിന്റെ ഇരുപത്തിമൂന്നാമത് യോഗത്തിന് ബഹ്‌റൈൻ വേദിയായതിന് പിന്നാലെയാണ് ഈ നിർണായക പ്രഖ്യാപനം ഉണ്ടായത്. പുതിയ ആസ്ഥാനത്തെക്കുറിച്ചോ വിന്യസിക്കുന്ന സേനയെക്കുറിച്ചോ ഉള്ള കൂടുതൽ വിവരങ്ങൾ ഔദ്യോഗികമായി പുറത്തുവിട്ടിട്ടില്ല.
അംഗരാജ്യങ്ങളുടെ സംയുക്ത സൈനിക പ്രവർത്തനങ്ങൾ ആസൂത്രണം ചെയ്യുന്നതിനും പ്രതിരോധ ശേഷി ശക്തിപ്പെടുത്തുന്നതിനുമായി 2013 ഡിസംബറിൽ കുവൈറ്റിൽ നടന്ന ഉച്ചകോടിയിലാണ് ജിസിസി ഏകീകൃത സൈനിക കമാൻഡ് രൂപീകരിച്ചത്. ബഹ്‌റൈൻ, കുവൈറ്റ്, ഒമാൻ, ഖത്തർ, സൗദി അറേബ്യ, യുണൈറ്റഡ് അറബ് എമിറേറ്റ്സ് എന്നിവയാണ് ജിസിസിയിലെ അംഗരാജ്യങ്ങൾ. ഫെബ്രുവരി 28-ന് അമേരിക്കയും ഇസ്രായേലും ഇറാനെതിരെ യുദ്ധം ആരംഭിച്ചതുമുതൽ ഈ രാജ്യങ്ങൾ തുടർച്ചയായി മിസൈൽ, ഡ്രോൺ ആക്രമണങ്ങളെ നേരിട്ടുകൊണ്ടിരിക്കുകയാണ്. ഈ സംഘർഷം വ്യോമഗതാഗതത്തെയും ചരക്കുകപ്പൽ ഗതാഗതത്തെയും പ്രതികൂലമായി ബാധിച്ചിട്ടുണ്ട്. ഇത് മേഖലയിലെ എണ്ണ, പ്രകൃതിവാതക കയറ്റുമതിയുടെ സുരക്ഷയെക്കുറിച്ചുള്ള ആശങ്കകൾ വർദ്ധിപ്പിക്കുന്നതിന് ഇടയാക്കിയിട്ടുണ്ട്.
fdfsdfsdfsd
