വിമാനത്താവളത്തിൽ യാത്രക്കാരനെ തടഞ്ഞുവെച്ച് പണം കവർന്ന ഉദ്യോഗസ്ഥരുടെ തടവുശിക്ഷ കോടതി ശരിവെച്ചു
പ്രദീപ് പുറവങ്കര I ബഹ്റൈൻ
ബഹ്റൈൻ അന്താരാഷ്ട്ര വിമാനത്താവളത്തിൽ ഔദ്യോഗിക പദവി ദുരുപയോഗം ചെയ്ത് യാത്രക്കാരനെ നിയമവിരുദ്ധമായി തടഞ്ഞുവെക്കുകയും പണം മോഷ്ടിക്കുകയും ചെയ്ത രണ്ട് സർക്കാർ ഉദ്യോഗസ്ഥരുടെ അഞ്ച് വർഷത്തെ തടവുശിക്ഷ ഹൈ ക്രിമിനൽ അപ്പീൽ കോടതി ശരിവെച്ചു. തടവുശിക്ഷയ്ക്ക് പുറമെ പ്രതികൾക്ക് 500 ദിനാർ വീതം പിഴയും കോടതി ചുമത്തിയിട്ടുണ്ട്. കൂടാതെ, ഇരയായ യാത്രക്കാരനിൽ നിന്ന് തട്ടിയെടുത്ത 3,500 സൗദി റിയാൽ ഇരുവരും ചേർന്ന് തിരികെ നൽകാനും കോടതി ഉത്തരവിട്ടു.
യാത്രക്കാരൻ വിമാനത്താവളത്തിലൂടെ സഞ്ചരിക്കവെ, പ്രതികൾ അദ്ദേഹത്തെ വിമാനത്താവളത്തിലെ ശുചിമുറിയിലേക്ക് കൂട്ടിക്കൊണ്ടുപോയി പരിശോധന നടത്തുകയായിരുന്നു. യാത്ര തുടർന്ന അദ്ദേഹം പിന്നീട് തന്റെ കൈവശമുണ്ടായിരുന്ന 3,500 സൗദി റിയാൽ കാണാതായ വിവരം തിരിച്ചറിയുകയും ബഹ്റൈനിൽ തിരിച്ചെത്തിയ ശേഷം പരാതി നൽകുകയുമായിരുന്നു.
തുടർന്ന് നടന്ന അന്വേഷണത്തിൽ വിമാനത്താവളത്തിലെ സിസിടിവി ദൃശ്യങ്ങളും ദൃക്സാക്ഷി മൊഴികളും പരിശോധിച്ചതോടെ ഉദ്യോഗസ്ഥർ പദവി ദുരുപയോഗം ചെയ്തതായി സ്ഥിരീകരിച്ചു. അംഗീകൃത നടപടിക്രമങ്ങൾ പാലിക്കാതെയും അനുമതിയില്ലാതെയുമാണ് തങ്ങൾ പരിശോധന നടത്തിയതെന്ന് പ്രതികൾ സമ്മതിച്ചു. ഔദ്യോഗിക കൃത്യനിർവഹണത്തിനിടെയുള്ള നിയമവിരുദ്ധമായ തടഞ്ഞുവെക്കൽ, പദവി ദുരുപയോഗം, പണം തട്ടിയെടുക്കൽ എന്നീ കുറ്റങ്ങൾ തെളിഞ്ഞതോടെയാണ് കോടതി ശിക്ഷാവിധി അന്തിമമാക്കിയത്.
#BahrainNews #AirportSecurity #LegalJustice #BahrainCourt
adsasasas
