'ബോളിവുഡ് വിന്റേജ് നൈറ്റ്' സംഘടിപ്പിച്ച് ബഹ്റൈൻ ഐഎൽഎ
പ്രദീപ് പുറവങ്കര I ബഹ്റൈൻ
മനാമ: ബഹ്റൈനിലെ ഇന്ത്യൻ ലേഡീസ് അസോസിയേഷൻ (ILA) തങ്ങളുടെ എഴുപതാം വാർഷികാഘോഷം 'ബോളിവുഡ് വിന്റേജ് നൈറ്റ്' എന്ന പ്രമേയത്തിൽ മനാമ ക്രൗൺ പ്ലാസയിൽ സംഘടിപ്പിച്ചു. ബോളിവുഡ് സിനിമയുടെ സുവർണ്ണ കാലഘട്ടത്തെ അനുസ്മരിപ്പിച്ച ചടങ്ങ് ഐ.എൽ.എയുടെ പ്ലാറ്റിനം ജൂബിലി ആഘോഷങ്ങളുടെ തുടക്കം കൂടിയായി മാറി. മുഖ്യാതിഥിയായി പങ്കെടുത്ത ബെറ്റ്സി മത്തായിസൺ സംഘടന കഴിഞ്ഞ ഏഴ് പതിറ്റാണ്ടുകളായി ബഹ്റൈനിലെ പ്രവാസി സമൂഹത്തിന് നൽകുന്ന വിലമതിക്കാനാവാത്ത സേവനങ്ങളെ അഭിനന്ദിച്ചു.
സഹോദര്യമാണ് സംഘടനയുടെ അടിത്തറയെന്നും 1956-ൽ ആരംഭിച്ച ഈ കൂട്ടായ്മ തലമുറകളിലൂടെ കൂടുതൽ കരുത്താർജ്ജിച്ചതായും പ്രസിഡന്റ് സ്മിത ജെൻസൻ തന്റെ അധ്യക്ഷ പ്രസംഗത്തിൽ പറഞ്ഞു. പ്ലാറ്റിനം ജൂബിലി വർഷത്തിൽ കൂടുതൽ ഉൾക്കൊള്ളുന്നതും വൈവിധ്യമാർന്നതുമായ പ്രവർത്തനങ്ങൾ കാഴ്ചവെക്കുമെന്ന് അവർ വ്യക്തമാക്കി. പുതുതായി തിരഞ്ഞെടുക്കപ്പെട്ട എക്സിക്യൂട്ടീവ് കമ്മിറ്റി അംഗങ്ങളുടെ സ്ഥാനാരോഹണമായിരുന്നു ചടങ്ങിലെ മറ്റൊരു പ്രധാന ആകർഷണം. ബോളിവുഡ് ക്ലാസിക് ഗാനങ്ങളുടെ അകമ്പടിയോടെ ഭാരവാഹികൾ വേദിയിലെത്തിയത് കാണികൾക്ക് പുതിയ അനുഭവമായി. മീര രവി ഭാരവാഹികൾക്ക് സത്യപ്രതിജ്ഞ ചൊല്ലിക്കൊടുത്തു. ബഹ്റൈനിലെ പ്രമുഖ കമ്മ്യൂണിറ്റി നേതാക്കളും സംരംഭകരും ചേർന്നാണ് പുതിയ ഭാരവാഹികൾക്ക് ബാഡ്ജുകൾ അണിയിച്ചത്.
വിവിധ സബ് കമ്മിറ്റി കോർഡിനേറ്റർമാർക്കും ദാണ്ഡിയ ആഘോഷങ്ങൾക്ക് നേതൃത്വം നൽകിയവർക്കും സ്നേഹ (Sneha) വെൽഫെയർ വിഭാഗത്തിലെ സന്നദ്ധ പ്രവർത്തകർക്കും ചടങ്ങിൽ ഉപഹാരങ്ങൾ നൽകി ആദരിച്ചു. എഴുപത് വർഷത്തെ ഐക്യവും സേവനവും സ്മരിച്ചുകൊണ്ട് എല്ലാ അംഗങ്ങളും ചേർന്ന് കേക്ക് മുറിച്ചു. ആഘോഷങ്ങളുടെ ഭാഗമായി നടന്ന മത്സരങ്ങളിൽ സാമിനി മികച്ച വനിതാ വേഷത്തിനുള്ള പുരസ്കാരവും അരുൾദാസ് മികച്ച പുരുഷ വേഷത്തിനുള്ള പുരസ്കാരവും നേടി. കാലേഷ് കമൽ - ഉഷാസ് ജോഡികൾ മികച്ച ദമ്പതികളായി തിരഞ്ഞെടുക്കപ്പെട്ടു. രേഖ ഉത്തം അവതാരകയായ ചടങ്ങിൽ ഹൃദ്യമായ സംഗീത പരിപാടികളും അരങ്ങേറി. ജനറൽ സെക്രട്ടറി ശർമിസ്ത ഡേ നന്ദി രേഖപ്പെടുത്തിയതോടെ വാർഷികാഘോഷങ്ങൾക്ക് സമാപനമായി.
dsfdg
