ചെറിയ പെരുന്നാൾ ആഘോഷത്തിന്‍റെ ഭാഗമായി 198 തടവുകാർക്ക് മാപ്പ് നൽകി ഒമാൻ
വിവിധ കേസുകളിൽ ശിക്ഷിക്കപ്പെട്ട് ജയിലിൽ കഴിഞ്ഞിരുന്ന നിരവധി തടവുകാർക്ക് സുൽത്താൻ ഹൈതം ബിൻ താരിഖ് മാപ്പ് നൽകി. ചെറിയ പെരുന്നാൾ ആഘോഷത്തിന്‍റെ ഭാഗമായി 198 തടവുകാർക്കാണ് മാപ്പ് നൽകിയത്. ഇതിൽ 89 പേർ പ്രവാസികളാണ്. കഴിഞ്ഞ വർഷം 304 തടവുകാർക്കായിരുന്നു മാപ്പ് നൽകിയത്. ഇതിൽ 108പേർ വിദേശികളായിരുന്നു. മസ്കത്ത് ഗവർണറേറ്റിലെ അൽഖോർ മസ്ജിദിൽ സുൽത്താൻ ഹൈതം ബിൻ താരിഖ് പെരുന്നാൾ നമസ്‌കാരം നിർവഹിക്കും.
ദിവാൻ ഓഫ് റോയൽ കോർട്ട് ആണ് ഇക്കാര്യം പ്രസ്താവനയിൽ അറിയിച്ചത്. സുൽത്താന്റെ സായുധ സേനയുടെ കമാൻഡർമാർ, റോയൽ ഒമാൻ പൊലീസ്, മറ്റ് സുരക്ഷാ ഏജൻസികൾ, ഒമാനിലെ ഇസ്‌ലാമിക രാജ്യങ്ങളുടെ അംബാസഡർമാർ തുടങ്ങി നിരവധി പ്രമുഖർ ഇവിടെ പ്രാർത്ഥനയിൽ പങ്കെടുക്കും.
