ഇന്നു മുതൽ സംസ്ഥാനത്തു നോക്കുകൂലി ഇല്ല
തിരുവനന്തപുരം : ഇന്നു മുതൽ സംസ്ഥാനത്തു നോക്കുകൂലി സമ്പ്രദായം ഇല്ല. ഇതു സംബന്ധിച്ച ഉത്തരവ് സർക്കാർ പുറപ്പെടുവിച്ചു. നോക്കുകൂലി ഒഴിവാക്കാൻ കേരള ചുമട്ടുതൊഴിലാളി നിയമത്തിൽ സർക്കാർ വരുത്തിയ ഭേദഗതി കഴിഞ്ഞ ദിവസം ഗവർണർ അംഗീകരിച്ചിരുന്നു. ചുമട്ടുതൊഴിലാളി നിയമത്തിലെ ഒൻപതാം വകുപ്പിലെ ഒന്ന്, രണ്ട് ഉപവകുപ്പുകളാണു ഭേദഗതി ചെയ്തത്.
ചെയ്യാത്ത ജോലിക്കു കൂലി ആവശ്യപ്പെടുന്നതുള്പ്പെടെ കേരളത്തിലെ ചുമട്ടുതൊഴില്മേഖലയിൽ നിലനില്ക്കുന്ന അനാരോഗ്യപ്രവണതകള് അവസാനിപ്പിക്കാനും മെച്ചപ്പെട്ട തൊഴില് സംസ്കാരം പ്രാവര്ത്തികമാക്കാനും ലക്ഷ്യമിട്ടാണ് ഉത്തരവ്. തൊഴില്മേഖലകളിൽ ചില യൂണിയനുകള് തൊഴിലാളികളെ വിതരണം ചെയ്യുന്നതിന് അവകാശമുന്നയിക്കുന്നതും അവസാനിപ്പിക്കും. ചെയ്യാത്ത ജോലിക്കു കൂലി ആവശ്യപ്പെടുന്നതും കൈപ്പറ്റുന്നതും നിയമവിരുദ്ധമായി കണക്കാക്കി നടപടി സ്വീകരിക്കും.
മുഖ്യമന്ത്രിയുടെ അധ്യക്ഷതയില് മാര്ച്ച് എട്ടിനു നടന്ന ട്രേഡ്യൂണിയൻ ഭാരവാഹികളുമായുള്ള ചര്ച്ചയുടെ കൂടി അടിസ്ഥാനത്തിലാണു തൊഴില്വകുപ്പ് ഉത്തരവ് പുറപ്പെടുവിച്ചത്. അമിതകൂലി ആവശ്യപ്പെടുന്നതും ചെയ്യാത്ത ജോലിക്കു കൂലി ആവശ്യപ്പെടുന്നതും അടക്കമുള്ള പ്രവണതകള് സംസ്ഥാനത്തിന്റെ സമഗ്രവികസനത്തിനു വിഘാതമാകുന്നതായി വിലയിരുത്തപ്പെട്ട സാഹചര്യത്തിലാണു തീരുമാനം.
