മെമ്മറി കാർഡ് ചോർച്ച: സുപ്രീം കോടതി സീനിയർ അഭിഭാഷക വൃന്ദ ഗ്രോവർ മുഖേന അതിജീവിത ഹൈക്കോടതിയിൽ
ഷീബ വിജയൻ
നടിയെ ആക്രമിച്ച കേസിലെ നിർണായക തെളിവായ മെമ്മറി കാർഡ് വിചാരണക്കോടതിയുടെ കസ്റ്റഡിയിലിരിക്കെ ചോർന്ന സംഭവത്തിൽ സമഗ്രമായ പുനരന്വേഷണം ആവശ്യപ്പെട്ട് അതിജീവിത വീണ്ടും ഹൈക്കോടതിയെ സമീപിച്ചു. സുപ്രീം കോടതിയിലെ പ്രശസ്ത മുതിർന്ന അഭിഭാഷക വൃന്ദ ഗ്രോവർ മുഖേനയാണ് പുതിയ ഹർജി ഫയൽ ചെയ്തത്. ദൃശ്യങ്ങൾ അനധികൃതമായി പരിശോധിക്കപ്പെട്ട സംഭവത്തിൽ കേസ് അട്ടിമറിക്കാൻ ബോധപൂർവമായ ശ്രമങ്ങൾ നടന്നിട്ടുണ്ടെന്നും, മുൻപ് നടന്ന അന്വേഷണ റിപ്പോർട്ടിലെ കണ്ടെത്തലുകൾ തൃപ്തികരമല്ലെന്നും ഹർജിയിൽ വ്യക്തമാക്കുന്നു. നീതിപൂർവമായ വിചാരണ ഉറപ്പാക്കാൻ കോടതിയുടെ നേരിട്ടുള്ള മേൽനോട്ടത്തിൽ പുതിയ അന്വേഷണം വേണമെന്നാണ് പ്രധാന ആവശ്യം.
അതേസമയം, ഉന്നത കോടതികളിലെ ഈ നിയമപോരാട്ടത്തിനായുള്ള കേസ് നടത്തിപ്പ് ചെലവുകൾക്കായി 'അവൾക്കൊപ്പം ലീഗൽ സപ്പോർട്ട് ട്രസ്റ്റ്' പൊതുജനങ്ങളിൽ നിന്ന് സംഭാവനകൾ തേടിയിട്ടുണ്ട്. ദിലീപ് അടക്കമുള്ള പ്രതികളെ പ്രത്യേക കോടതി വെറുതെ വിട്ടതിനെതിരെ സർക്കാർ നിലവിൽ നൽകിയ അപ്പീലിന് പുറമെ അതിജീവിതയും ഉടൻ അപ്പീൽ നൽകും. ഭീമമായ കോടതിച്ചെലവുകൾ മുന്നിൽക്കണ്ടാണ് കോഴിക്കോട് ആസ്ഥാനമായുള്ള ട്രസ്റ്റ് പൊതുസമൂഹത്തിന്റെ സഹായം അഭ്യർത്ഥിച്ചിരിക്കുന്നത്. ഈ ആഹ്വാനം ഡബ്ല്യുസിസി ഉൾപ്പെടെയുള്ള സംഘടനകൾ പങ്കുവെച്ചിട്ടുണ്ട്. മുൻപ് പ്രതിഫലം വാങ്ങാതെ അതിജീവിതയ്ക്കായി ഹാജരായിരുന്ന അഡ്വ. ടി.ബി. മിനി വക്കാലത്ത് ഒഴിഞ്ഞതിനെ തുടർന്നാണ് ഇനി വരുന്ന ഘട്ടങ്ങളിൽ വൃന്ദ ഗ്രോവർ കേസ് കൈകാര്യം ചെയ്യുന്നത്.
dvdfvdfdf
