ചുവന്ന വസന്തം! സ്പെയിന് ലോക ചാംപ്യന്മാര്, മെസിക്ക് കണ്ണീര് മടക്കം
ഷീബ വിജയൻ
ന്യൂയോർക്കിലെ മെറ്റ്ലൈഫ് സ്റ്റേഡിയത്തിൽ നടന്ന ആവേശം നിറഞ്ഞ ഫൈനൽ പോരാട്ടത്തിൽ നിലവിലെ ചാമ്പ്യന്മാരായ അർജന്റീനയെ വീഴ്ത്തി സ്പെയിൻ ലോക കിരീടം സ്വന്തമാക്കി. നിശ്ചിത സമയത്ത് ഇരുടീമുകൾക്കും ഗോൾ നേടാനാകാത്തതിനെ തുടർന്ന് അധിക സമയത്തേക്ക് നീണ്ട മത്സരത്തിന്റെ 106-ാം മിനിറ്റിൽ പകരക്കാരനായി ഇറങ്ങിയ ഫെറാൻ ടോറസാണ് സ്പെയിനിന്റെ വിജയഗോൾ നേടിയത്. വലതു വിങ്ങിൽ നിന്നും ഉയർന്നുവന്ന ക്രോസ് നികോ വില്യംസ് ഹെഡ് ചെയ്ത് നൽകിയപ്പോൾ ടോറസ് അത് മനോഹരമായി വലയിലെത്തിക്കുകയായിരുന്നു.
മത്സരത്തിലുടനീളം മനോഹരമായ കളിശൈലിയിലൂടെ സ്പെയിൻ തന്നെയാണ് ആധിപത്യം പുലർത്തിയത്. സ്പാനിഷ് പട അർജന്റീനൻ ഗോൾമുഖത്തേക്ക് ഇരുപതോളം ഷോട്ടുകൾ ഉതിർത്തപ്പോൾ, അർജന്റീനയ്ക്ക് ഒന്നുപോലും ലക്ഷ്യത്തിലേക്ക് എത്തിക്കാനായില്ല. സ്പാനിഷ് നിരയിൽ ലമിൻ യമാൽ, ഡാനി ഒൽമോ, ഒയർസബാൽ എന്നിവർ നടത്തിയ അപകടകരമായ മുന്നേറ്റങ്ങളെ 11 അത്യുഗ്രൻ സേവുകളിലൂടെ തടഞ്ഞുനിർത്തിയ ഗോൾകീപ്പർ എമിലിയാനോ മാർട്ടിനസിന്റെ അസാധ്യ പ്രകടനമാണ് കളി അധികസമയം വരെ എത്തിച്ചത്. മറുവശത്ത് അർജന്റീനൻ പ്രതിരോധനിരയിലെ കരുത്തനായ ലിസാൻഡ്രോ മാർട്ടിനസ് പരിക്കേറ്റ് പുറത്തായതും അവർക്ക് വലിയ തിരിച്ചടിയായി.
മധ്യനിരയിൽ ലയണൽ മെസ്സി, അൽവാരസ്, മക് അലിസ്റ്റർ എന്നിവരെ റോഡ്രിയും യമാലും ചേർന്നുള്ള സ്പാനിഷ് സഖ്യം കൃത്യമായി പൂട്ടിയിട്ടു. മെസ്സിക്ക് കാര്യമായ മുന്നേറ്റങ്ങൾ നടത്താൻ സാധിക്കാതെ വന്നതോടെ അർജന്റീനൻ ആക്രമണങ്ങളുടെ മൂർച്ച കുറഞ്ഞു. കളിയിലുടനീളം പരുക്കൻ അടവുകൾ പുറത്തെടുത്ത അർജന്റീനയ്ക്ക് ഇൻജുറി ടൈമിൽ താരം എൻസോ ഫെർണാണ്ടസ് ചുവപ്പ് കാർഡ് വാങ്ങി പുറത്തുപോയത് വലിയ തിരിച്ചടിയായി. സ്പെയിൻ പ്രതിരോധ താരം കുബാർസിയെ ഫൗൾ ചെയ്തതിനാണ് എൻസോയ്ക്ക് രണ്ടാം മഞ്ഞക്കാർഡും തുടർന്ന് ചുവപ്പ് കാർഡും ലഭിച്ചത്.
രണ്ടാം പകുതിയിൽ ലയണൽ സ്കലോണി പരെഡെസ്, മൊളിന, മെഡിന, സിമിയോണി എന്നിവരെ പകരക്കാരായി ഇറക്കി പല പരീക്ഷണങ്ങളും നടത്തിയെങ്കിലും സ്പാനിഷ് ആധിപത്യം തകർക്കാൻ കഴിഞ്ഞില്ല. പ്രതിരോധത്തിൽ കുബാർസിയും കുകുറെയയും നടത്തിയ മികച്ച പ്രകടനം സ്പാനിഷ് ഗോൾകീപ്പർ ഉനായ് സിമോന് കാര്യമായ പരീക്ഷണമില്ലാതെ മത്സരം പൂർത്തിയാക്കാൻ തുണയായി. ഒടുവിൽ മെസ്സിയുടെ കണ്ണീരോടെയുള്ള മടങ്ങിവരവിനും സ്പെയിനിന്റെ സുവർണ്ണ കിരീടധാരണത്തിനും മെറ്റ്ലൈഫ് സ്റ്റേഡിയം സാക്ഷിയായി.
ഫിഫ ലോകകപ്പ് ഫൈനൽ ചരിത്രത്തിലാദ്യമായി മെറ്റ്ലൈഫ് സ്റ്റേഡിയത്തിൽ നടന്ന ഹാഫ് ടൈം ഷോ കാണികളുടെ മനംകവർന്നു. ജസ്റ്റിൻ ബീബർ, മഡോണ, ഷക്കീറ, ബർണാ ബോയ്, ബി.ടി.എസ് തുടങ്ങിയ പ്രമുഖ സംഗീതജ്ഞർ അണിനിരന്ന പരിപാടിയിൽ ബ്രസീലിയൻ ഇതിഹാസങ്ങളായ റൊണാൾഡോയും റൊണാൾഡിഞ്ഞോയും ചേർന്നാണ് മഡോണയെ സ്റ്റേഡിയത്തിലേക്ക് ആനയിച്ചത്. ഗുസ്താവോ ദുദമേൽ നയിച്ച സിംഫണി ഓർക്കസ്ട്രയും പ്രശസ്ത കാർട്ടൂൺ കഥാപാത്രങ്ങളും ഷോയ്ക്ക് മാറ്റ് കൂട്ടി. മത്സരത്തിന് മുന്നോടിയായി നടന്ന സമാപന ചടങ്ങിൽ പോസ്റ്റ് മലോൺ, ടോം ക്രൂസ്, ഐഷോസ്പീഡ് തുടങ്ങിയ പ്രമുഖരും പങ്കെടുത്തു.
jhjjk
