മനാമ മാർക്കറ്റ് വികസനത്തിനും ചെറുകിട സംരംഭകർക്കും പിന്തുണ പ്രഖ്യാപിച്ച് ബഹ്‌റൈൻ ചേംബർ ഓഫ് കോമേഴ്‌സ്

പ്രദീപ് പുറവങ്കര

മനാമ: രാജ്യത്തെ ഏറ്റവും പ്രധാനപ്പെട്ട സാമ്പത്തിക, വാണിജ്യ, പൈതൃക കേന്ദ്രങ്ങളിൽ ഒന്നായ മനാമ മാർക്കറ്റിന്റെ പദവി സംരക്ഷിക്കുന്നതിനും വിനോദസഞ്ചാര-സാമ്പത്തിക മൂല്യം വർദ്ധിപ്പിക്കുന്നതിനും മുൻഗണന നൽകുമെന്ന് ബഹ്‌റൈൻ ചേംബർ ഓഫ് കോമേഴ്‌സ് വ്യക്തമാക്കി. മനാമ മാർക്കറ്റിൽ ചേംബർ ഡയറക്ടർ ബോർഡ് അംഗങ്ങൾ നടത്തിയ നേരിട്ടുള്ള സന്ദർശനത്തിലാണ് വിലയിരുത്തൽ.

കച്ചവടക്കാരുമായി നേരിട്ട് സംവദിച്ച് വിപണിയുടെ ആവശ്യങ്ങളും നിർദ്ദേശങ്ങളും ചോദിച്ചറിയുന്നതിനായി വ്യാപാരികളുടെ സാന്നിധ്യത്തിലായിരുന്നു സന്ദർശനം. ഓൺ-ദി-ഗ്രൗണ്ട് അനുഭവങ്ങളുടെ അടിസ്ഥാനത്തിൽ എടുക്കുന്ന തീരുമാനങ്ങളാണ് സാമ്പത്തിക രംഗത്തിന് ഏറ്റവും അനുയോജ്യം എന്ന കാഴ്ചപ്പാടിന്റെ അടിസ്ഥാനത്തിലാണ് ചേംബർ ഭാരവാഹികൾ നേരിട്ടെത്തി വിവരങ്ങൾ ശേഖരിച്ചത്.

രാജ്യത്തെ വിവിധ ഗവർണറേറ്റുകളിലെ പരമ്പരാഗത വിപണികളും സാമ്പത്തിക മേഖലകളും കേന്ദ്രീകരിച്ച് ചേംബർ നടപ്പിലാക്കുന്ന പതിവ് ഫീൽഡ് സന്ദർശന പരമ്പരയിലെ ആദ്യ ഘട്ടമാണിത്. ഇത്തരം നേരിട്ടുള്ള ഇടപെടലുകൾ വഴി വിവിധ മേഖലകളിൽ പ്രവർത്തിക്കുന്ന വ്യാപാരികളുടെ മുൻഗണനകൾ നേരിട്ടറിയാൻ ചേംബറിന് സാധിക്കും. പരമ്പരാഗത വിപണികൾ വെറുമൊരു വാണിജ്യ കേന്ദ്രം മാത്രമല്ല, മറിച്ച് ബഹ്‌റൈന്റെ സാമ്പത്തിക-ദേശീയ ഐഡന്റിറ്റിയുടെ പ്രധാന ഭാഗമാണെന്ന് ഭാരവാഹികൾ ചൂണ്ടിക്കാട്ടി.

വ്യാപാരികളുമായി നടത്തിയ തുറന്ന ചർച്ചകളിൽ ഉയർന്നുവന്ന നിർദ്ദേശങ്ങളും ആവശ്യങ്ങളും ബന്ധപ്പെട്ട സർക്കാർ മന്ത്രാലയങ്ങളുമായി ചർച്ച ചെയ്ത് പ്രായോഗിക മാറ്റങ്ങൾ കൊണ്ടുവരാൻ നടപടി സ്വീകരിക്കും. മനാമ മാർക്കറ്റിലെ ഭൂരിഭാഗം സ്ഥാപനങ്ങളും ചെറുകിട-ഇടത്തരം (മേഖലയിലാണ് വരുന്നത്. ഈ മേഖലയ്ക്ക് ആവശ്യമായ പിന്തുണ നൽകുന്നതിനായി ചേംബറിൽ പ്രത്യേക വകുപ്പ് രൂപീകരിച്ചിട്ടുണ്ട്. രാജ്യത്തിന്റെ സാമ്പത്തിക വളർച്ചയിൽ ശക്തമായ പങ്കാളിയായി ചേംബർ ഓഫ് കോമേഴ്‌സ് തുടരുമെന്ന് ഭാരവാഹികൾ വ്യക്തമാക്കി.