സിവിൽ സൊസൈറ്റി സംഘടനകളുടെ പ്രവർത്തനം കൂടുതൽ സുതാര്യമാക്കാൻ പുതിയ മാർഗ്ഗരേഖ; വിദേശ സഹകരണങ്ങൾക്കും ഫണ്ട് ശേഖരണത്തിനും ബഹ്റൈനിൽ കർശന നിയന്ത്രണം

പ്രദീപ് പുറവങ്കര

മനാമ: ബഹ്‌റൈനിലെ സിവിൽ സൊസൈറ്റി സംഘടനകളുടെയും ലാഭരഹിത കൂട്ടായ്മകളുടെയും പ്രവർത്തനം കൂടുതൽ സ്ഥാപനവൽക്കരിക്കാനും സുതാര്യത ഉറപ്പുവരുത്താനും ലക്ഷ്യമിട്ട് പുതിയ നടപടിക്രമ മാർഗ്ഗരേഖ തയ്യാറാകുന്നു. സാമൂഹിക വികസന മന്ത്രാലയവും സന്നദ്ധ സംഘടനകളുടെ പ്രതിനിധികളും തമ്മിൽ നിലവിൽ ചർച്ച ചെയ്തുകൊണ്ടിരിക്കുന്ന കരട് മാർഗ്ഗരേഖയുടെ പ്രധാന വിവരങ്ങൾ പ്രാദേശിക മാധ്യമങ്ങൾ പുറത്തുവിട്ടു. സന്നദ്ധ സംഘടനകളുടെ സാമ്പത്തിക അനുസരണവും പ്രവർത്തനക്ഷമതയും വർദ്ധിപ്പിക്കുന്നതിനായി 18 അധ്യായങ്ങളിലായാണ് മാർഗ്ഗരേഖ രൂപകൽപ്പന ചെയ്തിരിക്കുന്നത്.

സംഘടനകളുടെ രജിസ്‌ട്രേഷൻ, ഫണ്ട് ശേഖരണം, വിദേശ സംഘടനകളുമായുള്ള ബന്ധം, സാമ്പത്തിക മാനേജ്‌മെന്റ്, കള്ളപ്പണം വെളുപ്പിക്കൽ തടയൽ, താൽപ്പര്യ വൈരുദ്ധ്യം ഒഴിവാക്കൽ, ലയനവും അടച്ചുപൂട്ടലും തുടങ്ങിയ നിരവധി പ്രധാന വിഷയങ്ങൾ പുതിയ മാർഗ്ഗരേഖയുടെ പരിധിയിൽ വരുന്നുണ്ട്. സാമ്പത്തിക സുതാര്യത ഉറപ്പാക്കുന്നതിന്റെ ഭാഗമായി എല്ലാ സംഘടനകളും മൂന്ന് വ്യത്യസ്ത ബാങ്ക് അക്കൗണ്ടുകൾ നിർബന്ധമായും സൂക്ഷിക്കണമെന്നതാണ് പ്രധാന നിർദ്ദേശം. ദൈനംദിന പ്രവർത്തനങ്ങൾക്കുള്ള അക്കൗണ്ട്, ഫണ്ട് ശേഖരണത്തിനുള്ള അക്കൗണ്ട്, സംഘടന നേരിട്ട് നടപ്പിലാക്കുന്ന പദ്ധതികൾക്കുള്ള അക്കൗണ്ട് എന്നിവ വേർതിരിച്ചു പരിപാലിക്കുന്നത് വഴി പണത്തിന്റെ ദുരുപയോഗവും ഫണ്ടുകൾ തമ്മിൽ കലരുന്നതും പൂർണ്ണമായി തടയാൻ സാധിക്കും.

വിദേശ രാജ്യങ്ങളിലെ സംഘടനകളുമായി സഹകരിക്കുന്നതിനും അംഗത്വമെടുക്കുന്നതിനും സാമൂഹിക വികസന മന്ത്രാലയത്തിന്റെ മുൻകൂർ അനുമതി നിർബന്ധമാക്കിയിട്ടുണ്ട്. അപേക്ഷ നൽകി 45 ദിവസത്തിനകം മന്ത്രാലയത്തിൽ നിന്ന് മറുപടി ലഭിച്ചില്ലെങ്കിൽ അപേക്ഷ നിരസിക്കപ്പെട്ടതായി കണക്കാക്കും. കൂടാതെ, ഭരണസമിതി അംഗങ്ങളുടെയോ ജീവനക്കാരുടെയോ ബന്ധുക്കളെ ഭാരവാഹികളായി നിയമിക്കുമ്പോൾ താൽപ്പര്യ വൈരുദ്ധ്യം ഉണ്ടാകാതിരിക്കാൻ നിയമനത്തിന്റെ കൃത്യമായ കാരണം വ്യക്തമാക്കണമെന്നും, അത്തരം തീരുമാനങ്ങളിൽ നിന്ന് ബന്ധപ്പെട്ട ഭരണസമിതി അംഗം മാറിനിൽക്കണമെന്നും മാർഗ്ഗരേഖ വ്യവസ്ഥ ചെയ്യുന്നു.

കള്ളപ്പണം വെളുപ്പിക്കൽ, ഭീകരവാദ പ്രവർത്തനങ്ങൾക്കുള്ള സാമ്പത്തിക സഹായം നൽകൽ എന്നിവ തടയുന്നതിനുള്ള കർശന നിരീക്ഷണ സംവിധാനങ്ങളും വിദേശത്ത് നിന്നുള്ള സാമ്പത്തിക ഇടപാടുകളിൽ പാലിക്കേണ്ട മാനദണ്ഡങ്ങളും പുതിയ രൂപരേഖയിൽ ഉൾപ്പെടുത്തിയിട്ടുണ്ട്. നിലവിലുള്ള നിയമങ്ങൾക്ക് പകരമായല്ല, മറിച്ച് പ്രവർത്തനങ്ങൾ സുഗമമാക്കാനുള്ള ഗൈഡായാണ് ഇത് നിർമ്മിച്ചിരിക്കുന്നതെന്നും അന്തിമരൂപം നൽകുന്നതിന് മുൻപ് സന്നദ്ധ സംഘടനകളുമായി കൂടുതൽ കൂടിയാലോചനകൾ നടത്തുമെന്നും മന്ത്രാലയം അറിയിച്ചു. പുതിയ പരിഷ്കാരങ്ങൾ സന്നദ്ധ മേഖലയുടെ വളർച്ചയ്ക്ക് സഹായകരമാകുമെന്ന് സംഘടനകളുടെ ഭാരവാഹികളും സ്വാഗതം ചെയ്തു.