ഇസ്രയേൽ തെരഞ്ഞെടുപ്പിന് പിന്നാലെ നെതന്യാഹുവിന് വീണ്ടും തിരിച്ചടി: സർക്കാർ രൂപീകരണ ചർച്ചകൾ തുടങ്ങി പ്രസിഡന്റ് ഐസക് ഹെർസോഗ്

ശാരിക

ടെൽ അവീവ്: ഇസ്രയേൽ പൊതുതെരഞ്ഞെടുപ്പ് ഫലം പുറത്തുവന്നതിന് പിന്നാലെ പുതിയ സർക്കാർ രൂപീകരണവുമായി ബന്ധപ്പെട്ട് വിവിധ രാഷ്ട്രീയ പാർട്ടികളുമായി പ്രസിഡന്റ് ഐസക് ഹെർസോഗ് ചർച്ചകൾ ആരംഭിച്ചു. ഇസ്രയേൽ പാർലമെന്റായ നെസറ്റിൽ (Knesset) ഒരു പാർട്ടിക്കും വ്യക്തമായ കേവലഭൂരിപക്ഷം ലഭിക്കാത്ത സാഹചര്യത്തിലാണ് കൂടുതൽ എംപിമാരുടെ പിന്തുണയുള്ള നേതാവിനെ കണ്ടെത്താനായി പ്രസിഡന്റ് ഹെർസോഗ് കൂടിക്കാഴ്ചകൾ നടത്തുന്നത്. ഓരോ പാർട്ടിയും തങ്ങൾ പിന്തുണയ്ക്കുന്ന പ്രധാനമന്ത്രി സ്ഥാനാർത്ഥിയുടെ പേര് പ്രസിഡന്റിന് മുന്നിൽ നിർദേശിക്കും.

അതിനിടെ, നിലവിലെ പ്രധാനമന്ത്രി ബെഞ്ചമിൻ നെതന്യാഹുവിന് സ്വന്തം മുന്നണിയിൽ നിന്ന് തന്നെ കനത്ത തിരിച്ചടി നേരിട്ടു. യുണൈറ്റഡ് തോറാ ജൂദായിസം സഖ്യത്തിലെ പ്രധാന കക്ഷിയായ ദേഗൽ ഹാതോറ പാർട്ടി, പ്രധാനമന്ത്രി സ്ഥാനത്തേക്ക് നെതന്യാഹുവിനെ നിർദേശിക്കില്ലെന്ന് വ്യക്തമാക്കി. നെതന്യാഹുവിനെയോ എതിർപക്ഷത്തുള്ള ഗാഡി ഐസൻകോട്ടിനെയോ സർക്കാർ രൂപീകരണത്തിന് പിന്തുണയ്ക്കില്ലെന്നാണ് ഈ തീവ്ര യാഥാസ്ഥിതിക പാർട്ടി നിലപാടെടുത്തത്.

ആകെ ഏഴ് എംപിമാരുള്ള യുണൈറ്റഡ് തോറാ ജൂദായിസം സഖ്യത്തിൽ നാല് പേർ ദേഗൽ ഹാതോറ പാർട്ടിയിലെ അംഗങ്ങളാണ്. ഇവർ പിന്തുണയ്ക്കാൻ വിസമ്മതിച്ചതോടെ നെതന്യാഹുവിനുള്ള ആകെ പിന്തുണ 49 ആയി കുറഞ്ഞു. ഭൂരിപക്ഷം തികച്ച് സർക്കാർ രൂപീകരിക്കാൻ 120 അംഗ നെസറ്റിൽ കുറഞ്ഞത് 61 എംപിമാരുടെ പിന്തുണയാണ് വേണ്ടത്. തെരഞ്ഞെടുപ്പിൽ നെതന്യാഹുവിന്റെ മുന്നണിക്ക് 53 സീറ്റുകളും പ്രതിപക്ഷ നേതാവ് ഗാഡി ഐസൻകോട്ടിന്റെ മുന്നണിക്ക് 48 സീറ്റുകളുമാണ് ലഭിച്ചത്.

അതേസമയം, ചരിത്രപരമായ മുന്നേറ്റം നടത്തിയ അറബ് പാർട്ടികളായ റാമും (Ra'am) ജോയിന്റ് ലിസ്റ്റും ചേർന്ന് ആകെ 19 സീറ്റുകൾ സ്വന്തമാക്കി. നെതന്യാഹുവിന്റെ തീവ്രവലതുപക്ഷ സർക്കാരിനെ അധികാരത്തിൽ നിന്ന് മാറ്റാൻ പ്രതിപക്ഷവുമായി സഖ്യമുണ്ടാക്കാൻ സന്നദ്ധമാണെന്ന് അറബ് പാർട്ടികൾ സൂചിപ്പിച്ചു കഴിഞ്ഞു. പ്രസിഡന്റുമായുള്ള കൂടിക്കാഴ്ചയിൽ പ്രധാനമന്ത്രി സ്ഥാനത്തേക്ക് ആരുടെയും പേര് ഔദ്യോഗികമായി നിർദേശിച്ചില്ലെങ്കിലും വോട്ടെടുപ്പിൽ ഐസൻകോട്ടിനെ പിന്തുണയ്ക്കുമെന്നാണ് സൂചന. പലസ്തീനിയൻ അതോറിറ്റിയും ഐസൻകോട്ടിന് പിന്തുണയറിയിച്ച് രംഗത്തുവന്നിട്ടുണ്ട്.