ഇസ്രായേൽ തെരഞ്ഞെടുപ്പിൽ ക്രമക്കേടില്ലെന്ന് സെൻട്രൽ ഇലക്ഷൻ കമ്മീഷൻ; നെതന്യാഹുവിന്റെ ആരോപണങ്ങൾ തള്ളി

ശാരിക

ജെറുസലേം: ഇസ്രായേലിൽ അടുത്തിടെ നടന്ന പൊതുതെരഞ്ഞെടുപ്പിന്റെ ഫലങ്ങളിലോ വോട്ടെടുപ്പിലോ യാതൊരുവിധ ക്രമക്കേടുകളും നടന്നിട്ടില്ലെന്ന് ഇസ്രായേൽ സെൻട്രൽ ഇലക്ഷൻ കമ്മീഷൻ വ്യക്തമാക്കി. അറബ് പാർട്ടികൾ വോട്ട് തട്ടിയെടുക്കാൻ കൃത്രിമം കാണിച്ചെന്ന പ്രധാനമന്ത്രി ബിന്യാമിൻ നെതന്യാഹുവിന്റെയും സഖ്യകക്ഷികളുടെയും ആരോപണങ്ങൾ അടിസ്ഥാനരഹിതമാണെന്നും തെരഞ്ഞെടുപ്പ് കമ്മീഷൻ ഔദ്യോഗികമായി അറിയിച്ചു.120 അംഗ കസെറ്റിൽ (ഇസ്രായേൽ പാർലമെന്റ്) കേവലഭൂരിപക്ഷമായ 61 സീറ്റുകൾ നേടാൻ നെതന്യാഹുവിന്റെ ഭരണസഖ്യത്തിന് സാധിച്ചിരുന്നില്ല.

53 സീറ്റുകൾ മാത്രമാണ് നെതന്യാഹുവിന്റെ സഖ്യത്തിന് ലഭിച്ചത്. അതേസമയം, ഗാഡി ഐസൻകോട്ടിന്റെ നേതൃത്വത്തിലുള്ള പ്രതിപക്ഷ സഖ്യം 48 സീറ്റുകളും അറബ് പാർട്ടികളുടെ കൂട്ടായ്മ 19 സീറ്റുകളും നേടി ശ്രദ്ധേയമായ മുന്നേറ്റം കാഴ്ചവെച്ചു. ഇതോടെയാണ് തെരഞ്ഞെടുപ്പിൽ ക്രമക്കേട് നടന്നുവെന്ന ആരോപണവുമായി നെതന്യാഹുവും അനുയായികളും രംഗത്തെത്തിയത്. എന്നാൽ, തെരഞ്ഞെടുപ്പുമായി ബന്ധപ്പെട്ട് ലഭിച്ച എല്ലാ പരാതികളും വിശദമായി പരിശോധിച്ചതായും അതിലൊന്നും ക്രമക്കേടുകൾ കണ്ടെത്താനായില്ലെന്നും സെൻട്രൽ ഇലക്ഷൻ കമ്മീഷൻ ആക്ടിങ് ഡയറക്ടർ ഡീൻ ലിവ്നെ വ്യക്തമാക്കി. ജനങ്ങൾ രേഖപ്പെടുത്തിയ യഥാർത്ഥ വോട്ടുകൾ തന്നെയാണ് തെരഞ്ഞെടുപ്പ് ഫലത്തിൽ പ്രതിഫലിച്ചതെന്നും അദ്ദേഹം കൂട്ടിച്ചേർത്തു.

അതിനിടെ, തെരഞ്ഞെടുപ്പിൽ വിദേശ ഇടപെടലുകൾ ഉണ്ടായിട്ടുണ്ടോയെന്ന വിഷയത്തിൽ ഇസ്രായേലിന്റെ ആഭ്യന്തര രഹസ്യാന്വേഷണ ഏജൻസിയായ 'ഷിൻ ബെറ്റ്' (Shin Bet) അന്വേഷണം നടത്തിവരികയാണ്.ഔദ്യോഗിക ഫലപ്രഖ്യാപനത്തിനുശേഷം പ്രസിഡന്റ് ഐസക് ഹെർസോഗ് വരുംദിവസങ്ങളിൽ വിവിധ രാഷ്ട്രീയ പാർട്ടി നേതാക്കളുമായി ചർച്ച നടത്തും. പുതിയ സർക്കാർ രൂപീകരിക്കാൻ പിന്തുണയുള്ള നേതാവിനെ പ്രസിഡന്റ് ക്ഷണിക്കും. ബിന്യാമിൻ നെതന്യാഹു, പ്രതിപക്ഷ നേതാവ് ഗാഡി ഐസൻകോട്ട് എന്നിവരാണ് പ്രധാനമായും പരിഗണനയിലുള്ളത്.

എന്നാൽ നിലവിൽ ഇരുപക്ഷത്തിനും തനിച്ച് ഭൂരിപക്ഷമില്ലാത്തതിനാൽ, മറ്റ് പാർട്ടികളുടെ പിന്തുണയോടെ സർക്കാർ രൂപീകരിക്കാൻ സാധിച്ചില്ലെങ്കിൽ ഇസ്രായേലിന് വീണ്ടും തെരഞ്ഞെടുപ്പിലേക്ക് പോകേണ്ടിവരും.