യുവതി പരാതി തെളിയിച്ചാല് തന്നെ ശിക്ഷിക്കാമെന്ന് വിനായകൻ
കൊച്ചി: അശ്ലീല ചുവയോടെ ഫോണില് സംസാരിച്ചുവെന്ന ദളിത് ആക്ടിവിസ്റ്റിന്റെ പരാതി തെളിയിച്ചാല് തന്നെ ശിക്ഷിക്കാമെന്ന് നടന് വിനായകന്. ടൈംസ് ഓഫ് ഇന്ത്യയുമായുള്ള അഭിമുഖത്തിലാണ് വിഷയത്തിൽ വിനായകൻ തന്റെ നിലപാട് അറിയിച്ചത്. ‘എനിക്ക് ഒന്നും പറയാനില്ല. അവള് എന്താണോ ചെയ്യുന്നത് അത് പൂര്ത്തിയാക്കാന് അവളെ അനുവദിക്കൂ. എന്നെ വിളിക്കുന്നവരുടെ കോളുകള് ഞാന് റെക്കോഡ് ചെയ്യാറില്ല. ഇതെന്നെ സംബന്ധിച്ചതാണെന്ന് എനിക്ക് തോന്നുന്നേ ഇല്ല. അവരുടെ കയ്യില് തെളിവുണ്ടെങ്കില് ഞാനാണ് അത് ചെയ്തതെന്ന് അവര്ക്ക് തെളിയിക്കാന് സാധിക്കുമെങ്കില്, എന്നെ ശിക്ഷിക്കാം, അറസ്റ്റ് ചെയ്യാം ജയിലിലിടാം. അത്ര തന്നെ,’ വിനായകന് പറഞ്ഞു.
സംഭവത്തില് കല്പ്പറ്റ പോലീസ് കേസ് രജിസ്റ്റര് ചെയ്ത് അന്വേഷണം ആരംഭിച്ചു. സ്ത്രീയോട് മോശമായി സംസാരിച്ചുവെന്നതടക്കം നാല് വകുപ്പുകളാണ് നടനെതിരെ ചുമത്തിയത്. ഐപിസി 509, 294 ബി, കെപിഎ 120 തുടങ്ങിയ വകുപ്പുകളാണ് ചുമത്തിയിരിക്കുന്നത്.
ഫോണ് സംഭാഷണത്തിന്റെ കൂടുതല് തെളിവുകള് സൈബര് സെല് വഴി ശേഖരിക്കുന്നുണ്ട്. വിനായകനില് നിന്നുണ്ടായ മോശം പെരുമാറ്റത്തെ കുറിച്ച് യുവതി ഫെയ്സ്ബുക്കിലൂടെയാണ് വെളിപ്പെടുത്തിയത്.
