കുട്ടികളുടെ റിയാലിറ്റി ഷോകള്ക്ക് നിയന്ത്രണം ഏര്പ്പെടുത്തി കേന്ദ്രം
ന്യൂഡൽഹി: കുട്ടികളുടെ റിയാലിറ്റി ഷോകള്ക്ക് നിയന്ത്രണം ഏര്പ്പെടുത്തി കേന്ദ്ര വാര്ത്താവിനിമയ പ്രക്ഷേപണ മന്ത്രാലയം. ഇത് സംബന്ധിച്ച് ഔദ്യോഗിക പത്രക്കുറിപ്പിലൂടെ ടിവി ചാനലുകള്ക്ക് താക്കീത് നല്കി.കേബിള് ടെലിവിഷന് നെറ്റ് വര്ക്ക്സ് റെഗുലേഷന് ആക്ടിലെ പ്രോഗ്രാം ആന്റ് അഡ്വര്ടൈസിംഗ് കോഡ്സ് പ്രകാരമുള്ള നിബന്ധനകള് ടിവി ചാനലുകള് പാലിക്കേണ്ടതാണെന്നുള്ള താക്കീതു നല്കുകയാണ് കുറിപ്പിലൂടെ കേന്ദ്ര വാര്ത്താവിനിമയ പ്രക്ഷേപണ മന്ത്രാലയം.
സിനിമയിലെ മുതിര്ന്നവരുടെ നൃത്തച്ചുവടുകളാണ് ടിവി റിയാലിറ്റി ഷോകളില് ചെറിയ കുട്ടികളെ കൊണ്ട് ചെയ്യിപ്പിക്കുന്നതെന്ന് കണ്ടെത്തിയതെന്നും നായികാനായകന്മാര് അഭിനയിക്കുന്ന ഗാനരംഗങ്ങളും കുട്ടികളെ കൊണ്ട് ചെയ്യിപ്പിക്കുന്നത് അവരെ മോശമാക്കുന്ന പ്രവണതയാണെന്നും ഇതു തുടരാന് അനുവദിക്കാനാവില്ലെന്നും കുറിപ്പില് പറയുന്നു.
കുട്ടികള്ക്കായുള്ള റിയാലിറ്റി ഷോകളില് അശ്ലീല ഭാഷാപ്രയോഗങ്ങളോ അക്രമരംഗങ്ങളോ ഉണ്ടാകാന് പാടില്ല. പ്രായത്തിനും അതീതമായി കുട്ടികള് ചെയ്യുന്ന ഇത്തരം അനുകരണങ്ങള് അവരില് മോശം സ്വാധീനമാണ് സൃഷ്ടിക്കുന്നത്. ഈ പ്രവണത നല്ലതല്ലെന്നും കേന്ദ്രം വ്യക്തമാക്കി.
