ബഹ്‌റൈൻ 'രജനി മക്കൾ മൺഡ്രം ' ഐ സി ആർ എഫിന് രണ്ടു ലക്ഷം രൂപ നൽകും
മനാമ. ഇന്ത്യൻ എംബസി കീഴിൽ പ്രവർത്തിക്കുന്ന ചാരിറ്റി വിംഗ് ഐ സി ആർ എഫിന് ബഹ്‌റൈനിലെ രജനീകാന്ത് ഫാൻസ്‌ സംഘടനയായ രജനി മക്കൾ മൺഡ്രം രണ്ടു ലക്ഷം രൂപ വാഗ്ദാനം ചെയ്തു. പ്രവാസലോകത്തു നിന്ന് മരണമടയുന്ന പ്രവാസിയുടെ കുടുംബത്തിന് ഒരു ലക്ഷമാണ് നിലവിൽ നൽകുന്നത്. രണ്ടു കുടുംബത്തിനുള്ള സഹായമാണ് രജനി മക്കൾ മൺഡ്രം വാഗ്ദാനം ചെയ്തിരിക്കുന്നത്. സംഘടനയുടെ സെക്രട്ടറി സുരേഷ് കാലടി,ജോയിന്റ് സെക്രട്ടറി സുധീർ ,എക്സികുട്ടീവ് കമ്മിറ്റി അംഗങ്ങളായ രാജേന്ദ്രൻ,രമേഷ് എന്നിവർ ഇന്ന് ഉച്ചയ്ക്ക് ജുഫൈർ ഹോട്ടലിൽ സ്പെക്ട്ര കാർണിവലുമായി ബന്ധപ്പെട്ട് നടന്ന ഐ സി ആർ എഫ് വാർത്താ സമ്മേളനത്തിലാണ് ഇക്കാര്യം വ്യക്തമാക്കിയത്. ജീവകാരുണ്യ പ്രവർത്തനങ്ങളിൽ രജനിമക്കൾ മൺഡ്രം എന്നും പ്രവാസികൾക്കൊപ്പം ഉണ്ടാകുമെന്നും സംഘടനയുടെ പ്രവർത്തനങ്ങൾ കൂടുതൽ വിപുലീകരിക്കുമെന്നും ഭാരവാഹികൾ അറിയിച്ചു.
