ചിത്രകലാ ക്യാന്പ് ഇന്ന്
മനാമ: പ്രേരണ ബഹ്റിൻ കുട്ടികൾക്കായി സംഘടിപ്പിക്കുന്ന ചിത്രകലാ ക്യാന്പ് ‘പ്ലേ വിത്ത് കളേഴ്സ്’ ഇന്ന് ഉച്ച തിരിഞ്ഞ് 2:30ന് സിഞ്ചിലെ ഫ്രണ്ട്സ് ഓഡിറ്റോറിയത്തിൽ വെച്ച് നടത്തുമെന്ന് ബന്ധപ്പെട്ടവർ അറിയിച്ചു. പ്രകൃതിയിലുള്ള എന്തിനേയും അതേ പോലെ പകർത്തുന്ന രചനാരീതിക്ക് വിഭിന്നമായി ഒരു രചനയുടെ ആശയപൂർത്തീകരണത്തിനായി വർണ്ണങ്ങളും രൂപങ്ങളും അതിന്റെ സ്വാഭാവികതയിൽ നിന്നും മാറ്റി വരയ്ക്കുന്ന അല്ലെങ്കിൽ രൂപങ്ങൾ തന്നെ അപ്രസക്തമാകുകയും, അമൂർത്തമാകുകയും ചെയ്യുന്ന സ്വതന്ത്രമായ ഒരു രചനാ രീതിയെ കുട്ടികൾക്ക് പരിചയപ്പെടുത്തുകയാണ് ഇതിലൂടെ ചെയ്യുന്നത്.
മുൻ വർഷത്തെ ക്യാന്പുകളിൽ പ്രകൃതിയെയും അതിലെ ജീവനെയും സംരക്ഷിക്കുക എന്ന വിഷയത്തിലൂന്നി ചിത്രങ്ങൾ വരയ്ക്കുക, അബ്സ്ട്രാക്ട് രൂപങ്ങൾ മനോഹരമായ ചിത്രങ്ങളാക്കി മാറ്റുക, കൊളാഷ്, ക്രാഫ്റ്റ് എന്നീ രീതികളും കുട്ടികളെ പരിചയപ്പെടുത്തിയിരുന്നു. കൂടാതെ പ്രശസ്ത ചിത്രകാരൻ വാൻഗോഗിന്റെ ചിത്രങ്ങൾ കുട്ടികളെ പരിചയപ്പെടുത്തുകയും, ജപ്പാനീസ് ചലച്ചിത്രകാരൻ അകിരോ കുറുസോവയുടെ ‘ഡ്രീംസ്’ എന്ന സിനിമ ആധാരമാക്കി കൊണ്ടുള്ള ചിത്രം വരയും നടത്തിയിരുന്നു. കുട്ടികളുടെ സർഗ്ഗവാസനയെ വളർത്തുന്നതിനും, സ്വതന്ത്രമായ കലാസൃഷ്ടികൾക്ക് അവരെ പ്രാപ്തരാക്കുക എന്നുള്ളതും പ്രധാന ഉദ്ദേശലക്ഷ്യമായി മുൻ വർഷങ്ങളിൽ സംഘടിപ്പിച്ച ക്യാന്പുകൾ സംഘാടനം കൊണ്ടും അവതരണ രീതി കൊണ്ടും രക്ഷിതാക്കളുടെ മികച്ച അഭിപ്രായം നേടിയിരുന്നു. നാല് വയസ്സിന് മുകളിലോട്ടുള്ള കുട്ടികൾക്ക് പങ്കെടുക്കാനാവുമെന്ന് സംഘാടകർ അറിയിച്ചു.
കൂടുതൽ വിവരങ്ങൾക്ക് 66988834, 33033431, 34023179 എന്നീ നന്പറുകളിൽ ബന്ധപ്പെടുക.
