ക്രെഡിറ്റ് കാർഡ് മിനിമം തിരിച്ചടവ് പകുതിയായി കുറയ്ക്കാൻ നിർദ്ദേശം; ബില്ലിംഗ് തീയതിയും ഏകീകരിക്കാൻ ബഹ്റൈൻ പാർലമെന്റിൽ നീക്കം
പ്രദീപ് പുറവങ്കര
മനാമ: ഉപഭോക്താക്കളുടെ മാസത്തിലുണ്ടാകുന്ന സാമ്പത്തിക ബാധ്യത ലഘൂകരിക്കുന്നതിന്റെ ഭാഗമായി ക്രെഡിറ്റ് കാർഡ് മിനിമം തിരിച്ചടവ് തുക പകുതിയായി കുറയ്ക്കാനും എല്ലാ ബാങ്കുകളിലും ബില്ലിംഗ് തീയതി ഏകീകരിക്കാനും പുതിയ നിർദ്ദേശം. ചൊവ്വാഴ്ച നടക്കുന്ന പ്രതിവാര പാർലമെന്റ് സമ്മേളനത്തിൽ ഈ വിഷയം ചർച്ച ചെയ്യും. മിനിമം തിരിച്ചടവ് നിലവിലുള്ള അഞ്ച് ശതമാനത്തിൽ നിന്ന് 2.5 ശതമാനമായി കുറയ്ക്കാനും എല്ലാ മാസവും 20-ാം തീയതി ബില്ല് നൽകാനുമാണ് പാർലമെന്റിന്റെ ഫിനാൻഷ്യൽ ആന്റ് ഇക്കണോമിക് അഫയേഴ്സ് കമ്മിറ്റിയുടെ ശുപാർശ.
കമ്മിറ്റി വൈസ് ചെയർമാൻ എം.പി മുഹമ്മദ് അൽ മറാഫിയാണ് ഈ പ്രമേയം സമർപ്പിച്ചത്. കുടുംബച്ചെലവുകൾ വർദ്ധിച്ചുവരുന്ന സാഹചര്യത്തിൽ പൗരന്മാരുടെ മാസംതോടുള്ള സാമ്പത്തിക സമ്മർദ്ദം കുറയ്ക്കാൻ ഈ മാറ്റങ്ങൾ സഹായിക്കുമെന്ന് അദ്ദേഹം വ്യക്തമാക്കി. നിലവിൽ വിരമിച്ചവർക്ക് മാത്രം ലഭ്യമാകുന്ന 2.5 ശതമാനം മിനിമം തിരിച്ചടവ് നിരട്ട് മറ്റ് ഉപഭോക്താക്കൾക്കും വ്യാപിപ്പിക്കുകയാണ് ഇതിലൂടെ ലക്ഷ്യമിടുന്നത്. കൂടാതെ, ബാങ്കുകൾ വ്യത്യസ്ത തീയതികളിൽ ബില്ലുകൾ അയക്കുന്ന രീതി ഒഴിവാക്കി എല്ലാ മാസവും 20-ാം തീയതി കോമൺ ബില്ലിംഗ് തീയതിയാക്കാനും നിർദ്ദേശമുണ്ട്.
എന്നാൽ, ഈ നിർദ്ദേശത്തിനെതിരെ ബാങ്ക് അസോസിയേഷൻ ആശങ്ക പ്രകടിപ്പിച്ചിട്ടുണ്ട്. മിനിമം തിരിച്ചടവ് നിരട്ട് നിർബന്ധമാക്കുന്നത് ഉപഭോക്താക്കൾ കൂടുതൽ കാലം കടക്കാരായി തുടരുന്നതിനും ആകെ പലിശ വർദ്ധിക്കുന്നതിനും ഇടയാക്കുമെന്ന് ബാങ്കുകൾ മുന്നറിയിപ്പ് നൽകുന്നു. എന്നാൽ ഉപഭോക്തൃ സംരക്ഷണവും സാമ്പത്തിക സുസ്ഥിരതയും ഉറപ്പാക്കുന്ന രീതിയിലായിരിക്കും അന്തിമ തീരുമാനമെന്ന് കമ്മിറ്റി ചെയർമാൻ എം.പി അഹമ്മദ് അൽ സല്ലൂം വ്യക്തമാക്കി.
sdfsf
