മലയാളി ബഹ്റൈനിൽ നിര്യാതനായി
മനാമ : ഒരാഴ്ച്ചയോളമായി സൽമാനിയ മെഡിക്കൽ കോംപ്ലക്സിൽ ചികിത്സയിൽ കഴിഞ്ഞിരുന്ന പാറശാല കോട്ടവിള വീട്ടിൽ തങ്കൻ ചെല്ലയ്യൻ നിര്യാതനായി. ഇന്നലെ രാത്രി പത്ത് മണിയോടെ ഹൃദയമിടുപ്പ് നിൽക്കുകയും മരണം സ്ഥിരീകരിക്കുകയുമായിരുന്നു.
തലച്ചോറിൽ രക്തം കട്ട പിടിച്ചതാണ് മരണകാരണം. 44 വയസായിരുന്നു. രക്തസമ്മർദ്ദം അമിതമായി കൂടിയ അവസ്ഥയിലായിരുന്നു ഇദ്ദേഹത്തെ ആശുപത്രിയിൽ പ്രവേശിപ്പിച്ചിരുന്നത്. രോഗ ലക്ഷണങ്ങൾ മുന്പുണ്ടായിട്ടു പോലും അത് വകവെയ്ക്കാതെ ജോലി ചെയ്തിരുന്ന ഇദ്ദേഹത്തെ ശരീരത്തിന്റെ ഒരു ഭാഗം തളർന്ന നിലയിലും, സംസാര ശേഷി നഷ്ടപ്പെട്ട അവസ്ഥയിലുമാണ് ആശുപത്രിയിൽ എത്തിച്ചത്. ഉടൻ തന്നെ ഓപ്പറേഷന് വിധേയമാക്കിയിരുന്നുവെങ്കിലും കാര്യമായ പുരോഗതി ഉണ്ടായിരുന്നില്ല. രണ്ട് ദിവസം മുന്പെ ഡോക്ടർമാർ മസ്തിഷ്കമരണം സ്ഥിരീകരിച്ചിരുന്നു.
മൃതദേഹം നാട്ടിലേയ്ക്ക് കൊണ്ടുപോകാനുള്ള ഏർപ്പാടുകൾ കന്പനി അധികൃതർ ചെയ്തുവരികയാണ്. ബഹ്റൈനിലെ ഐ.വൈ.സി.സിയുടെ മുൻകാല പ്രവർത്തകനാണ് ഇദ്ദേഹം. നിര്യാണത്തിൽ ഐ.വൈ. സി.സി ദേശീയ കമ്മറ്റി പ്രസിഡണ്ട് ഈപ്പൻ ജോർജ്, ജനറൽ സെക്രട്ടറി അനസ് റഹീം, അൽ ജമീൽ കൺസ്ട്രക്ഷൻസ് മാനേജിഗ് ഡയറക്ടർ തോമസ് ചെറിയാൻ എന്നിവർ അനുശോചനം രേഖപ്പെടുത്തി.
അപ്രതീക്ഷിത മരണം, ഒറ്റപ്പെട്ട് കുടുംബം
ദീർഘനാളായി സൗദി അറേബ്യയിലും, ബഹ്റൈനിലും കെട്ടിടനിർമ്മാണ രംഗത്ത് ജോലി ചെയ്തു വരികയായിരുന്ന ഇദ്ദേഹം നിലവിൽ ബഹ്റൈനിലെ അൽ ജമീൽ കോൺട്രാക്ടിങ് കന്പനി ജീവനക്കാരനാണ്. ഭാര്യയും രണ്ട് പെൺകുട്ടികളും, ഒരാൺകുട്ടിയും അടങ്ങുന്ന നിർധനരായ കുടുംബത്തിന്റെ ഏക ആശ്രയമാണ് പരേതൻ. ഇരട്ടകുട്ടികളായ പെൺകുട്ടികളിൽ ഒരാൾക്ക് ജന്മനാ നടക്കുവാൻ സാധിക്കില്ല. അടച്ചുറപ്പില്ലാത്ത ഒറ്റമുറി വീട്ടിലാണ് ഇവരുടെ താമസം. അദ്ദേഹത്തിന്റെ കുടുംബത്തെ സഹായിക്കുവാൻ താൽപര്യമുള്ളവർക്ക് ഐ.വൈ.സി.സി ചാരിറ്റിവിങ് കൺവീനറുമായി 35057630 എന്ന നന്പറിൽ ബന്ധപ്പെടാവുന്നതാണ്.
