വ്യാപാര-വ്യവസായ സഹകരണം ശക്തമാക്കാൻ ജി.സി.സി അണ്ടർസെക്രട്ടറിമാരുടെ യോഗം ബഹ്റൈനിൽ ചേർന്നു

പ്രദീപ് പുറവങ്കര

മനാമ: ജി.സി.സി രാജ്യങ്ങൾക്കിടയിലെ വ്യാപാരം സുഗമമാക്കുക, വിതരണ ശൃംഖലകൾ (Supply Chains) ശക്തിപ്പെടുത്തുക, കസ്റ്റംസ് യൂണിയൻ, ജി.സി.സി പൊതുവിപണി എന്നിവയുമായി ബന്ധപ്പെട്ട പ്രവർത്തനങ്ങൾ വേഗത്തിലാക്കുക എന്നീ ലക്ഷ്യങ്ങളോടെ ജി.സി.സി വ്യവസായ അണ്ടർസെക്രട്ടറിമാരുടെ ഒൻപതാമത് അസാധാരണ യോഗം ബഹ്റൈന്റെ ആതിഥേയത്വത്തിൽ ഞായറാഴ്ച നടന്നു.

ജി.സി.സി അംഗരാജ്യങ്ങളിലെ വ്യവസായ അണ്ടർസെക്രട്ടറിമാർ, ജി.സി.സി ജനറൽ സെക്രട്ടേറിയറ്റ് പ്രതിനിധികൾ, ഗൾഫ് ഓർഗനൈസേഷൻ ഫോർ ഇൻഡസ്ട്രിയൽ കൺസൾട്ടിംഗ് (GOIC) ഭാരവാഹികൾ എന്നിവർ യോഗത്തിൽ പങ്കെടുത്തു. 'ജി.സി.സി ദേശീയ ഉൽപ്പന്നം' (GCC national product) എന്നതിന് കൃത്യമായ നിർവചനം നൽകുക, വ്യവസായ മേഖലകളിലെ പ്രാദേശിക ഉള്ളടക്ക നിയമങ്ങൾ (local content rules), കൂട്ടായ കസ്റ്റംസ് സംരക്ഷണത്തിന്റെ പരിധിയിൽ വരുന്ന ചരക്കുകളുടെ പ്രവർത്തന പദ്ധതി എന്നിവ യോഗം ചർച്ച ചെയ്തു.

മേഖലയിലെ വ്യവസായ ബന്ധങ്ങൾ ആഴത്തിലാക്കാനും ചരക്കുനീക്കം സുഗമമാക്കാനുമുള്ള സംയുക്ത ഗൾഫ് നീക്കങ്ങളുടെ ഭാഗമായാണ് ഈ ചർച്ചകളെന്ന് ബഹ്റൈൻ വ്യവസായ-വാണിജ്യ മന്ത്രാലയം അണ്ടർസെക്രട്ടറി ഈമാൻ അഹമ്മദ് അൽ ദോസരി പറഞ്ഞു. ആഗോളതലത്തിലും മേഖലയിലുമുണ്ടാകുന്ന അസാധാരണ സാഹചര്യങ്ങൾ കണക്കിലെടുക്കുമ്പോൾ, ഏത് പ്രതിസന്ധികളെയും അതിജീവിക്കാൻ തക്കവണ്ണം ഗൾഫ് വിതരണ ശൃംഖലകളെ സജ്ജമാക്കേണ്ടതുണ്ടെന്ന് നിലവിലെ സാഹചര്യങ്ങൾ തെളിയിക്കുന്നതായി അവർ ചൂണ്ടിക്കാട്ടി.

അംഗരാജ്യങ്ങൾക്കിടയിലുള്ള വ്യാപാര തടസ്സങ്ങൾ നീക്കാനാണ് ജി.സി.സി ശ്രമിക്കുന്നത്. ഓരോ യോഗവും രാജ്യങ്ങൾക്കിടയിൽ കൂടുതൽ ധാരണകൾക്ക് വഴിവെക്കുന്നുണ്ടെന്നും ഇത് പൂർണ്ണമായ ഗൾഫ് വ്യവസായ സംയോജനത്തിലേക്ക് നയിക്കുമെന്നും അവർ പ്രത്യാശ പ്രകടിപ്പിച്ചു.

ഗൾഫ് വ്യവസായ സഹകരണം ശക്തമാക്കാനുള്ള യു.എ.ഇയുടെ താല്പര്യമാണ് ഈ ചർച്ചകളിൽ പങ്കാളികളായതിലൂടെ വ്യക്തമാകുന്നതെന്ന് യു.എ.ഇ വ്യവസായ-ആധുനിക സാങ്കേതിക മന്ത്രാലയത്തിലെ അസിസ്റ്റന്റ് അണ്ടർസെക്രട്ടറി ഒസാമ അമീർ ഫാദൽ പറഞ്ഞു. ദേശീയ ഉൽപ്പന്നത്തിന്റെ നിർവചനം, കസ്റ്റംസ് സംരക്ഷണം എന്നീ രണ്ട് പ്രധാന വിഷയങ്ങളിലാണ് യോഗം ഊന്നൽ നൽകിയത്. ജി.സി.സി രാജ്യങ്ങളുടെ ആഭ്യന്തര ഉൽപ്പാദനത്തിൽ (GDP) വ്യവസായ മേഖലയുടെ പങ്ക് വർദ്ധിപ്പിക്കുകയാണ് ലക്ഷ്യമെന്നും, എണ്ണയിതര മേഖലകളെ വളർത്തി സമ്പദ്‌വ്യവസ്ഥയെ വൈവിധ്യവൽക്കരിക്കാൻ യു.എ.ഇയും മറ്റ് ജി.സി.സി രാജ്യങ്ങളും ശ്രമിച്ചുവരികയാണെന്നും അദ്ദേഹം കൂട്ടിച്ചേർത്തു.

ഗൾഫ് കസ്റ്റംസ് യൂണിയനുമായി നേരിട്ട് ബന്ധമുള്ള വിഷയങ്ങൾ കൈകാര്യം ചെയ്തതിനാൽ ഈ യോഗം ഏറെ പ്രാധാന്യമർഹിക്കുന്നതാണെന്ന് ബഹ്റൈൻ വ്യവസായ-വാണിജ്യ മന്ത്രാലയം അസിസ്റ്റന്റ് അണ്ടർസെക്രട്ടറി ഖാലിദ് ഫഹദ് അൽ അലവി വ്യക്തമാക്കി. വരാനിരിക്കുന്ന ഒക്ടോബറിൽ ബഹ്റൈൻ ആതിഥേയത്വം വഹിക്കുന്ന 'മെയ്ഡ് ഇൻ ദി ജി.സി.സി' (Made in the GCC) ഫോറത്തിന്റെയും എക്സിബിഷന്റെയും ഒരുക്കങ്ങളും യോഗം വിലയിരുത്തി.