നീറ്റ് പുനപ്പരീക്ഷയ്ക്കിടെ ആൾമാറാട്ടം: ബീഹാറിൽ ഒൻപത് പേർ അറസ്റ്റിൽ
ഷീബ വിജയൻ
ന്യൂഡൽഹി: നീറ്റ് പുനപ്പരീക്ഷയ്ക്കിടെ ബീഹാറിൽ ആൾമാറാട്ടം നടത്തിയ ഒൻപത് പേർ അറസ്റ്റിലായി. ബീഹാറിലെ ലഖിസാരായിയിലാണ് രാജ്യത്തെ ഞെട്ടിച്ച ഈ സംഭവം റിപ്പോർട്ട് ചെയ്തിരിക്കുന്നത്. പരീക്ഷ എഴുതിയ യഥാർത്ഥ വിദ്യാർത്ഥികൾക്ക് പകരം പണവും മറ്റ് ആനുകൂല്യങ്ങളും കൈപ്പറ്റി അറസ്റ്റിലായവരാണ് പരീക്ഷ എഴുതിയതെന്ന് പോലീസ് സ്ഥിരീകരിച്ചു. ഈ വലിയ തട്ടിപ്പ് റാക്കറ്റുമായി ബന്ധപ്പെട്ട് നിലവിൽ 12 പേരെ പോലീസ് വിശദമായി ചോദ്യം ചെയ്തുവരികയാണ്.
അതേസമയം, ഉത്തർപ്രദേശിൽ പരീക്ഷയെഴുതിയ ഒരു വിദ്യാർത്ഥിയിൽനിന്ന് സിം കാർഡും പഴയ ചോദ്യപ്പേപ്പറും കണ്ടെടുത്തതിനെ തുടർന്ന് ഈ വിദ്യാർത്ഥിയെ പോലീസ് കസ്റ്റഡിയിലെടുത്തു. പരീക്ഷാ ഹാളിൽ കർശന പരിശോധന നടത്തുന്നതിനിടെ വിദ്യാർത്ഥിയുടെ അടിവസ്ത്രത്തിൽ ഒളിപ്പിച്ച നിലയിലാണ് സിം കാർഡും നീറ്റ് പരീക്ഷയുടെ പഴയ ചോദ്യപ്പേപ്പറും അധികൃതർ കണ്ടെത്തിയത്. ബല്ലിയ സ്വദേശിയായ പ്രിൻസ് ദുബെയാണ് ഈ സംഭവത്തിൽ നിലവിൽ പോലീസ് കസ്റ്റഡിയിലായിട്ടുള്ളത്. പരീക്ഷാ ക്രമക്കേടുകൾക്കിടയിലും, നീറ്റ് പരീക്ഷയുടെ മൂല്യനിർണ്ണയത്തിനുള്ള നടപടികൾ ഇതിനോടകം തന്നെ ആരംഭിച്ചതായി നാഷണൽ ടെസ്റ്റിംഗ് ഏജൻസി (എൻടിഎ) അറിയിച്ചു. ഈ മാസം അവസാനത്തോടു കൂടിത്തന്നെ പരീക്ഷാ ഫലം പൂർണ്ണമായി പ്രഖ്യാപിക്കാനാണ് എൻടിഎ ശ്രമിക്കുന്നത്.
dsfdasfdfsadfsa
