'ഒരു ഗുണവുമില്ലാത്തവർ, മിണ്ടാതിരിക്കൂ'; ഡികെയ്ക്കായി മുദ്രാവാക്യം വിളിച്ച അണികളെ പരസ്യമായി ശാസിച്ച് ഖാർഗെ

ഷീബ വിജയൻ

ബെംഗളൂരു: കർണാടക പിസിസി അധ്യക്ഷനായി ബികെ ഹരിപ്രസാദ് ഔദ്യോഗികമായി ചുമതലയേറ്റെടുക്കുന്ന പ്രൗഢഗംഭീരമായ ചടങ്ങിൽ മുദ്രാവാക്യം വിളിച്ച അണികളെ വേദിയിൽ വെച്ച് പരസ്യമായി ശാസിച്ച് കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെ. ഖാർഗെ വേദിയിൽ പ്രസംഗിക്കാൻ തുടങ്ങുന്നതിനിടെ പുതിയ മുഖ്യമന്ത്രി ഡികെ ശിവകുമാറിനായി അണികൾ കൂട്ടത്തോടെ മുദ്രാവാക്യം വിളിക്കാൻ തുടങ്ങിയതോടെയാണ് ഖാർഗെ പ്രകോപിതനായതും അവരെ ഒരു ഗുണവുമില്ലാത്തവരെന്ന് വിളിച്ച് ശാസിച്ചതും.

'മിണ്ടാതെ അവിടെ ഇരിക്കൂ, രാജ്യം മുഴുവൻ നിങ്ങളുടെ കൈയിലായതുപോലെയാണല്ലോ ഇപ്പോഴത്തെ നിങ്ങളുടെ ഈ പെരുമാറ്റം, യൂസ്ലെസ് ഫെലോസ്' എന്നിങ്ങനെയായിരുന്നു ഖാർഗെയുടെ കടുത്ത പരാമർശം. ഈ സംഭവത്തിന്റെ വീഡിയോ ദൃശ്യങ്ങൾ സമൂഹ മാധ്യമങ്ങളിൽ വലിയ രീതിയിൽ പ്രചരിക്കുന്നുണ്ട്. സംഭവ സമയത്ത് മുഖ്യമന്ത്രി ഡികെ ശിവകുമാറും വേദിയിൽ വെച്ച് അണികളോട് അടങ്ങിയിരിക്കാൻ കൈവർത്തി ആവശ്യപ്പെടുന്നുണ്ടായിരുന്നു.

'ഇത് കോൺഗ്രസ് പാർട്ടിയുടെ ഔദ്യോഗിക യോഗമാണ്, അല്ലാതെ ഏതെങ്കിലും ഒരു വ്യക്തിക്ക് വേണ്ടി മാത്രം സംഘടിപ്പിച്ചതല്ല. പാർട്ടിയെ കൂടുതൽ ശക്തിപ്പെടുത്താൻ എല്ലാവരും ഒന്നിച്ച് നിൽക്കുകയാണ് വേണ്ടത്. ഓരോരുത്തരും അവരവർക്ക് ഇഷ്ടമുള്ള നേതാക്കളുടെ പേരിൽ വ്യക്തിപരമായി മുദ്രാവാക്യം വിളിക്കുന്നത് ഒട്ടും ശരിയല്ല. പാർട്ടിയിൽ കടുത്ത അച്ചടക്കം അനിവാര്യമാണ്. ഇവിടെ നടന്ന കാര്യങ്ങളെല്ലാം ക്യാമറയിൽ കൃത്യമായി റെക്കോർഡ് ചെയ്യുന്നുണ്ട്. ഈ ദൃശ്യങ്ങൾ വിശദമായി പരിശോധിച്ച് വേണ്ടിവന്നാൽ കുറ്റക്കാർക്കെതിരെ കർശന നടപടിയെടുക്കും' എന്ന് ഖാർഗെ മുന്നറിയിപ്പ് നൽകി. പാർട്ടിയിൽ ഡികെ പക്ഷത്തിന്റെ ശക്തമായ സമ്മർദത്തിനൊടുവിലാണ് സംസ്ഥാനത്ത് ഈ മാസം മുഖ്യമന്ത്രിയെ മാറ്റാൻ ഹൈക്കമാൻഡ് തയ്യാറായത്. 2028ൽ കടുത്ത നിയമസഭ തെരഞ്ഞെടുപ്പ് വരാനിരിക്കെ വളരെ ജാഗ്രതയോടെയാണ് കോൺഗ്രസ് നേതൃത്വം തീരുമാനങ്ങളെടുക്കുന്നത്. 2023ൽ സിദ്ധരാമയ്യ മുഖ്യമന്ത്രിയായതു മുതൽ ഡികെ പക്ഷം പരസ്യമായ എതിർപ്പുമായി രംഗത്തെത്തിയിരുന്നു. ഒടുവിൽ കടുത്ത രാഷ്ട്രീയ നീക്കങ്ങൾക്കൊടുവിൽ മേയ് 28നാണ് സിദ്ധരാമയ്യ മുഖ്യമന്ത്രി സ്ഥാനം രാജിവച്ചത്. ഒരാഴ്ച നീണ്ട ചർച്ചകൾക്ക് ശേഷം ഡികെ ശിവകുമാർ കർണാടകയുടെ പുതിയ മുഖ്യമന്ത്രിയായി അധികാരമേൽക്കുകയും ചെയ്തു.