ഇന്ത്യൻ ക്ലബ് പത്താമത് പ്രതിമാസ ബാഡ്മിന്റൺ ടൂർണമെന്റിന് സമാപനം
പ്രദീപ് പുറവങ്കര
മനാമ: ദി ഇന്ത്യൻ ക്ലബ്ബ് അംഗങ്ങൾക്കായി സംഘടിപ്പിച്ച പത്താമത് പ്രതിമാസ ബാഡ്മിന്റൺ ടൂർണമെന്റ് 2026 ആവേശകരമായ മത്സരങ്ങളോടെ വിജയകരമായി സമാപിച്ചു. ക്ലബ്ബിന്റെ സ്പോർട്സ് കമ്മ്യൂണിറ്റിയുടെ വളർച്ചയിൽ മറ്റൊരു നാഴികക്കല്ലായ ഈ ഡബിൾസ് ടൂർണമെന്റ് സെപ്റ്റംബർ 27 മുതൽ ഒക്ടോബർ 3 വരെയാണ് നടന്നത്. ക്ലബ്ബിലെ പ്രമുഖ ബാഡ്മിന്റൺ താരങ്ങൾ മാറ്റുരച്ച മത്സരങ്ങൾ കാണികൾക്ക് മികച്ച കായികാനുഭവമാണ് സമ്മാനിച്ചത്.
ആകർഷകമായ പ്രകടനവും മികച്ച തന്ത്രങ്ങളും കായികക്ഷമതയും കൊണ്ട് ശ്രദ്ധേയമായ മത്സരങ്ങളാണ് ടൂർണമെന്റിലുടനീളം അരങ്ങേറിയത്. വിജയികളായ ചാമ്പ്യന്മാർക്കും റണ്ണേഴ്സ് അപ്പിനും, കളിയിൽ പങ്കെടുത്ത മുഴുവൻ കായികതാരങ്ങൾക്കും ക്ലബ്ബ് ഭരണസമിതി അഭിനന്ദനങ്ങൾ അറിയിച്ചു. ടൂർണമെന്റിന്റെ വിജയത്തിനായി സഹകരിച്ച ഔദ്യോഗിക സ്പോൺസർമാർക്ക് ദി ഇന്ത്യൻ ക്ലബ് എക്സിക്യൂട്ടീവ് കമ്മിറ്റി പ്രത്യേക നന്ദി രേഖപ്പെടുത്തി.
മത്സരങ്ങൾ തടസ്സമില്ലാതെ നടത്തുന്നതിനായി പിന്നണിയിൽ പ്രവർത്തിച്ച സന്നദ്ധപ്രവർത്തകർ, കോഓർഡിനേറ്റർമാർ, പിന്തുണ നൽകിയ മറ്റ് വ്യക്തികൾ എന്നിവരുടെ അശ്രാന്ത പരിശ്രമത്തെയും ക്ലബ്ബ് പ്രശംസിച്ചു. പത്താമത് എഡിഷന്റെ വൻ വിജയത്തിന് ശേഷം, വരും മാസങ്ങളിലും കായിക പ്രേമികളെ ഒന്നിച്ചുചേർക്കുന്ന കൂടുതൽ ബാഡ്മിന്റൺ ചാമ്പ്യൻഷിപ്പുകൾ സംഘടിപ്പിക്കുമെന്നും ക്ലബ്ബ് ഭാരവാഹികൾ അറിയിച്ചു.
aASDASAS
