പൊതുസ്ഥലങ്ങളിലെ പുകവലി തടയാൻ ബഹ്‌റൈനിൽ 'ഗ്ലാസ് ബൂത്തുകൾ': തായ്‌പേയ് മാതൃക നടപ്പാക്കാൻ ബഹ്റൈൻ സൗത്തേൺ നഗരസഭാ കൗൺസിൽ

പ്രദീപ് പുറവങ്കര

മനാമ: പാർക്കുകളും പൊതുവിപണികളും അടക്കമുള്ള തിരക്കേറിയ പൊതുസ്ഥലങ്ങളിൽ വഴിയാത്രക്കാർക്ക് പുകവലി മൂലമുണ്ടാകുന്ന ബുദ്ധിമുട്ടുകൾ ഒഴിവാക്കാൻ 'ഗ്ലാസ് ബൂത്തു'കൾ സ്ഥാപിക്കാൻ ഒരുങ്ങി ബഹ്‌റൈൻ. സൗത്തേൺ നഗരസഭാ കൗൺസിൽ ചെയർമാൻ അബ്ദുള്ള അബ്ദുല്ലത്തീഫിന്റെ നേതൃത്വത്തിലാണ് ഈ നിർദ്ദേശം മുന്നോട്ടുവെച്ചിരിക്കുന്നത്. തായ്‌വാന്റെ തലസ്ഥാനമായ തായ്‌പേയ് നടപ്പിലാക്കിയ വിജയകരമായ മാതൃക പിന്തുടർന്നാണ് ബഹ്‌റൈനിലും പദ്ധതി ആവിഷ്കരിക്കുന്നത്. കൗൺസിൽ ഐക്യകണ്ഠേന അംഗീകരിച്ച ഈ ശിപാർശ നഗരസഭാ കാര്യ-കാർഷിക മന്ത്രി വായെൽ അൽ മുബാറക് വഴി ആരോഗ്യ മന്ത്രി ഡോ. ജലീല അൽ സയ്യിദിന്റെ പരിഗണനയ്ക്കായി അയച്ചു.

നിലവിൽ ബഹ്‌റൈൻ ഇന്റർനാഷണൽ എയർപോർട്ടിന്റെ പുതിയ ടെർമിനലിൽ മാത്രമാണ് ഇത്തരത്തിലുള്ള പ്രത്യേക ഗ്ലാസ് ബൂത്തുകൾ ഉള്ളത്. പുറത്തേക്ക് പുക പടരാത്ത രീതിയിലുള്ള 'നെഗറ്റീവ് പ്രഷർ' (Negative Pressure) വെന്റിലേഷൻ സാങ്കേതികവിദ്യയാണ് ഇതിൽ ഉപയോഗിക്കുന്നത്. തുറസ്സായ പൊതുസ്ഥലങ്ങളിൽ പുകവലിക്കുന്നത് തടയുന്നതിനൊപ്പം, പുകവലിക്കാർക്ക് പ്രത്യേക സൗകര്യം ഒരുക്കുകയുമാണ് പദ്ധതിയിലൂടെ ലക്ഷ്യമിടുന്നത്. കുടുംബങ്ങൾ, കുട്ടികൾ, വയോധികർ എന്നിവർ അധിവസിക്കുന്ന പൊതുയിടങ്ങളിൽ നിഷ്ക്രിയ പുകവലി (Second-hand smoke) ഉണ്ടാക്കുന്ന ആരോഗ്യപ്രശ്നങ്ങൾ ഇല്ലാതാക്കാൻ ഇത് സഹായിക്കുമെന്ന് അബ്ദുള്ള അബ്ദുല്ലത്തീഫ് പറഞ്ഞു.

ബഹ്‌റൈന്റെ കാലാവസ്ഥയ്ക്കും സംസ്കാരത്തിനും അനുയോജ്യമായ രീതിയിലാകും പദ്ധതി നടപ്പിലാക്കുകയെന്ന് സാങ്കേതിക സമിതി ചെയർമാൻ അലി അൽ ശൈഖ് വ്യക്തമാക്കി. വായു സഞ്ചാരം, ഫിൽട്ടറേഷൻ, ചൂട്, വൈദ്യുതി ഉപയോഗം, തീപിടുത്തത്തിനെതിരെയുള്ള സുരക്ഷാ മുൻകരുതലുകൾ എന്നിവ കൃത്യമായി പരിശോധിച്ച് മാത്രമാകും അന്തിമ തീരുമാനം എടുക്കുക. പുകവലി പൂർണ്ണമായും ഒഴിവാക്കിയുള്ള നഗരമെന്ന ലക്ഷ്യത്തിലേക്ക് ബഹ്‌റൈന് മുന്നേറാൻ ഇത്തരം ശാസ്ത്രീയ മാർഗ്ഗങ്ങൾ ഉപകരിക്കുമെന്നാണ് വിലയിരുത്തൽ.

തിരക്കേറിയ പൊതുസ്ഥലങ്ങളിലെ നിഷ്ക്രിയ പുകവലി തടയാൻ വിപ്ലവകരമായ മാറ്റത്തിനൊരുങ്ങി ബഹ്‌റൈൻ. വിപണികളിലും പാർക്കുകളിലും പുകവലിക്കാർക്കായി പ്രത്യേക ഗ്ലാസ് ബൂത്തുകൾ സ്ഥാപിക്കാൻ സൗത്തേൺ നഗരസഭാ കൗൺസിൽ ശിപാർശ ചെയ്തു. തായ്‌പേയ് നഗരത്തിൽ വിജയകരമായി നടപ്പിലാക്കിയ നെഗറ്റീവ് പ്രഷർ സ്മോക്കിംഗ് റൂമുകളുടെ മാതൃകയിലാണ് പദ്ധതി. നിലവിൽ ബഹ്‌റൈൻ അന്താരാഷ്ട്ര വിമാനത്താവളത്തിൽ മാത്രമുള്ള ഇത്തരം അത്യാധുനിക ബൂത്തുകൾ ഇനി പ്രധാന പൊതുയിടങ്ങളിലും കാണാം.

പുക പുറത്തേക്ക് പടരാത്ത രീതിയിലുള്ള പ്രത്യേക വെന്റിലേഷൻ സംവിധാനമാണ് ഇതിൽ ഉപയോഗിക്കുന്നത്. കുടുംബങ്ങൾക്കും കുട്ടികൾക്കും വഴിയാത്രക്കാർക്കും പുക ശല്യമില്ലാതെ പൊതുയിടങ്ങൾ ഉപയോഗിക്കാൻ ഇത് വഴിയൊരുക്കും. പദ്ധതി പഠനവിധേയമാക്കാൻ നിർദ്ദേശം ആരോഗ്യ മന്ത്രാലയത്തിന് കൈമാറി. പുകവലി രഹിത ബഹ്‌റൈൻ ലക്ഷ്യത്തിലേക്കുള്ള പ്രധാന ചുവടുവെപ്പാണിത്.