ബഹ്‌റൈൻ ആരോഗ്യമേഖലയിൽ ചരിത്രക്കുതിപ്പ്: ഒരു പതിറ്റാണ്ടിനിടെ ആരോഗ്യകേന്ദ്രങ്ങളിൽ 32.6 ശതമാനം വർധന
പ്രദീപ് പുറവങ്കര
മനാമ: രാജ്യത്തെ പൊതു-സ്വകാര്യ ആരോഗ്യ മേഖലകളിൽ കഴിഞ്ഞ ഒരു പതിറ്റാണ്ടിനിടെ വൻ മുന്നേറ്റവും സൗകര്യങ്ങളുടെ വിപുലീകരണവും രേഖപ്പെടുത്തി ബഹ്‌റൈൻ. നാഷണൽ ഹെൽത്ത് റെഗുലേറ്ററി അതോറിറ്റി (NHRA) പുറത്തുവിട്ട ഏറ്റവും പുതിയ ഔദ്യോഗിക കണക്കുകൾ പ്രകാരം, രാജ്യത്ത് പ്രവർത്തിക്കുന്നതും ലൈസൻസുള്ളതുമായ ആശുപത്രികളുടെയും ഹെൽത്ത് യൂണിറ്റുകളുടെയും എണ്ണത്തിൽ 32.6 ശതമാനത്തിന്റെ വർധനവുണ്ടായി. ബഹ്‌റൈൻ ഓപ്പൺ ഡാറ്റ പോർട്ടലിലാണ് ഈ വിവരങ്ങൾ പ്രസിദ്ധീകരിച്ചത്.
2015-ൽ രാജ്യത്താകെ 46 ആരോഗ്യകേന്ദ്രങ്ങളാണുണ്ടായിരുന്നതെങ്കിൽ, 2025 എത്തുമ്പോഴേക്കും ഇത് 61 സൗകര്യങ്ങളായി ഉയർന്നു. 2025-ലെ കണക്കുകൾ പ്രകാരം 27 സർക്കാർ പ്രാഥമിക ആരോഗ്യ കേന്ദ്രങ്ങൾ, 24 സ്വകാര്യ ആശുപത്രികൾ, 10 സർക്കാർ ആശുപത്രികൾ എന്നിവയാണ് രാജ്യത്ത് സജീവമായി പ്രവർത്തിക്കുന്നത്. പൊതുജനങ്ങൾക്ക് മികച്ച ചികിത്സാസൗകര്യങ്ങൾ ഉറപ്പാക്കുന്നതിൽ പൊതുമേഖലയ്‌ക്കൊപ്പം സ്വകാര്യമേഖലയും കൃത്യമായ പങ്കുവഹിക്കുന്നുണ്ടെന്ന് കണക്കുകൾ സൂചിപ്പിക്കുന്നു.
കൂടാതെ, കഴിഞ്ഞ വർഷത്തെ അവസാനത്തെ കണക്കനുസരിച്ച് പൊതു-സ്വകാര്യ മേഖലകളിലെ ആശുപത്രികളിൽ ലഭ്യമായ ആകെ കിടക്കകളുടെ (Beds) എണ്ണം 3,338 ആണ്. ഇതിൽ 2,509 കിടക്കകൾ സർക്കാർ മേഖലയിലും 829 കിടക്കകൾ സ്വകാര്യ മേഖലയിലുമാണ് ഉള്ളത്. രാജ്യത്തുടനീളം ഔഷധ ലഭ്യതയും സേവനങ്ങളും എളുപ്പമാക്കിക്കൊണ്ട് ലൈസൻസുള്ള സ്വകാര്യ ഫാർമസികളുടെ എണ്ണം 425-ൽ എത്തിയതായും എൻഎച്ച്ആർഎയുടെ റിപ്പോർട്ടിൽ വ്യക്തമാക്കുന്നു.
assdsdsds
