ഹോർമൂസ് കടലിടുക്കിൽ സ്വതന്ത്ര നാവികാവകാശം ഉറപ്പാക്കണം: ബഹ്റൈൻ മന്ത്രിസഭായോഗം
പ്രദീപ് പുറവങ്കര
മനാമ: ഹോർമൂസ് കടലിടുക്കിലൂടെയുള്ള നാവികഗതാഗതം തടസ്സമില്ലാത്തതും വിവേചനരഹിതവുമാണെന്ന് ഉറപ്പാക്കണമെന്ന് ബഹ്റൈൻ കാബിനറ്റ്. ഗുദൈബിയ പാലസിൽ ഉപപ്രധാനമന്ത്രി ശൈഖ് ഖാലിദ് ബിൻ അബ്ദുള്ള അൽ ഖലീഫയുടെ അധ്യക്ഷതയിൽ ചേർന്ന വാരാന്ത്യ മന്ത്രിസഭാ യോഗത്തിലാണ് ബഹ്റൈൻ നിലപാട് വ്യക്തമാക്കിയത്.
ഹോർമൂസ് കടലിടുക്കിലെ ഗതാഗതവുമായി ബന്ധപ്പെട്ട ഏത് ഭാവി ക്രമീകരണങ്ങളും 1982-ലെ ഐക്യരാഷ്ട്രസഭയുടെ സമുദ്രനിയമ കൺവെൻഷൻ (UNCLOS), അന്താരാഷ്ട്ര മാരിടൈം ഓർഗനൈസേഷൻ (IMO) എന്നിവയുടെ തത്വങ്ങൾക്ക് അനുസൃതമായിരിക്കണമെന്ന് കാബിനറ്റ് പ്രസ്താവിച്ചു. പ്രത്യേക അനുമതികളോ ഫീസുകളോ വിവേചനങ്ങളോ ഇല്ലാതെ എല്ലാ കപ്പലുകൾക്കും സ്വതന്ത്ര സഞ്ചാരത്തിനുള്ള അവകാശം സംരക്ഷിക്കപ്പെടണം. ഈ വിഷയത്തിൽ എല്ലാ ജിസിസി (GCC) രാജ്യങ്ങളെയും ഉൾപ്പെടുത്തണമെന്ന് യോഗം ആവശ്യപ്പെട്ടു. ജിസിസി രാജ്യങ്ങളുടെ സുരക്ഷയുമായി ഹോർമൂസ് കടലിടുക്കിന്റെ സുരക്ഷിതത്വം നേരിട്ട് ബന്ധപ്പെട്ടിരിക്കുന്നതിനാലാണിത്.
ആക്രമണങ്ങൾ അവസാനിപ്പിക്കുക, അന്താരാഷ്ട്രതലത്തിൽ ഉത്തരവാദിത്തം ഉറപ്പാക്കുക, നാശനഷ്ടങ്ങൾക്ക് നഷ്ടപരിഹാരം നൽകുക, രാജ്യങ്ങളുടെ പരമാധികാരത്തെ മാനിക്കുക, സായുധ ഗ്രൂപ്പുകൾക്കുള്ള പിന്തുണ അവസാനിപ്പിക്കുക, നിയമപരമായ മാർഗ്ഗങ്ങളിലൂടെ പ്രശ്നങ്ങൾ പരിഹരിക്കുക എന്നിവയാണ് ശാശ്വത സമാധാനത്തിന് ആവശ്യമെന്നും കാബിനറ്റ് കൂട്ടിച്ചേർത്തു.
വിദ്യാഭ്യാസ രംഗത്ത് വിവരസാങ്കേതികവിദ്യ പ്രയോജനപ്പെടുത്തുന്നതിനുള്ള 2026-ലെ 'യുനെസ്കോ കിംഗ് ഹമദ് ബിൻ ഈസ അൽ ഖലീഫ പ്രൈസ്' വിജയികളെ യോഗത്തിൽ മന്ത്രിസഭ അഭിനന്ദിച്ചു. രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫയുടെ ഭരണത്തിന് കീഴിൽ ഭരണഘടനാ സ്ഥാപനങ്ങളെ ശക്തിപ്പെടുത്തുന്നതിൽ ബഹ്റൈൻ കൈവരിച്ച നേട്ടങ്ങളെയും കാബിനറ്റ് പ്രശംസിച്ചു.
sdfsf
