തൊഴിൽ സേവനങ്ങൾ കൂടുതൽ എളുപ്പമാക്കി എൽ.എം.ആർ.എ; പുതിയ ഡിജിറ്റൽ സംവിധാനം നിലവിൽ വന്നു

പ്രദീപ് പുറവങ്കര

മനാമ: തൊഴിൽ വിപണിയുമായി ബന്ധപ്പെട്ട ഇടപാടുകൾ നടത്തുന്നതിന് സ്ഥാപനങ്ങൾ ചുമതലപ്പെടുത്തുന്ന വ്യക്തികളുടെ അനുമതികളും അധികാരങ്ങളും പുതുക്കുന്നതിനായി പുതിയ ഡിജിറ്റൽ സേവനം ആരംഭിച്ച് ബഹ്റൈൻ ലേബർ മാർക്കറ്റ് റെഗുലേറ്ററി അതോറിറ്റി . വിവരങ്ങൾ നൽകുക, അപേക്ഷകൾ സമർപ്പിക്കുക, ഫീസ് അടയ്ക്കുക, വർക്ക് പെർമിറ്റുകൾ പ്രിന്റ് ചെയ്യുക തുടങ്ങിയ വിവിധ ചുമതലകൾ കൈകാര്യം ചെയ്യാൻ ഈ ഡിജിറ്റൽ സംവിധാനത്തിലൂടെ അനുമതി നൽകാനാകും. അപേക്ഷ സമർപ്പിച്ച് ഒരു പ്രവൃത്തിദിവസത്തിനകം നടപടികൾ പൂർത്തിയാകും.

പൂർണ്ണമായും ഡിജിറ്റൽവൽക്കരിച്ച ഈ പുതിയ സംവിധാനം നിലവിൽ വന്നതോടെ ആവശ്യമായ രേഖകളുടെ എണ്ണത്തിൽ 50 ശതമാനം കുറവ് വരുത്താൻ സാധിച്ചിട്ടുണ്ട്. ഒപ്പം ഇലക്ട്രോണിക് ഫോമുകൾ ഉൾപ്പെടുത്തിയും വെബ്‌സൈറ്റിലെയും മറ്റു പ്ലാറ്റ്‌ഫോമുകളിലെയും സേവന വിവരങ്ങൾ ഏകീകരിച്ചും ഉപയോക്താക്കൾക്ക് കൂടുതൽ എളുപ്പത്തിൽ ഉപയോഗിക്കാവുന്ന രീതിയിലാണ് പ്ലാറ്റ്‌ഫോം രൂപകൽപ്പന ചെയ്തിരിക്കുന്നത്.

സേവനങ്ങളുടെ കാര്യക്ഷമതയും നിലവാരവും വർദ്ധിപ്പിക്കുന്നതിനൊപ്പം ഉപയോക്താക്കൾക്ക് ലളിതവും വ്യക്തവുമായ ഡിജിറ്റൽ അനുഭവം നൽകുന്നതിനായുള്ള എൽ.എം.ആർ.എയുടെ ശ്രമങ്ങളുടെ ഭാഗമാണ് ഈ പദ്ധതിയെന്ന് ഓപ്പറേഷൻസ് ആൻഡ് സർവീസസ് ഡെപ്യൂട്ടി സി.ഇ.ഒ അഹമ്മദ് ഇബ്രാഹിം അൽ അറബി പറഞ്ഞു. സ്ഥാപനങ്ങളുടെ സമയവും അധ്വാനവും ലാഭിക്കുന്നതിനും തൊഴിൽ വിപണി സംവിധാനം ശക്തമാക്കുന്നതിനും ഇത് സഹായിക്കുമെന്ന് അദ്ദേഹം കൂട്ടിച്ചേർത്തു.

സർക്കാർ സേവനങ്ങൾ പുനഃസംഘടിപ്പിക്കുന്നതിനും കൂടുതൽ ജനകീയമാക്കുന്നതിനുമുള്ള ദേശീയ പദ്ധതിയുടെ ഭാഗമായാണ് ഈ നടപടി. 'തവാസുൽ' (Tawasul) സംവിധാനം വഴിയുള്ള നിർദ്ദേശങ്ങൾ, നിക്ഷേപകരുടെ അഭിപ്രായങ്ങൾ, രഹസ്യ പരിശോധനാ റിപ്പോർട്ടുകൾ (secret shopper reports) എന്നിവ വിലയിരുത്തിയാണ് ഇത്തരം പരിഷ്കാരങ്ങൾ നടപ്പിലാക്കുന്നത്. ഇതിനോടകം 1,300-ലധികം സർക്കാർ സേവനങ്ങൾ ഔദ്യോഗികമായി രേഖപ്പെടുത്തുകയും പ്രസിദ്ധീകരിക്കുകയും ചെയ്തിട്ടുണ്ട്. വിവിധ സർക്കാർ മേഖലകളിലായി എണ്ണൂറോളം സേവനങ്ങളുടെ നവീകരണ പ്രവർത്തനങ്ങൾ നടന്നുവരികയാണ്.