ബഹ്റൈനിൽ പ്രവാസി തൊഴിലാളികളിൽ 70 ശതമാനത്തോളം പേരുടെയും ശമ്പളം 200 ദിനാറിൽ താഴെ; റിപ്പോർട്ട് പുറത്തുവിട്ട് എസ്ഐഒ

പ്രദീപ് പുറവങ്കര

മനാമ: ബഹ്റൈനിൽ ഇൻഷുറൻസ് പരിരക്ഷയുള്ള പ്രവാസി തൊഴിലാളികളിൽ പത്തിൽ ഏഴ് പേർക്കും മാസം 200 ബഹ്റൈനി ദിനാറിൽ താഴെ മാത്രമാണ് വേതനം ലഭിക്കുന്നതെന്ന് റിപ്പോർട്ട്. അതേസമയം, സ്വദേശികളായ തൊഴിലാളികളിൽ നാലിലൊരാൾക്ക് 1,000 ദിനാറോ അതിൽ കൂടുതലോ പ്രതിമാസ ശമ്പളം ലഭിക്കുന്നുണ്ട്. സോഷ്യൽ ഇൻഷുറൻസ് ഓർഗനൈസേഷൻ പുറത്തുവിട്ട 2026 ലെ ആദ്യ പാദത്തിലെ വിവരങ്ങളിലാണ് ഈ വേതന വിടവ് വ്യക്തമാകുന്നത്. 1,58,322 ബഹ്റൈനി തൊഴിലാളികളെയും 4,78,707 വിദേശ തൊഴിലാളികളെയും ഉൾപ്പെടുത്തി തയ്യാറാക്കിയതാണ് ഈ റിപ്പോർട്ട്.

ബഹ്റൈനികളുടെ ശരാശരി പ്രതിമാസ വരുമാനം 931 ദിനാറാണ്. എന്നാൽ ശരാശരി മധ്യരേഖാ വേതനം 618 ദിനാറാണ്. പ്രവാസി തൊഴിലാളികളുടെ ശരാശരി പ്രതിമാസ വേതനം 269 ദിനാറാണ്.

സ്വദേശി ജീവനക്കാരിൽ മൂന്നിൽ രണ്ട് പങ്കും (1,05,780 പേർ) സ്വകാര്യ മേഖലയിലാണ് ജോലി ചെയ്യുന്നത്. സർക്കാർ മേഖലയിൽ 52,542 പേർ ജോലി ചെയ്യുന്നു. പൊതുമേഖലയിലാണ് ഉയർന്ന ശമ്പളം രേഖപ്പെടുത്തിയിരിക്കുന്നത്. സർക്കാർ മേഖലയിലെ ശരാശരി ശമ്പളം 970 ദിനാറും സ്വകാര്യ കമ്പനികളിൽ 912 ദിനാറുമാണ്. സ്വദേശികളിൽ 26.6 ശതമാനം പേർ (42,105 പേർ) 1,000 ദിനാറോ അതിനു മുകളിലോ നേടുമ്പോൾ, 23.5 ശതമാനം പേർക്ക് 400 മുതൽ 599 ദിനാർ വരെയും, 22 ശതമാനം പേർക്ക് 200 മുതൽ 399 ദിനാർ വരെയുമാണ് ശമ്പളം. 2,221 ബഹ്റൈനികൾക്ക് മാത്രമാണ് 200 ദിനാറിൽ താഴെ ലഭിക്കുന്നത്.

ബഹ്റൈനി തൊഴിലാളികളിൽ 90,830 പുരുഷന്മാരും 67,492 സ്ത്രീകളുമുണ്ട്. 30 മുതൽ 39 വയസ്സ് വരെയുള്ളവരാണ് തൊഴിലാളികളിൽ അധികവും (63,991 പേർ). 20 മുതൽ 29 പ്രായക്കാർ 27 ശതമാനവും 40 മുതൽ 49 പ്രായക്കാർ 22.8 ശതമാനവുമാണ്. ഇൻഷുറൻസുള്ള ഒരു ബഹ്റൈനി തൊഴിലാളിയുടെ ശരാശരി പ്രായം 36 വയസ്സാണ്. ഇവർ ശരാശരി 23-ാം വയസ്സിൽ ജോലിയിൽ പ്രവേശിക്കുകയും 12 വർഷത്തെ സേവന പരിചയമുള്ളവരുമാണ്.

ഇൻഷുറൻസ് പരിരക്ഷയുള്ള 4,78,707 പ്രവാസി തൊഴിലാളികളും സ്വകാര്യ മേഖലയിലാണ് ജോലി ചെയ്യുന്നത്. ഇതിൽ 4,27,414 പുരുഷന്മാരും 51,293 സ്ത്രീകളുമുണ്ട്. ഇവരിൽ 70.9 ശതമാനം പേർക്കും (3,39,472 പേർ) 200 ദിനാറിൽ താഴെ മാത്രമാണ് പ്രതിമാസ ശമ്പളം. 13.7 ശതമാനം പേർ 200 മുതൽ 399 ദിനാർ വരെ നേടുമ്പോൾ, 4.6 ശതമാനം ആളുകൾക്ക് മാത്രമാണ് 1,000 ദിനാറോ അതിൽ കൂടുതലോ ലഭിക്കുന്നത്. പ്രവാസി തൊഴിലാളികളുടെ ശരാശരി പ്രായം 38 വയസ്സും അവരുടെ ശരാശരി സേവന കാലയളവ് ഒമ്പത് വർഷവുമാണ്.

പൊതുമേഖലയിൽ നിന്നും സ്വകാര്യ മേഖലയിൽ നിന്നും വിരമിച്ചവർ തമ്മിൽ വലിയ പെൻഷൻ വിടവുണ്ടെന്നും കണക്കുകൾ വ്യക്തമാക്കുന്നു. റിപ്പോർട്ട് പ്രകാരം ബഹ്റൈനിൽ ആകെ 86,861 പെൻഷൻകാരുണ്ട്. സോഷ്യൽ അലവൻസ് ഉൾപ്പെടെയുള്ള ശരാശരി പ്രതിമാസ പെൻഷൻ 857 ദിനാറാണ്. സർക്കാർ മേഖലയിൽ നിന്ന് വിരമിച്ച 36,462 പെൻഷൻകാർക്ക് ശരാശരി 1,085 ദിനാർ പ്രതിമാസ പെൻഷൻ ലഭിക്കുമ്പോൾ, സ്വകാര്യ മേഖലയിലെ 50,399 പെൻഷൻകാർക്ക് ലഭിക്കുന്നത് ശരാശരി 692 ദിനാറാണ്. പെൻഷൻകാരുടെ ശരാശരി പ്രായം 58 വയസ്സാണ്. ഇവർ ശരാശരി 48-ാം വയസ്സിൽ സർവീസിൽ നിന്ന് വിരമിച്ചവരും കഴിഞ്ഞ 10 വർഷമായി പെൻഷൻ കൈപ്പറ്റുന്നവരുമാണ്.