ഈജിപ്ഷ്യൻ പ്രസിഡന്റുമായി കൂടിക്കാഴ്ച നടത്തി ഹമദ് രാജാവ്; മേഖലയിലെ സുരക്ഷയും ഉഭയകക്ഷി സഹകരണവും ചർച്ച ചെയ്തു

പ്രദീപ് പുറവങ്കര

മനാമ: ബഹ്‌റൈൻ ഭരണാധികാരി ഹിസ് മജസ്റ്റി കിംഗ് ഹമദ് ബിൻ ഈസ അൽ ഖലീഫയും ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സിസിയും തമ്മിൽ സാഖിർ കൊട്ടാരത്തിൽ കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള സുദൃഢവും ചരിത്രപരവുമായ ബന്ധം ഇരുനേതാക്കളും കൂടിക്കാഴ്ചയിൽ അടിവരയിട്ട് വ്യക്തമാക്കി. പ്രാദേശികവും അന്തർദേശീയവുമായ ഏറ്റവും പുതിയ സുരക്ഷാ-രാഷ്ട്രീയ സാഹചര്യങ്ങൾ ഇരുവരും വിലയിരുത്തി. കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫയും പ്രമുഖ മന്ത്രിമാരും കൂടിക്കാഴ്ചയിൽ പങ്കെടുത്തു.

മധ്യപൂർവേഷ്യയിൽ സുസ്ഥിരതയും സമാധാനവും നിലനിർത്തുന്നതിൽ ഈജിപ്ത് വഹിക്കുന്ന നിർണായക പങ്കിനെ ഹമദ് രാജാവ് പ്രശംസിച്ചു. പ്രാദേശിക സുരക്ഷയുടെ ശക്തമായ അടിത്തറയാണ് ഈജിപ്ത്. ബഹ്‌റൈന്റെ പരമാധികാരവും സുരക്ഷയും പൗരന്മാരുടെ സുരക്ഷിതത്വവും സംരക്ഷിക്കുന്നതിനായി രാജ്യം കൈക്കൊള്ളുന്ന എല്ലാ നടപടികൾക്കും ഈജിപ്ത് നൽകുന്ന പിന്തുണയ്ക്കും ഐക്യദാർഢ്യത്തിനും രാജാവ് നന്ദി അറിയിച്ചു. സമാധാനാന്തരീക്ഷം തകർക്കുന്ന രീതിയിലുള്ള പ്രാദേശിക വെല്ലുവിളികളെ നയതന്ത്രപരമായി നേരിടേണ്ടതിന്റെ ആവശ്യകത ഇരു നേതാക്കളും ഊന്നിപ്പറഞ്ഞു.

ബഹ്‌റൈന് നേരെ ഇറാൻ നടത്തുന്ന നിരന്തരമായ ആക്രമണങ്ങളെ ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സിസി ശക്തമായി അപലപിച്ചു. ഇത്തരം പ്രകോപനങ്ങൾ രാജ്യങ്ങളുടെ പരമാധികാരത്തിന്മേലുള്ള കടന്നുകയറ്റവും അന്താരാഷ്ട്ര നിയമങ്ങളുടെ ലംഘനവുമാണെന്ന് അദ്ദേഹം ഓർമ്മിപ്പിച്ചു. ഇത് പ്രാദേശികവും അന്തർദേശീയവുമായ സമാധാനത്തിന് വലിയ ഭീഷണിയാണ് സൃഷ്ടിക്കുന്നത്.

ഇറാൻ നടത്തുന്ന ഇത്തരം ആക്രമണങ്ങളെയും പ്രകോപനങ്ങളെയും ശക്തമായി അപലപിക്കുന്ന ഐക്യരാഷ്ട്രസഭയുടെ സുരക്ഷാ കൗൺസിൽ പ്രമേയം 2817-ന് ഇരുനേതാക്കളും തങ്ങളുടെ പൂർണ്ണ പിന്തുണ ആവർത്തിച്ചു പ്രഖ്യാപിച്ചു. ജി.സി.സി രാജ്യങ്ങൾക്കും ജോർദാനും നേരെ ഇറാൻ നടത്തുന്ന ആക്രമണങ്ങൾ ഉടനടി അവസാനിപ്പിക്കണമെന്ന് പ്രമേയം ആവശ്യപ്പെടുന്നുണ്ട്. ഇത്തരം ബാഹ്യ ആക്രമണങ്ങളിൽ നിന്നും ഭീഷണികളിൽ നിന്നും സ്വയം പ്രതിരോധിക്കാനുള്ള ജി.സി.സി രാജ്യങ്ങളുടെയും ജോർദാന്റെയും അവകാശത്തെ ഇരു ഭരണാധികാരികളും പിന്തുണച്ചു.