വിദേശ ഭാഷകളിൽ ഡ്രൈവിംഗ് പരിശീലനം: ബഹ്റൈൻ പാർലമെന്റിൽ പ്രമേയം സമർപ്പിച്ചു
പ്രദീപ് പുറവങ്കര
മനാമ: അറബിക് ഇതര ഭാഷകൾ സംസാരിക്കുന്ന പ്രവാസികൾക്ക് റോഡ് നിയമങ്ങളും ട്രാഫിക് സിഗ്നലുകളും സുരക്ഷാ നിർദ്ദേശങ്ങളും എളുപ്പത്തിൽ മനസ്സിലാക്കാൻ സഹായിക്കുന്നതിനായി, ബഹ്റൈനിൽ വിദേശ ഭാഷകളിൽ ഡ്രൈവിംഗ് പരിശീലനം നൽകണമെന്ന് ആവശ്യപ്പെട്ട് പാർലമെന്റിൽ പ്രമേയം സമർപ്പിച്ചു. രാജ്യത്തെ വലിയ പ്രവാസി സമൂഹങ്ങൾ ഉപയോഗിക്കുന്ന ഇംഗ്ലീഷ്, ഉറുദു, ബംഗാളി, ഫിലിപ്പിനോ (തഗാലോഗ്) തുടങ്ങിയ ഭാഷകളിൽ പരിശീലന പരിപാടികൾ ആരംഭിക്കണമെന്നാണ് നിർദ്ദേശം.
എം.പിമാരായ മറിയം അൽ സായിഗ്, വലീദ് അൽ ദോസരി, ഹസൻ ബുഖമ്മാസ് എന്നിവർ ചേർന്നാണ് ഈ സംരംഭം മുന്നോട്ട് വെച്ചത്. പൊതുതാത്പര്യം മുൻനിർത്തി പാർലമെന്റിലെ വിദേശകാര്യ, പ്രതിരോധ, ദേശീയ സുരക്ഷാ സമിതി ഈ നിർദ്ദേശത്തിന് അനുകൂലമായ ശുപാർശ നൽകിയിട്ടുണ്ട്. ഭാഷാപരമായ തടസ്സങ്ങൾ കാരണം പല പ്രവാസികളും ഡ്രൈവിംഗ് ഇൻസ്ട്രക്ടർമാരുമായി ആശയവിനിമയം നടത്താൻ ബുദ്ധിമുട്ടുന്നുണ്ടെന്ന് പ്രമേയത്തിന്റെ വിശദീകരണ കുറിപ്പിൽ പറയുന്നു. ഇത് പരിശീലനത്തിന്റെ ഗുണനിലവാരത്തെ ബാധിക്കുകയും റോഡ് സുരക്ഷയ്ക്ക് ഭീഷണിയാകുകയും ചെയ്യും.
ഒന്നിലധികം ഭാഷകൾ സംസാരിക്കുന്ന ഇൻസ്ട്രക്ടർമാരുണ്ടാകുന്നത് റോഡ് ചിഹ്നങ്ങൾ, സിഗ്നലുകൾ, ട്രാഫിക് ലൈനുകൾ എന്നിവയെക്കുറിച്ചും സുരക്ഷിതമായ ഡ്രൈവിംഗിനെക്കുറിച്ചും വ്യക്തമായ ധാരണയുണ്ടാക്കാൻ പഠിതാക്കളെ സഹായിക്കും. കൂടുതൽ വ്യക്തതയുള്ള പരിശീലനം റോഡുകളിലെ സുരക്ഷാ നിലവാരം ഉയർത്തുമെന്നും ജീവനും സ്വത്തിനും സംരക്ഷണം നൽകുമെന്നും എം.പിമാർ വാദിക്കുന്നു. പദ്ധതിയെക്കുറിച്ച് പഠിച്ച് അനുമതി നൽകാനും ഇത് നടപ്പിലാക്കാനും നിർദ്ദേശത്തിലൂടെ സർക്കാരിനോട് ആവശ്യപ്പെട്ടിട്ടുണ്ട്.
aa
